২৬ মে অসমৰ সংখ্যালঘুৰ জাতীয় শ্বহীদ দিৱস

          মিঞাকে আদি কৰি সংখ্যালঘু হত্যাযজ্ঞৰ বাবে সংঘটিত হিংসাত্মক অসম আন্দোলনৰ ৰক্তাক্ত ইতিহাসৰ সোৱৰণ প্ৰায় সকলোৰে আছে৷ প্ৰায় সকলোৱে জানে নেলীৰ বৰ্বৰ হত্যাকাণ্ডৰ কথা৷ কিন্তু ২৬ মে’ক কিয় আমছুৱে শ্বহীদ দিৱস হিচাপে পালন কৰি আহিছে সেই কথা হয়তো বহুতেই জ্ঞাত নহয়৷ অতি সংক্ষিপ্ত ভাবে ইয়াৰ এটা আভাস দাঙি ধৰিবলৈ যত্ন কৰা হৈছে৷ 

হিংসাত্মক অসম আন্দোলনৰ এটা ফটো

           অবিভক্ত গোৱালপাৰা জিলাৰ জলেশ্বৰত ১৯৮০ চনৰ ২৯, ৩০ আৰু ৩১ মার্চ তাৰিখে অনুষ্ঠিত অধিবেশনত সদৌ অসম সংখ্যালঘু ছাত্ৰ ইউনিয়ন চমুকৈ আমছুৰ জন্ম হৈছিল। নবগঠিত আমছুৰ নেতৃত্বত ১৯৮০ চনৰ ২৬ মে’ত যি প্রতিবাদী আন্দোলন হৈছিল, সেয়া আছিল এক অভূতপূর্ব আৰু স্বতস্ফুর্ত গণ বিপ্লব।

          ১৯৮০ চনৰ ২৩ এপ্রিলত হাউলী ৰবীন্দ্র সংঘৰ কার্যালয়ত অনুষ্ঠিত আমছুৰ কর্ণধাৰ সমিতিৰ সভাত মে’ মাহৰ ৫ তাৰিখে প্রতিবাদ দিবস পালনৰ সিদ্বান্ত লোৱা হৈছিল। এই সিদ্বান্ত অনুযায়ী সেইদিনা সংখ্যালঘু নাগৰিকসকলে প্রতিবাদী শোভাযাত্রাত অংশ ল’ব আৰু নিজ নিজ এলেকাৰ বি ডি অ, চক্র বিষয়া, মহকুমাধিপতি আৰু উপায়ুক্তৰ জৰিয়তে প্রধানমন্ত্রীলৈ স্মাৰকপত্র প্রেৰণ কৰিব। ইয়াৰ উপৰিও প্রতিবাদ দিৱসৰ দিনা উপবাসে থাকি আহাৰৰ খৰচখিনি আমছুৰ তহবিলত জমা দিবলৈ কর্ণাধাৰ সমিতিয়ে ৰাইজলৈ আহ্বান জনাইছিল। উক্ত প্রতিবাদী দিবসৰ কথা প্রচাৰ হোয়াৰ পাছতেই জাঙুৰ খাই উঠিছিল বিভিন্ন সংবাদপত্র, সংগঠন আৰু বুদ্বিজীৱীসকল। কিছুমানে পোনছাটেই আমছুক বাংলাদেশীৰ সংগঠন বুলি কৈছিল। আন কিছুমানে বাংলাদেশী সংগঠন(আমছু)য়ে অসম আন্দোলনৰ বিৰুদ্বে প্রতিবাদী আন্দোলন কৰিলে তাৰ পৰিণতি ভয়াবহ হ’ব বুলি মুকলি ভাবুকি দিছিল।

           প্রচাৰকার্য কম হোৱাৰ বাবে কর্ণধাৰ সমিতিয়ে প্রতিবাদী দিবসৰ কার্যসুচী ৫ মে'ৰ পৰা ২৬ মে'লৈ পিছুয়াই নিবলৈ চুড়ান্ত সিদ্বান্ত গ্রহন কৰিছিল আৰু পুনৰায় ব্যাপকভাবে প্রচাৰৰ ব্যাৱস্থা কৰিছিল। এনেকৈয়ে আহিল ১৯৮০ চনৰ সেই ঐতিহাসিক দিন ২৬ মে'।

গ্রীস্মকালৰ তীব্র ৰ’দ। এই তীব্র ৰ’দ উপেক্ষা কৰি ২৬ মে'ৰ ৰাতিপুয়াৰ পৰাই সমগ্ৰ অসমৰ সংখ্যালঘু অধ্যুষিত অঞ্চলৰ বাট-পথ লোকে লোকাৰণ্য হ’বলৈ ধৰিলে। স্বতঃস্ফূর্তভাবে ওলাই অহা হাজাৰ হাজাৰ, লাখ লাখ ছাত্র, যুৱক, কৃষক, শ্রমিক, শিক্ষিত, অশিক্ষিত লোকেৰে পৰিপূর্ণ বিশাল বিশাল গণ মিছিল। সকলোয়ে শান্তিপূর্ণ ভাবে শোভাযাত্রা কৰি গৈ স্মাৰকপত্র প্রদান কৰি আন্দোলনৰ কার্য্যসূচী সমাপ্ত কৰাৰ কথা আছিল যদিও বহু ঠাইত এই কার্য্যসূচী বাধাগ্রস্থ হ’ল। বহু ঠাইত শান্তিপূর্ণ শোভাযাত্রাকাৰীৰ ওপৰত জপিয়াই পৰিল উগ্র জাতীয়তাবাদীৰ সৈতে এচাম হিংস্র পুলিচ। নির্মম অত্যাচাৰৰ ফলত তেজেৰে ৰাজপথ ৰাঙলী হৈছিল। পুলিচৰ প্রৰোচিত গুলিচালনাৰ ফলত প্রাণাহুতি দিছিল বহু কেইজনে।

             ২৬ মে' ৰ দিনা লেংটিছিঙাত প্রতিবাদকাৰী জনতাক আগভেটা দি পুলিচে নির্বিচাৰে গুলি চলোৱাৰ ফলত স্কুলীয়া ছাত্র মিজানুৰ ৰহমান আৰু আব্দুছ ছাত্তাৰ নিহত হৈছিল। ইয়াৰ উপৰিও বহুলোক গুৰুতৰ ভাবে আহত হৈছিল আৰু তাৰ ভিতৰত মাজম আলীৰ সোঁ বাহুত গুলী লগাৰ ফলত কাষলতিৰ পৰাই সোঁ হাতখন কাটি পেলোৱা হৈছিল আৰু ইয়াৰ বাবেই তেঁও আজিও এক কর্মহীন পংগুত্বৰ জীৱন নিৰ্বাহ কৰি আছে।

             ২৬ মে'ৰ আটাইতকৈ শোকাবহ ঘটনা ঘটিছিল নামনি অসমৰ বিজনীত। উত্তৰাঞ্চলৰ পৰা হাজাৰ হাজাৰ প্রতিবাদকাৰী ৰাইজ শোভাযাত্রা কৰি দেউকুৰা দলঙৰ ওপৰেৰে আগবাঢ়ি অহাৰ সময়তে দলঙৰ দুই মূৰৰ প্রবেশ পথত সশস্ত্র পুলিচে আগুৰি ধৰি দলঙৰ ওপৰত থকা জনতাৰ ওপৰত যধে-মধে গুলিয়াবলৈ ধৰে। ফলত অনিল নমদাস, গোপাল সাহা, নির্মল সৰকাৰ, বজলউদ্দিন শেখ, বিশ্বজিত কুন্ডু, মনিৰুদ্দিন শেখ, ৰমেন সৰকাৰ, শ্রীমন্ত বর্মন, সুবল বাঢ়ৈ আৰু হৰিপদ সাহা নিহত হয়। ইয়াৰ উপৰিও বুকুত গুলী লৈ আৰু তীব্র আতংকত দলঙৰ পৰা তলৰ মেটেকা ভৰা পানীত জপিয়াই পৰি আহত হয় শতাধিক প্রতিবাদকাৰী।

            অকল বিজনী আৰু লেংটিছিঙাতেই নহয়, প্রায় গোটেই অসমতে ২৬ মে’ৰ প্রতিবাদকাৰীৰ ওপৰত নির্বিচাৰ অত্যাচাৰ চলিছিল। ইয়াৰ ভিতৰত বিশেষ ভাবে উল্লেখ কৰিব পাৰি নগাওঁ জিলাৰ ৰুপহী, জুৰীয়া, কামপুৰ আদিৰ কথা। জুৰীয়াত আবেলী পথাৰৰ পৰা ছাগলী আনিবলৈ যোৱা বুঢ়ী এজনী আৰু মকছুদুৰ ৰহমান নামৰ ছাত্র এজনক পুলিছে গুলীয়াই হত্যা কৰিছিল।

              ঐতিহাসিক ২৬ মে'ৰ গণ আন্দোলনত বহুকেইজন শ্বহীদ হ’ল আৰু আহত হ’ল। সেইদিনাখন বি বি চি লন্ডনৰ পৰা ৰেডিঅ' যোগে প্রচাৰ হ’ল যে অসমত বিদেশীৰ নামত চলা নির্য্যাতনৰ কবলৰ পৰা ৰক্ষা পাবলৈ সংখ্যালঘুসকলে প্রতিবাদী আন্দোলনত জপিয়াই পৰিছে। এইদৰে ১৯৮০ চনৰ ২৬ মে'ৰ জৰিয়তে সংখ্যালঘু আন্দোলনে ৰাষ্ট্ৰীয় আৰু আন্তঃৰাষ্ট্ৰীয় পর্যায়ত প্রাসংগিকতা লাভ কৰিবলৈ সক্ষম হৈছিল৷

—সাজাহান আলী আহমেদ

শিক্ষা আৰু আলোচনী সম্পাদক, আমছু

(বিঃদ্ৰঃ মোৰ তথ্য সংগ্ৰহত যদি কোনোবা মহান শ্বহীদৰ নাম বাদ পৰিছে অনুগ্ৰহ কৰি মোৰ 9401916223 নম্বৰৰ ৱাটচএপত দিয়ে যেন৷)

Read More

বিজেপিৰ বৰঘৰৰ পৰাই কংগ্ৰেছৰ জনজাগৰণ

বিজেপিৰ প্ৰতাৰণাৰ বিৰুদ্ধে কংগ্ৰেছৰ জনজাগৰণ সভা

মোডী মিথ্যাচাৰী, প্ৰতাৰক, সর্বকালৰ ব্যর্থ প্রধানমন্ত্রীঃ চিপি যোশী

এনআৰচিৰ পৰা প্রকৃত ভাৰতীয়ক বাদ দিয়াৰ ষড়যন্ত্র বিজেপিৰঃ তৰুণ গগৈ 

এআইইউডিএফত প্রবল খহনীয়া : ২ সহস্ৰাধিকাৰ কংগ্ৰেছত যোগদান

        বিজেপিৰ ৰাজ্যিক সভাপতি তথা সৰভোগৰ বিধায়ক ৰঞ্জিত কুমাৰ দাসৰ গৃহ চহৰ বৰপেটাৰােডৰ পৰাই কংগ্ৰেছে জনজাগৰণ আৰম্ভ কৰে৷ বিজেপি নেতৃত্বাধীন কেন্দ্রীয় চৰকাৰৰ তৃতীয় আৰু ৰাজ্য চৰকাৰৰ প্ৰথম বর্ষপূর্তি অনুষ্ঠানৰ প্ৰাকক্ষণত ভাৰতীয় জাতীয় কংগ্ৰেছে বিজেপিৰ প্ৰতাৰণাৰ বিৰুদ্ধে কংগ্ৰেছে এই জনজাগৰণ সভা অনুষ্ঠিত কৰে।বৰপেটা জিলা কংগ্ৰেছ কমিটীৰ সভাপতি শান্তনু শৰ্মাৰ সভাপতিত্বত অনুষ্ঠিত জনজাগৰণ সভাত উপস্থিত থাকি ভাৰতীয় জাতীয় কংগ্ৰেছৰ সাধাৰণ সম্পাদক চি পি যোশীয়ে উপস্থিত থাকি নিজৰ ভাষণত প্রধানমন্ত্রী নৰেন্দ্ৰ মোডীক সৰ্বকালৰ ব্যর্থ প্রধানমন্ত্রী বুলি আখ্যায়িত কৰে। যোশীয়ে লগতে কয়— নির্বাচনৰ পূর্বে মোডীয়ে আচ্ছে দিনৰ কথা কৈছিল যদিও ব্যাপক হাৰত মূল্যবৃদ্ধি হােৱাৰ লগতে নির্বাচনৰ পূর্বে প্রতি বছৰে দুই কোটিকৈ নিবনুৱাক সংস্থাপন দিয়া হ’ব বুলি প্রতিশ্রুতি দিছিল যদিও তিনিবছৰে মাত্র দুই লাখমান সংস্থাপন প্রদান কৰি ভাৰতৰ ৰাইজক প্ৰতাৰণা কৰাৰ লগতে বিমূদ্রাকৰণ কৰি ৰাইজক মাধ্যমাৰ শোধাইছে বুলি উল্লেখ কৰে। তেওঁ ক’লা ধন ঘূৰাই অনাৰ ক্ষেত্ৰত দম্ভালি মাৰিছিল যদিও মনমোহন সিঙে মোবীতকৈ অদিক ক’লা ধন ভাৰতলৈ আনিবলৈ সক্ষম হৈছিল বুলি উল্লেখ কৰে।

অসমৰ প্ৰাক্তন মুখ্যমন্ত্রী তৰুণ গগৈয়ে জনজাগৰণ সভাত উপস্থিত থাকি প্রধানমন্ত্রী মােডী, মুখ্যমন্ত্রী সোনােৱাল আৰু একালৰ সতীর্থ হিমন্তক কঠোৰ ভাষাৰে সমালোচনা কৰে। স্বভাৱ সুলভ ভঙ্গিমাৰে প্রাক্তন মুখ্যমন্ত্রী গৰাকীয়ে নিজৰ বক্তব্যত কয় যে— বিজেপি নেতৃত্বাধীন অসম চৰকাৰে ৰাষ্ট্ৰীয় নাগৰিকপঞ্জীৰ পৰা ভাৰতীয় লোকৰ নাম কর্তন কৰাৰ অভিসন্ধি ৰচনা কৰিছে আৰু কংগ্ৰেছে শুভাৰম্ভ কৰা নাগৰিপঞ্জীৰ কাম মন্থৰ কৰি তুলিছে। তেওঁ লগতে কংগ্ৰেছৰ দিনত আৰম্ভ কৰা প্ৰতিটাে কামত ক’লা-বগা ৰহন সানিছে আৰু উদ্বোধন কৰি ৰাইজৰ বাহঃ বাহঃ লোৱাৰ অপচেষ্টা কৰিছে। বর্তমানৰ চৰকাৰৰ দিনত মাটিৰ খাজনা বৃদ্ধি পাইছে, অত্যাৱশ্যকীয় সামগ্ৰীৰ অশ্বাভাৱিক মূল্যবৃদ্ধি ঘটিছে, কর্মসংস্থাপন লোপ পাইছে, কৃষকে আত্মহত্যা কৰিব লগা হৈছে বুলি অভিযোগ উত্থাপন কৰাৰ লগতে বর্ষপূর্তি অনুষ্ঠানৰ নামত স্থানীয় বন্ধ ঘোষণা কৰা কার্যকে তেওঁ কঠোৰ সমালোচনা কৰে। তেওঁ লগতে নমামি ব্ৰহ্মপুত্ৰৰ নামত ৰাজভড়ালৰ ধনৰ অপব্যৱহাৰ কৰা বুলিও অভিযোগ উত্থাপন কৰে৷ ইয়াৰ সলনি এই ধন গৰাখহনীয়া প্ৰতিৰােধৰ ক্ষেত্ৰত ব্যৱহাৰ কৰিলে অধিক লাভালাভ হ’লহেঁতেন বুলি তেওঁ কয়। তৰুণ গগৈয়ে লগতে প্রশ্ন উত্থাপন কৰি কয় যে— দুনীতিৰ বিৰুদ্ধে শ্ল’গান দিয়া চৰকাৰে বৰ্ষপূর্তি অনুষ্ঠানৰ নামত কোটি কোটি টকা ক’ৰ পৰা ব্যয় কৰিলে সেই কথা ৰাজহুৱা কৰক। বিজেপিয়ে ইমান টকা গছৰ পৰা পায় নেকি বুলি তেওঁ কটাক্ষ কৰে। কংগ্রেছত থকাৰ সময়ত দুনীতি কৰা বুলি সমদল উলিওৱা নেতা বিজেপিত যোগদান কৰিলেই পবিত্ৰ হৈ যায় বুলি কৈ একালৰ সতীর্থ, বিত্ত, শিক্ষা-স্বাস্থ্য মন্ত্রী হিমন্ত বিশ্ব শর্মাক কঠোৰ ভাষাৰে সমালোচনা কৰে। ৰাজ্যৰ বর্ষীয়ান নেতা গৰাকীয়ে মহাত্মা গান্ধীক নাথুৰামৰ জড়িয়তে স্বাধীনতা সংগ্ৰামত কোনো অৱদান নথকা আৰ.এছ.এছে হত্যা কৰিছিল বুলি বিস্ফোৰক মন্তব্য আগবঢ়ায়। তেওঁ লগতে আৰ এছএছক সমালোচনা কৰি মুছলমানক ঘূণা কৰাজন প্রকৃত হিন্দু নহয় বুলিও মন্তব্য আগবঢ়ায়।

       অসম প্রদেশ কংগ্ৰেছ কমিটিৰ সভাপতি, সাংসদ ৰিপুন বৰাইয়ো নিজৰ ভাষণত পৰিৱৰ্তনৰ শ্ল’গান দি ৰাইজক বিভ্রান্ত কৰি ভোট আদায় কৰাৰ লগতে জাতি, মাটি, ভেটি ৰক্ষাৰ নামত আৰু দুনীতি, প্ৰদূষণ, বিদেশী মুক্ত অসম গঢ়াৰ মিছা সপোন দেখুৱাই বিজেপিয়ে ক্ষমতা দখল কৰিলে যদিও প্রতিশ্রুতি অনুসৰি কোনো এটা কামেই কৰিব নোৱাৰিলে বুলি বিস্ফোৰক মন্তব্য কৰে। আনকি বিজেপি চৰকাৰে ধৰ্মৰ নামত মেৰু বিভাজন কৰি হিন্দু বাংলাদেশীক নাগৰিকত্ব দিয়াৰ বাবেহে কাম কৰি আছে বুলিহে উল্লেখ কৰে৷

সভাত উপস্থিত থাকি প্রাক্তনমন্ত্রী ৰকিবুল হুছেইনে কয় যে উচ্ছেদৰ নামত গৰাখহনীয়াৰ কবলত পৰা লোকসকলৰ শেষ আশ্রয়স্থল ভাঙি দি বিজেপিয়ে বন্য উল্লাস কৰা বুলি ভৎসৰ্না কৰে। তেওঁ হিমন্ত বিশ্ব শৰ্মাৰ নাম উল্লেখ নকৰাকৈ জনসংখ্যা নীতিৰ নামত শৰ্মাই প্রদান কৰা মন্তব্যৰ তীব্র সমালোচনা কৰে। দুজনতকৈ অধিক সন্তান জন্ম দিয়া লোকে নির্বাচনত অংশ ল’ব নােৱাৰিব বুলি কৰা মন্তব্যক উভতি ধৰি হিমন্ত বিশ্ব শৰ্মা গৰুৰ চাৰি নম্বৰ ল’ৰা বুলি কটাক্ষ কৰাৰ লগতে তেওঁ এনে বেবেৰিবাং মন্তব্য দিয়াৰ আগত নিজে বিধায়কৰ পৰা পদত্যাগ কৰিব লাগে বুলি দাবী কৰে। হুছেইনে লগতে এতিয়া পুৱাৰ ভাগতেই মদৰ দােকান খুলি ৰাইজক মদৰ প্রতি আকৃষ্ট কৰিব বিচাৰিছে যাতে ৰাইজে মদৰ ৰাগিত মাতাল হৈ চৰকাৰৰ অপকৰ্মবােৰ চাব নােৱাৰে বুলি মন্তব্য আগবঢ়ায়। কংগ্ৰেছৰ শাসন কালত নির্মান কার্য আৰম্ভ হােৱা ধলা-শদিয়াৰ দলঙেৰে নিৰাপত্তাৰ দােহাই দি প্রাক্তন মুখ্যমন্ত্রী তৰুণ গগৈক উভতাই পঠোৱা আৰু বিজেপিৰ তিনিগৰাকী বিধায়কে তাৰ পিছত দলং খনলৈ গৈ ছেলফি উঠা কার্যক বিজেপিৰ অসহিষ্ণুতা প্রকাশ পায় বুলি বক্তব্যত উল্লেখ কৰে।
       ইয়াৰোপৰি সভাত বিধায়িনি দলৰ দলপতি দেবব্রত শইকীয়া,প্রাক্তন মন্ত্রী ডঃ নজৰুল ইছলাম, বিধায়ক শুকুৰ আলী, ওৱাজেদ আলী চৌধুৰী, আব্দুল খালেক, শ্বেৰমান আলী আহমেদ, জাকিৰ হুছেইনকে আদি কৰি ৰাজ্যিক পর্যায়ৰ ভালে কেইগৰাকী নেতাই উপস্থিত থাকি বিজেপিৰ প্ৰতাৰণাৰ বিৰুদ্ধে ভাষণ আগবঢ়ায়।
বৰপেটাৰােডৰ ডঃ ভূপেন হাজৰিকা ময়দান (পৌৰসভা)ত দিনৰ ১ বজাৰ পৰা অনুষ্ঠিত হােৱা সভাখনত নামনি অসমৰ বিভিন্ন প্রান্তৰ পৰা প্রায় ২০ সহস্রাধিক ৰাইজে অংশ গ্রহণ কৰাৰ লগতে আছু, অগপ, এআইইউডিএফৰ লগতে বিভিন্ন দল সংগঠনৰ প্ৰায় ২ সহস্ৰাধিক লোকে আজি গামোচা লৈ দলত যোগদান কৰে।

Published: Sangbad Prahari

Dainik Gana Adhikar

Read More

ওপৰৱালাৰ দোষত পথাৰত পতন !

বৰপেটাৰােডত ইৰি ধানত পতান, উদাসীন কৃষি বিভাগ

কলগাছিয়াৰ পাছত এইবাৰ বৰপেটাৰৰােডৰ কৃষকৰ মাজত সৃষ্টি হৈছে হাহাকাৰ। বৰপেটাৰােডৰ সমীপৱতী বাক্সা জিলাৰ আইখাৰী বিলৰ পথাৰ গাওঁৰ শতাধিক কৃষকে ইৰিধানৰ খেতি কৰি মূৰে-কপালে হাত দিব লগা হৈছে। বৰপেটাৰােডৰ বীজভাণ্ডাৰৰ পৰা আমেৰিকাৰ ‘এডভান্টা” কোম্পানীৰ পি এ চি ৮৩৭ নামৰ বৰ্ণসংকৰ ধানৰ বিধান ক্রয় কৰি বিঘায় বিঘায় ধান খেতি কৰিছিল কৃষকসকললে। প্ৰথমাৱস্থাত ধান খেতি লহপহকৈ বাঢ়ি অহা দেখি কৃষকসকলে আনন্দত আত্মহাৰা হৈ পৰিছিল যদিও সঁচ উলোৱাত কৃষকসকলে নিশ্চিত হ’ল যে পথাৰত ধানৰ সলনি পতানে গ্রাস কৰিছে সমগ্র ইৰি ধানৰ খেতি। অতি দৰিদ্ৰ কৃষকসকলে গাঁঠিৰ ধন ব্যায় কৰাৰ লগতে সুতত টকালৈ কঠোৰতম পৰিশ্ৰমেৰে ধান খেতি কৰিছিল যদিও পথাৰত ধানৰ সলনি পতান হােৱা বাবে কৃষকে মূৰে-কপালে হাত দিব লগা হৈছে। বিগত বর্ষতো একে কোম্পানীৰ ধানৰ খেতি কৰাৰ ফলত কলগাছিয়া অঞ্চলৰ প্ৰায় ৮ সহস্রাধিক কৃষকে প্রায় ৪ কোটি টকাৰ লোকচান ভৰিব লগা হৈছিল যদিও কৃষিপ্রধান ৰাজ্যখনৰ বিয়াগোম কৃষি বিভাগৰ চকুমোদা কুলিৰ ভাওঁ ধৰা কার্যই এইবেলিও হাজাৰ হাজাৰ কৃষকৰ প্ৰবল ক্ষতি কৰাৰ সুবিধা পাইছে। এইখিনিতে উল্লেখ কৰিব পাৰি যে বিগত বৰ্ষত ধানৰ পতন হােৱা বাবে কৃষকসকলে এই ধানৰ খেতি নকৰাৰ সিদ্ধান্ত লৈছিল যদিও বীজভাণ্ডাৰ সমূহে এইবেলি উন্নত আৰু ভাল ধানৰ বিধান’ অহা বুলি কৈ কৃষকসকলক এই ধানৰ খেতি কৰাৰ বাবে উৎসাহিত কৰিছিল। মন কৰিবলগীয়া যে পুঁজিপতি কোম্প পানীবােৰে কৃষকক লুটি খোৱাৰ মানসেৰে শিক্ষিত নিবনুৱা যুৱকসকলক উচ্চ দৰমহাৰে চাকৰি দি কৃষকসকলক ভুল পথে পৰিচালিত কৰি আহিছে। কোম্পানীৰ দৰমহা ভোগী ভৃত্য আৰু কোম্পানীৰ ‘ডিলাৰশ্বিপ’ লোৱা বীজভাণ্ডাৰৰ গৰাকীসকলে অধিক লাভৰ অংকৰে কৃষকসকলক সর্বস্বােন্ত কৰি আহিছে। যদিও বিয়াগোম কৃষি বিভাগে কুম্বকৰ্ণ নিদ্ৰাত নিদ্ৰিত হৈ আছে।

বৰপেটাৰােডৰ দাতি কাষৰীয়া অঞ্চলৰ কৃষকসকলে উৎপাদিত সামগ্ৰীৰ উপযুক্ত বজাৰ মূল্য নাপাই আত্মহত্যা কৰাৰ দৰে ঘটনা সংঘটিত হােৱাৰ পাছতো সংশ্লিষ্ট কৃষি বিভাগে কোনাে ধৰণৰ কাৰ্যকৰী ব্যৱস্থা গ্রহণ নকৰাত এইবাৰ পথৰ ভিক্ষাৰীত পৰিণত হ’বলৈ আগবাঢ়িছে আইখাৰীৰ কৃষকসকলে। প্রনিধানযোগ্য যে গাঁৱে গাঁৱে গৈ কৃষকৰ মাটি পৰীক্ষা কৰা, কৃষকক খেতি কৰাৰ প্ৰণালী সম্পর্কে প্রশিক্ষণ দিয়াৰ বাবে চৰকাৰে গ্ৰামসেৱক নিয়োগ কৰিছে। যদিও বিভাগটােৱে কুম্ভকৰ্ণ নিদ্ৰাত থকা দেখি জিলা পর্যায়ৰ বিষয়াৰ পৰা আৰম্ভ কৰি গ্ৰামসেৱকসকলেও মাত্র কার্যালয় কক্ষত বহি মাহেকৰ মূৰত দৰমহা গোটােৱাহে পৰিলক্ষিত হয়। উল্লেখ্য যে অধিক উৎপাদনৰ আশাত উন্নত জাতৰ ধান ৰােপন কৰাৰ পাছত পথাৰত পতান হােৱাৰ ফলত কৃষকসকলে বৰপেটাৰােডৰ সংশ্লিষ্ট বীজভাণ্ডাৰলৈ গৈ এনেকুৱা কিয় হ’ল বুলি জানিব বিচৰাত ‘এয়া ওপৰৱালাৰ কৰণীয়’ বুলি কৈ খেদি পঠায় বুলি কৃষকসকলে জানিব দিছে। এতিয়া প্রশ্ন হয় বৰপেটাৰােডৰ কৃষকসকলে ‘ওপৰৱালা” অৰ্থাৎ সৃষ্টিকর্তক ধিয়াই অনাহৰে নিশা যাপন কৰিব নে ৰাজ্যৰ বিয়াগোম কৃষি বিভাগে কাণসাৰ দিব সেয়া নিশ্চিত ভাবে লক্ষণীয় হ’ব।

LINK: http://www.ganaadhikar.com/18052017/page1.html

Read More

ভেকচিন বিতৰ্ক অন্ত পৰক

      আজিৰ তাৰিখত সমগ্ৰ নামনি অসমত সৰ্বাধিক বিতৰ্ক আৰু আতঙ্কৰ বিষয়বস্তু হৈ পৰিছে বিদ্যালয়ত দি থকা চৰকাৰী বিশেষ প্ৰতিশেধক ছিটা বা ‘ভেকচিন’৷ এই বিতৰ্ক ইমানেই বিয়পি পৰিছে যে কণ কণ ছাত্ৰ-ছাত্ৰী বিদ্যালয়লৈ যাবলৈ ভয় কৰিবলৈ আৰম্ভ কৰিছে৷ অভিভাৱক সকলে ছাত্ৰ-ছাত্ৰীক বিদ্যালয়লৈ পঠিয়াবলৈ ভয় কৰিব লগা হৈছে৷ চৰকাৰী-বেচৰকাৰী সকলো বিদ্যালয়তে আতঙ্কৰ পৰিৱেশে বিৰাজ কৰিছে৷ বিগত প্ৰায় তিনি-চাৰি দিনৰ পৰা এই বিতৰ্কই সৰ্বসাধাৰণ ৰাইজৰ পৰা আনকি শিক্ষিত সমাজকো জোকাৰি গৈছে৷ বিদ্যালয়ৰ পৰা ছাত্ৰ-ছাত্ৰী আনকি খিৰিকি ভাঙি পলাই যোৱাৰ দৰে জঘন্য ঘটনাও সংঘটিত হৈছে৷ ব্যক্তিগত খণ্ডৰ বিদ্যালয়বোৰতো এই অপপ্ৰচাৰে ব্যাঘাত জন্মাইছে৷ কিছুমান বিদ্যালয়ত টেষ্ট পৰীক্ষা বাতিল কৰিব লগা হৈছে৷

       মোবাইলত সঘনে ফোন আহিবলৈ আৰম্ভ কৰিছে, নিশা ১২ টা লৈকে মানুহক বুজাব লগা হৈছে৷ মানুহ আতঙ্কিত আৰু ভিতিগ্ৰস্থ৷ চৰকাৰে প্ৰদান কৰা এই বেজী বা ভেকছিন গ্ৰহণ কৰিলে ল’ৰা বা ছোৱালীয়ে প্ৰপ্ত বয়স্ক হ’লে সন্তান জন্ম দিয়াৰ ক্ষমতা হেৰাই পেলাব আৰু সংখ্যালঘুৰ অশ্বাভাৱিক জনসংখ্যা বৃদ্ধি নিয়ন্ত্ৰণ কৰাৰ বাবে চৰকাৰে এনে ব্যৱস্থা লোৱা বুলি ভূৱা প্ৰচাৰ চলিবলৈ আৰম্ভ কৰিছে৷ প্ৰচাৰ ভূৱা হ’লেও ইমানেই শক্তিশালী ৰূপত বিয়পি পৰিছে যে অসমৰ ৰাজধানী চহৰতো এনেবোৰ কাৰণত বিদ্যালয়ৰ পাঠদান স্থবিৰ হৈ পৰিছে৷ 

        জানিব পৰা মতে জাপানীজ এনকেফেলাইটিছ ৰোগৰ পৰা ভৱিষ্যত প্ৰজন্মক সুৰক্ষিত কৰাৰ বাবে চৰকাৰে ‘বিশ্ব স্বাস্থ্য সংস্থা’ চমুকৈ WHO ৰ পৰা অনুমোদন অনুযায়ী চীনৰ পৰা এই ভেকছিন সমূহ বিজ্ঞানসন্মত ভাবে প্ৰায় প্ৰতিবছৰে কঢ়িয়াই আনি শিশুসকলক প্ৰদান কৰে৷ এই সমগ্ৰ প্ৰক্ৰিয়া সম্পূৰ্ণ সুৰক্ষিত আৰু নিৰ্ভৰযোগ্য৷ কিন্তু এনে নিৰ্ভৰযোগ্য বিষয় এটাও চৰম অস্বস্তিকৰ পৰ্যায়লৈ অৱনমিত হোৱাটো নিশ্চিত ভাবে উদ্দেশ্য প্ৰনোদিত হ’ব লাগিব৷

        এই বিতৰ্ক কিয় হ’ল ঃ এই বিতৰ্কৰ ফলত বিদ্যালয় সমূহ আটাইতকৈ অধিক ক্ষতিগ্ৰস্থ হৈছে৷ যিবোৰ বিদ্যালয় ক্ষতিগ্ৰস্থ হৈছে সেইবোৰৰ প্ৰায় এশ শতাংশ বিদ্যালয় সংখ্যালঘু অঞ্চলত৷ আধুনীক বিশ্বত এনে উৰাবাতৰিত ভোল গৈ সংখ্যালঘু অঞ্চলৰ ৰাইজে নিজৰ সন্তানক বিদ্যালয়ৰ পৰা আতৰাই ৰখাৰ কাণ্ডই অসমৰ সংখ্যালঘুলোকসকল অন্ধ বিশ্বাসী বুলি প্ৰতিপন্ন কৰিলে৷

        পলিঅ’ৰ পৰা আৰম্ভ কৰি চৰকাৰী প্ৰায় প্ৰতিটো আঁচনি অথবা চৰকাৰৰ বছৰেকীয়া হিচাপ, চৰকাৰী কাৰ্যসূচী আদিৰ বিষয়ে ৰাজ্য বা কেন্দ্ৰীয় চৰকাৰে বাতৰি কাকত, দুৰদৰ্শন আদিৰ জৰিয়তে বহূল প্ৰচাৰৰ ব্যৱস্থা কৰা হয়৷ কিন্তু জাপানিজ এনকেফেলাইটিছৰ দৰে ভয়াবহ বেমাৰৰ পৰা ৰক্ষা পোৱাৰ ভেকছিন সম্পৰ্কে কোনো প্ৰচাৰ বা সজাগতাৰ সৃষ্টি কৰা পৰিলক্ষিত নহ’ল৷

          ভেকছিন প্ৰদান কৰা সন্ধৰ্ভত উৰাবাতৰি প্ৰচাৰ হোৱাৰ দুদিনমান পূৰ্বে ৰাজ্যৰ স্বাস্থ্য, শিক্ষা আৰু বিত্তমন্ত্ৰী হিমন্ত বিশ্ব শৰ্মাই সংখ্যালঘুসকলৰ জনসংখ্যা নিয়ন্ত্ৰণ কৰাৰ বাবে চৰকাৰে বিশেষ ব্যৱস্থা গ্ৰহণ কৰিব বুলি সংবাদ মাধ্যমত বক্তব্য প্ৰদান কৰিছিল৷ কোৱা বাহুল্য যে আজিৰ তাৰিখত হিমন্ত বিশ্ব শৰ্মাৰ বক্তব্য আৰু কাম-কাজত সংখ্যালঘুসকল আতঙ্কিত হৈ পৰে৷ তাৰ কাৰণো আছে৷ তেখেতে মাদ্ৰাছা বোৰ্ড, চৰ উন্নয়ন বোৰ্ড আদি বিলুপ্তিকৰণৰ দৰে কথাবোৰ প্ৰকাশ কৰি চৰকাৰখন যে সংখ্যালঘু পৰিপন্থী সেই কথা বহুল ভাবে প্ৰচাৰ কৰি আহিছে৷ নাগৰিকত্বৰ সমস্যাৰ লগতে এশএবুৰি সমস্যাৰে ভাৰাক্ৰান্ত সংখ্যালঘুসকলে হিমন্ত বিশ্ব শৰ্মাৰ ছাঁটোকে ভয় কৰিবলৈ আৰম্ভ কৰিছে৷

          আতংকিত জনসাধাৰণৰ মাজত ভেকছিন আতঙ্ক সোমাই দি চৰকাৰী বিফলতাৰ কথা ঢাকিবলৈ যত্ন কৰা বুলি ক’লেও অযুক্তিকৰ নহ’ব৷ কাৰণ ৰাজ্যত বাকী নালাগে বানপানীৰ বতৰ আহি পালে যদিও ৭০ শতাংশ মথাউৰিৰ মেৰামতিৰ কাম কৰা হোৱা নাই৷ ৰাজ্যৰ ভিন্ন প্ৰান্তত আধাৰশিলা স্থাপন হৈছে যদিও ৰাস্তা-ঘাটৰ পৰা আৰম্ভ কৰি উন্নয়নমূলক কামবোৰ হৈ উঠা নাই৷ ইফালে গুৱাহাটীত হ’ব লগীয়া কেন্দ্ৰীয় চৰকাৰৰ তৃতীয় বৰ্ষপূৰ্তিৰ সামৰণি অনুষ্ঠানৰ দিন চমু চাপি আহিছে৷ চৰকাৰী ব্যৰ্থতাৰ কথা-বতৰাৰ পৰা ৰাইজক বিতৰ্কৰ মাজত ঠেলি দি সংবাদ মাধ্যমৰ পৰা আৰম্ভ কৰি সকলো মাধ্যম ব্যস্ত ৰখাৰ বাবে এইটো এটা চৰকাৰী ষড়যনত্ৰ হ’ব পাৰে বুলি সন্দেহ কৰাৰ থল আছে৷

          বিয়াগোম চৰকাৰী স্বাস্থ্য বিভাগ যে ব্যৰ্থ হৈছে সেই কথা ইমিমধ্যে ৰাইজে বুজি পাইছে৷ ৰাজ্যৰ কোনো এখন চিকিৎসা মহাবিদ্যালয় আৰু চৰকাৰী স্বাস্থ্য কেন্দ্ৰত পৰ্যাপ্ত পৰিমাণে ডাক্তৰ, ঔষধ আৰু আধুনীক যন্ত্ৰ-পাতি নাই৷ চৰকাৰী চিকিৎসালয়ৰ প্ৰতি ক্ৰমশঃ মানুহৰ আস্থা হেৰুৱাবলৈ আৰম্ভ কৰিছে৷ এই বিতৰ্কই মানুহক অধিক আতঙ্কিত কৰি তুলিছে ফলত মানুহে চৰকাৰী ভেকছিন, ঔষধ আদি গ্ৰহণ কৰিবলৈ ভয় কৰিবলৈ আৰম্ভ কৰিছে৷ ইয়াৰ পৰা আওপকীয়াকৈ চৰকীৰৰ লাভ হ’ব৷ বিনামূলীয়া ঔষধ বা চিকিৎসা সেৱাৰ প্ৰতি ৰাইজৰ আগ্ৰহ কমি গ’লেই চৰকাৰৰ বিয়াগোম বিভাগবোৰে স্বাস্থ্য বিভাগ লুটি খাব পাৰিব৷

         এনেকুৱাও হ’ব পাৰে যে ভেকছিন আতঙ্ক বিয়পাই দিয়াসকল চিকিৎসাৰ ব্যৱসায়ৰ লগত জড়িত৷ চৰকাৰী ঔষধৰ প্ৰতি মানুহৰ আস্থা হেৰুৱাই পেলালে ব্যক্তিগত কণ্ডৰ চিকিৎসা সেৱাৰ লাভা-লাভৰ অংক বৃদ্ধি পাব৷ সকলোৱে জানে যে চিকিৎসা আৰু শিক্ষাৰ ব্যৱসায় আটাইতকৈ লাভজনক৷

           এই সমস্ত বিতৰ্ক উৰ পেলাবৰ বাবে ৰাজ্য চৰকাৰে ইচ্ছা কৰা হ’লে মাত্ৰ কেই ঘন্টাৰ ভিতৰতে ব্যৱস্থা গ্ৰহণ কৰিব পাৰিলে হেঁতেন যদিও ৰাজ্যৰ স্বাস্থ্য-শিক্ষা মন্ত্ৰী আৰু মুখ্যমন্ত্ৰী গৰাকীয়ে কোনো মন্তব্যই প্ৰকাশ নকৰিলে৷ এনেবোৰ বহু কথা আছে যিবোৰে প্ৰতিপন্ন কৰে যে ভেকছিন বিতৰ্ক হোৱাটো বৰ্তমানৰ ৰাজ্য চৰকাৰে বিচাৰে৷

         এই ছেগতে উল্লেখ কৰিব পাৰি যে এনেধৰণৰ বিতৰ্ক অন্ত পেলাবৰ বাবে ভূৱা প্ৰচাৰ চলোৱা সকলক চৰকাৰে কৰায়ত্ব কৰিব পাৰিলে হেঁতেন যদিও চৰকাৰৰ উদাসীনতা মন কৰিবলগীয়া বিষয় হিচাপে বিবেচিত হৈছে৷

          সেইবাবে ৰাইজ এতিয়া সচেতন হ’ব হৈছে৷ জাপানীজ এনকেফেলাইটিজৰ বীজানু নাইকীয়া কৰাৰ বাবে বৰ্তমানে প্ৰদান কৰি থকা ভেকছিন গ্ৰহণ কৰা অতিকৈ প্ৰয়োজনীয়৷ সেয়েহে এই লেখা পঢ়াসকলে যেন নিজৰ নিজৰ অঞ্চলত এই বিষয়ে সজাগতাৰ সৃষ্টি কৰি ভূৱা প্ৰচাৰৰ অৱসান ঘটায় তাৰ অনুৰোধ কৰিলো৷ 

Read More

ৰাজনীতি

        আন্দোলন কৰি থাকোতেই মন্ত্ৰীৰ ফোন পাই মেহবুবে কিছু পৰিমাণে উৎফুল্লিত হ’ল৷ বহু দিনৰ পৰাই জৰাজীৰ্ণ হৈ থকা আৰু ৰাজপথত পুখুৰীৰ দৰে বৃহৎ বৃহৎ গাত হৈ থকাৰ পিছতো চৰকাৰৰ দৃষ্টিগোচৰ হোৱা নাছিল৷ পথটো মেৰামতি কৰাৰ দাবীত ইতিপূৰ্বে বহু সংগঠনে আন্দোলন কৰিছিল যদিও কোনো ফলাফল লাভ কৰা নাছিল৷ এইবাৰ মেহবুব হঁতে কেইবা হাজাৰ ৰাইজক একত্ৰিত কৰি পথ মেৰামতিৰ দাবীত পথ অৱৰোধ কৰিছিল৷

      মন্ত্ৰীয়ে ফোন কৰি তেওঁলোকৰ সমস্যা সমাধাৰ বাবে আলোচনা কৰাৰ বাবে দিছপুৰলৈ মাতি পঠিয়াইছে৷ তেওঁলোকৰ মাজৰ পৰা ৰাইজৰ প্ৰতিনিধি সহ সৰ্বাধিক ১০ জন আন্দোলনকাৰীক মাতিছে৷

         আন্দোলনৰ কৃতকাৰ্যতাৰ পথ প্ৰসস্থ হোৱা দেখি আৰু মেহবুবৰ মোবাইল মন্ত্ৰীৰ ফোন অহা দেখি সমবেত ৰাইজৰ মাজত উৎসাহ-আনন্দৰ লহৰ উঠিল৷ ‘মেহবুব তামাম ভাল নেতা’ বুলি বিনামূলীয়া প্ৰচাৰ হৈ গ’ল৷ বহু আন্দোলন কৰাৰ পিছতো চৰকাৰৰ গা নলৰা কামটো মেহবুবৰ নেতৃত্বত মাত্ৰ এটা আন্দোলন চলি থকা অৱস্থাতে মন্ত্ৰীৰ ফোন পোৱাটো ডাঙৰ কথা, আন্দোলনৰ প্ৰভাৱ যথেষ্ট বুলি ৰাইজৰ মাজত চৰ্চা হ’বলৈ আৰম্ভ কৰিলে৷

           আলোচনাৰ বাবে ১০ জন লোকক বাছনি কৰি দিলে ৰাইজে৷ নিৰ্ধাৰিত সময়ত আলোচনা অনুষ্ঠিত হ’ল৷ এক এক কৰি প্ৰত্যেকজনৰ কথা মনোযোগেৰে শুনিলে মন্ত্ৰীয়ে৷ 

         ‘ইম্মান অসুবিধাৰ পিছতো মোক কিয় কোৱা নাই, ইছ্... এই অফিচাৰবোৰে মাত্ৰ দৰমহা কেইটাৰ বাবেই কাম কৰে, চিন্তা কৰিব নালাগে অহা ৭ দিনৰ ভিতৰত কামটো আৰম্ভ হৈ যাব৷ আৰু মই নিজে যাম কামটো আৰম্ভ কৰি দিয়াৰ বাবে৷’— মন্ত্ৰীয়ে তেওঁলোকক ক’লে৷ মন্ত্ৰীয়ে মুখেৰে কোৱাই নহয়, তেওঁলোকৰ সন্মুখতেই অৰ্ডাৰ কপি উলিয়াই বিভাগলৈ ফেক্স কৰি দিয়া হ’ল৷ 

          আলোচনাত অংশ লোৱা সকলোকে বহু সন্মান কৰিলে মন্ত্ৰীয়ে, কেইবাবাৰো ফিকা চাহৰ জ্যোতি দিছে৷ আৰু সকলোৰে সন্মুখতেই মন্ত্ৰীয়ে মেহবুবৰ পিঠিত হাত দি ক’লে— ‘মোক তুমি নিজৰ দাদাৰ দৰেই ভাবিব পাৰা, কিবা প্ৰয়োজন হ’লেই মোক ফোন কৰিবা৷ জানাইতো আন্দোলন কৰি লাভ নাই, আলোচনাৰেহে সমস্যাৰ সমাধান হয়৷ তোমালোকেই ক’লা যে ইয়াৰ আগত বহুবাৰ আন্দোলন কৰা হৈছে, কামটো হোৱা নাই৷ এইবাৰ কথাটো মই জানিলো বাবেহে......৷ বিশেষ চিন্তা কৰিব নালাগে মাত্ৰ এইটো পথেই নহয়, যিকোনো ৰাজহুৱা অসুবিধা হ’লেই তুমি মোক ডাইৰেক্ট যোগাযোগ কৰিবা৷’ কথাখিনি কৈ মন্ত্ৰীয়ে তেওঁলোকক বিদায় দিলে৷ তেওঁলোক মন্ত্ৰীৰ কোঠাৰ পৰা উলাইছিল হে মাত্ৰ তেনেতে মন্ত্ৰীয়ে পুনৰ মেহবুবক মাতিলে৷ ছাৰৰ মাত শুনি মেহবুব পুনৰায় কোঠাৰ ভিতৰলৈ সোমাই গ’ল৷ 

         বিছনাৰ তলৰ পৰা কেইটামান ২ হেজাৰ টকীয়া টকাৰ ভাণ্ডিল মেহবুবৰ হাতত তুলি দি মন্ত্ৰীয়ে ক’লে— চাহ-পানী খাবা৷ বাকীখিনি তোমাৰ বাবে৷ শুনিছো তুমি বহু কষ্ট কৰি ৰাইজৰ বাবে কাম কৰি আছা৷ খৰচা-পাতি লাগে....৷ আগলৈ প্ৰয়োজন হ’লে মোক ক’বা৷ ...... আৰু হেৰি নহয়, তোমালোকৰ ফালে বুলে আমাৰ একেবাৰে জনপ্ৰিয়তা নাই!— কথাষাৰ শেষ কৰি মন্ত্ৰীয়ে মেহবুবৰ মুখলৈ চালে৷ তেওঁ অপ্ৰস্তুত ভাবে ধৰো-নধৰো কৈ টকাখিনি হাতত লৈ একপ্ৰকাৰ জড়পদাৰ্থ হৈ পৰিছিল৷— হে তুমি বিৰাট লাজ কৰা হে, থৈ দিয়া৷ আৰু এইখিনি লোৱা, তোমাৰ লগত অহাসকলক লৈ ভাল হোটেলত ভাত-ছাত খাই ল’বা৷— মন্ত্ৰীয়ে এইবাৰ অতিৰিক্ত ১০ হাজাৰ টকা দিলে৷ 

        ছাৰে কি ক’লে নো ?— ওলাই অহাৰ পিছত সকলোৱে তেওঁক আগুৰি ধৰিলে৷ তেওঁ ১০ হাজাৰ টকা দেখুৱাই ভাত খোৱাৰ পইচা দিয়া বুলি ক’লে৷

        কথামতেই এসপ্তাহৰ ভিতৰত ৰাস্তাৰ মেৰামতিৰ কাম আৰম্ভ হ’ল৷ কাম উদ্ভোধন কৰিবলৈ মন্ত্ৰী আহিল আৰু মন্ত্ৰীয়ে মেহবুবৰ ঘৰত ‘লান্স’ কৰিলে৷ গাওঁৰ মানুহৰ মাজত অধীৰ অানন্দৰ বন্য ববলৈ ধৰিলে৷ তেওঁলোকৰ মৰমৰ মেহবুবক মন্ত্ৰীয়ে বিৰাট ভাল পায়৷ মন্ত্ৰীক এবাৰ লগ পোৱাটো ডাঙৰ ভাগ্য বুলি ভৱাসকলে মেহবুব ডাঙৰ নেতা হ’ল বুলি নিশ্চিত হ’ল৷ বহুতেই কোৱা-কোৱি আৰম্ভ কৰিলে যে মেহবুবৰ লগত মুখ্যমন্ত্ৰীৰ লগতো ভাল চিনাকি আছে বুলি৷ 

          মেহবুবৰ এটা ফোনকলতেই ডাঙৰ ডাঙৰ সমস্যা সমাধান হ’বলৈ আৰম্ভ হ’ল৷ মন্ত্ৰীৰ লগত মন গ’লেই কথা পাতিব পাৰে৷ ৰাইজে এতিয়া মেহবুবক নিৰ্ভৰ কৰিব পাৰে৷ তেওঁ যুৱক হিচাপেও ভাল, কাৰো লগত বেয়া ব্যৱহাৰ নকৰে তেওঁ৷ ধনী-দৰিদ্ৰ সকলো তেওঁৰ সন্মুখত সমান৷ প্ৰত্যেকেই তেওঁক যিকোনো কথা খুলি ক’ব পাৰে৷ তেওঁৰ নেতৃত্বত বহু কেইজন দুখীয়া বেমাৰীয়েও বিনামূলীয়া চিকিৎসা লাভ কৰিছে৷ ৰাইজে তেওঁক একপ্ৰকাৰ মন্ত্ৰীৰ দৰে বুলিয়ে ভাবে৷

        পঞ্চায়ত নিৰ্বাচনত কাক টিকট দিব লাগে, কোনে ৰাইজৰ ভাল প্ৰতিনিধি হ’ব পাৰিব— এইসকলো কথা মেহবুবৰ ওপৰতেই নিৰ্ভৰ কৰিবলৈ আৰম্ভ কৰিলে৷ প্ৰাৰ্থীত্ব প্ৰত্যাসীসকলেও মেহবুবক বিচাৰি ঘৰ পাবলৈ আৰম্ভ কৰিলে৷ দুৰ্নীতিমুক্ত সমাজ গঢ়াৰ বাবে মেহবুবহঁতে মনোযোগ দিব লাগিব বুলি মন্ত্ৰীয়ে তেওঁক কৈ দিছে৷ 

          পঞ্চায়ত নিৰ্বাচনত বৃহৎ সাফল্য দেখি মন্ত্ৰীয়ে গাওঁলৈ পুনৰায় আহিল৷ গাওঁৰ আলি-পদূলিবোৰৰ বহু পৰিৱৰ্তন হৈছে৷ মানুহৰ মাজত অসন্তুষ্টিৰ কোনো চিন নাই৷ সমগ্ৰ অঞ্চলৰ উন্নয়নৰ বাবে ‘ভাইটি মেহবুবে’ই মূল মানুহ বুলি ৰাজহুৱা সভাত মন্ত্ৰীয়ে মন্তব্য কৰি ৰাইজৰ হাত চাপৰি লাভ কৰি গুচি গ’ল৷ আৰু কাইলৈ মেহবুবক দিছপুৰলৈ মাতি পঠিয়ালে৷ 

          তোমাৰ জনপ্ৰিয়তা আছে, সংগঠন কৰাতকৈ ৰাজনীতি নকৰা কিয়৷ এতিয়া তোমাক গুৰুত্ব দিয়া বাবে ‘লোকেল’ বিধায়ক লতিফ আৰু দলীয় কৰ্মীবোৰ মোৰ প্ৰতি ক্ষুন্ন হৈ পৰিছে৷ তুমি দলত থাকিলে এইখিনি নহ’ল হেঁতেন৷ ৰাইজৰ উন্নয়নৰ স্বাৰ্থত তুমি দলত যোগ দিয়া৷— মন্ত্ৰীয়ে মাতি নি মেহবুবক বুজালে৷ মেহবুবেও কথাটো বুজি পালে৷ কিন্তু তেওঁ এনে এটা সিদ্ধান্ত লোৱাটো কিমানদূৰ গ্ৰহণযোগ্য হ’ব সেই কথা থিৰাং কৰিব নোৱাৰি কিছু সময় মনে মনে বহি থাকিল৷— ‘তুমি ইমান চিন্তা কৰিব লগা নাই, কি ভাবিছা, তোমালোকৰ মিঞা মানুহে সদায় ক্ষমতাৰ লগত থাকি ভাল পায়৷ তোমাক আদৰণি জনাব, বিৰোধিতা নকৰে৷’— মন্ত্ৰীয়ে পুনৰ ক’লে৷ ‘সন্মুখত বিধানসভা নিৰ্বাচন, তুমি চিন্তা কৰিব নালাগে৷’
            শেষত দুদিনৰ সময় লৈ মেহবুবে গুচি আহিল৷ তেওঁ কি কৰিব এতিয়া! দলত যোগদান কৰিলে ৰাইজে বেয়া নাপায় কাৰণ ইতিমধ্যে মন্ত্ৰীয়ে ৰাইজৰ কাম তেওঁৰ হতুৱাই কৰাইছে৷ হয়তো কাম অলপ বেছিকৈহে কৰিব পাৰিব বুলি তেওঁ ধাৰণা কৰে৷
           ৰাইজমেল পাতি আলোচনাৰ অন্তত মেহবুবৰ লগতে গাওঁৰ শতাধিক লোকে একেলগে দলত যোগদান কৰাৰ প্ৰস্তাৱ গ্ৰহণ কৰিলে৷ সেইমতে সপ্তাহৰ ভিতৰত যোগদান কাৰ্য সমাপনো কৰিলে৷ সঁচাকৈয়ে ৰাইজে তেওঁক বিপূল ভাবে আদৰণি জনালে৷ মেহবুবৰ ওপৰত ৰাইজে বহুখিনি আশা কৰে৷
           মেহবুবে দলত যোগ দিয়াৰ কেইদিনমান পিছতেই স্থানীয় বিধায়ক লতিফৰ নেতৃত্বত মন্ত্ৰীক লগ কৰিবলৈ গাড়ী ভাড়া কৰি মানুহ লৈ যোৱা হ’ল৷ মন্ত্ৰীয়ে হাস্যবদনে লতিফক ক’লে— তহঁতে ৰাজনীতি বুজি নোপোৱা বাবেইতো এইবিলাক পোক-পৰুৱাই কামুৰি থাকে, এতিয়া চাবিচোন, তোৰ বিৰুদ্ধে প্ৰতিবাদ কৰিবলৈ কোনো নাই, একদম ছাফা.....৷— কথাখিনি কৈ মন্ত্ৰীয়ে খিল খিলাই এবাৰ হাঁহিলে৷
ছাৰ আপুনি বোলে মেহবুবক এমএলএ বনায়!— লতিফে ক’লে৷
আৰে জ্বালা (জলকীয়া) খোৱা চৰৰ মিঞা, এই কথাও মূৰত ধৰা নাই৷ তোৰ বিধায়কশ্বিপ ২০ বছৰৰ কাৰণে ‘কনফাৰ্ম’ কৰিবলৈকে ইমান কাম কৰিলো৷ আচল কথাটো কি জানা নে— প্ৰতিবাদী কন্ঠ ৰুদ্ধ কৰিবলৈ হ’লে সেই কন্ঠৰ গৰাকীক বুকুত টানি নিব লাগে, আৰু যদি কাৰোবাক নেতা বনাব লাগে তেন্তে তেওঁক জেললৈ পঠাব লাগে৷ ৰাজনীতিত সত্ৰুক বেছি মৰম কৰিবি...৷

Read More

About

Name: Shajahan Ali Ahmed (সাজাহান আলী আহমেদ)

DOB : 31/12/1988

S.O.- Abdul Monnaf

Village : Aikhari Bilor Pather,

P.O.- Bilashipara Bazar District :  Baksa (Assam) of INDIA.

Writing : Novel, Poem, Short Stories, Articles…

Published Book:

1. “Bisadland Narayanguri” (2015), An analysis book on Narayanguri (BTAD) massacre- 2014.

2. Rudhya Deoka (2005), Assamese Poetry.

3. Mor Preyoshir Naam mary (2007), Assamese Poetry.

4. GLC Collegor Arju Sultana (2008), Assamese Poetry.

5. Bixonno Hridoyor Usoponi (2015), Assamese Poetry.

Edited :

1. GLC College Souvenir (2008)
2. Gobardhana AAMSU Souvenir (2012)
3. Sangbad Prahori Sovenir ( 2016)
4. Nava Kranti (Monthly Magazine)
5. Mahekiya Kranti (Monthly Magazine)

Correspondent :

1. Dainik Gana Adhikar.
2. Gana Sangbad.
3. Sangbad Prahari

Social activities :

1.  AAMSU District President : Baksa (2012-2016)
2. Education & Magazine Secretary AAMSU (2016- …..)

Read More

"ডি" (DISPUTED/ DOUBTFUL) ভোটাৰ সম্পর্কে কিছু কথা

মহামান্য উচ্চতম ন্যায়ালয়ে Civil Appeal Nos.4171-4180 of 1994 ত ০৫.০৫.১৯৯৪ তাৰিখে দিয়া ৰায়দান অনুসৰি ভাৰতীয় নির্বাচন আয়োগে Letter No.23/96/P.S.-II Dated 07.10.1996 যোগে ০১.০১.১৯৯৭ ভিত্বি হিচাবে লৈ অসমত ভোটাৰ তালিকা সংশোধনীৰ নির্দেশ দিয়ে। 

ভাৰতীয় নির্বাচন আয়োগে Letter No.23/AS/96 Dated 04.02.1997 যোগে নির্বাচনী পন্জীয়ক বিষয়া তথা অন্যান্য সকলৰ বাবে গাইডলাইন জাৰি কৰে। নির্বাচন আয়োগে Letter No.23/AS/96 Dated 17.07.1997 যোগে আৰু কিছু নির্দেশনা জাৰি কৰে।

ভাৰতীয় নির্বাচন আয়োগে Letter No.23/AS/96 Vol.III Dated 12.11.1997 যোগে নির্দেশ দিয়ে, যি সকলৰ গোচৰ ন্যায়াধীকৰণলৈ প্রেৰন কৰা হৈছে তেওলোকৰ নাম "ডি" হিচাবে চিহ্নিত কৰি ভোটাৰ তালিকাত অর্ন্তভুক্ত কৰিব লাগে। নির্বাচন আয়োগে Letter No.23/AS/96 Vol.III Dated 06.12.1997 যোগে অসমৰ ১২৬ টা সমষ্টিৰ ভোটাৰ তালিকা ০৯.১২.১৯৯৭ তাৰিখে প্রকাশ কৰাৰ নির্দেশ দিয়ে। সেই অনুসৰি নামৰ আগত "ডি" সহ প্রথম ভোটাৰ তালিকা ০৯.১২.১৯৯৭ তাৰিখে প্রকাশ হয়। নির্বাচন আয়োগে Letter No.23/AS/96 Vol.III Dated 05.01.1998 যোগে নির্দেশনা দিয়ে যে "ডি" ভোটাৰ সকলে কোনো নির্বাচনত ভোটদান বা অংশগ্রহন কৰিব নোৱাৰিব।

"ডি" ভোটাৰৰ সাংবিধানীক বৈধতা সম্পর্কে মহামান্য গৌহাটী উচ্চ ন্যায়ালয়ত কেইবাটাও ৰাজহুৱা স্বার্থজনীত আবেদন (PIL) দাখিল হৈছিলে। আবেদন কেইটা ক্রমে- CR (PIL) No.185/1998; CR (PIL) No.253/1998 ও CR (PIL) No.254/1998. মহামান্য গৌহাটী উচ্চ ন্যায়ালয়ৰ দুজনীয়া বিচাৰপীঠে ১১.০১.২০০২ তাৰিখে আটাইকেইটা আবেদন নাকচ কৰে তথা ভোটাৰ তালিকাত "ডি" সাংবিধানীক ভাবে বৈধ বুলি ৰায়দান কৰে।

মহামান্য গৌহাটী উচ্চ ন্যায়ালয়ৰ ১১.০১.২০০২ তাৰিখৰ ৰায়ৰ বিৰুদ্বে মহামান্য উচ্চতম ন্যায়ালয়ত আপিল দাখিল হৈছিল যদিও পৰবর্তী সময়ত আপিল সমূহ উঠাই লয়। সেয়ে "ডি" ভোটাৰৰ সাংবিধানীক বৈধতা সম্পর্কে মহামান্য গৌহাটী উচ্চ ন্যায়ালয়ৰ ৰায় বাহাল আছে।

"ডি" ভোটাৰে উপযুক্ত নথি-পত্র ও সাক্ষী সহ দেৱানী আদালত (Civil Court) ৰ দ্বাৰস্থ হৈ স্বত্ব মামলা (Title Suit) দাখিল কৰি ভাৰতীয় বুলি ঘোষিত হৈছিলে। এই সম্পর্কে মহামান্য গৌহাটী উচ্চ ন্যায়ালয়ৰ মাননীয় এজনীয়া বিচাৰপীঠে যোৱা ১১.০৪.২০১৩ তাৰিখে WP (C) No.256/2013 [Md. Bahaluddin Sheikh Vs The Union of India and Ors] গোচৰত গুৰুত্বপূর্ণ ৰায় প্রদান কৰে। মহামান্য এজনীয়া বিচাৰপীঠে নির্দেশ দিয়ে যে- নাগৰিকত্ব সম্পর্কীয় গোচৰ মাত্র বিদেশী ন্যায়াধীকৰনত চলিব তথা দেৱানী আদালতত নাগৰিকত্ব সম্পর্কীয় গোচৰ নচলিব।

মহামান্য উচ্চতম ন্যায়ালয়ৰ দুজনীয়া খন্ড বিচাৰপীঠে ২৫.১০.২০১৩ তাৰিখে WP (C) No.274/2009 (Assam Public Works Vs Union of India and Ors) গোচৰত নিৰ্দেশনা দিয়ে যে- বিদেশী ন্যায়াধীকৰনে ভাৰতীয় বুলি ঘোষণা কৰাৰ পিছতহে "ডি" ভোটাৰৰ নাম এন.আৰ.চি ত অন্তৰ্ভুক্ত হব। 

মামেজা খাতুন নামৰ মহিলাক বিদেশী ন্যায়াধীকৰনে বিদেশী বুলি মতামত প্রদান কৰাত মহিলা জনীয়ে মহামান্য গৌহাটী উচ্চ ন্যায়ালয় দ্বাৰস্থ হৈ WP (C) No.1334/2009 (Mameza Khatun Vs Union of India and Ors) দাখিল কৰে। মহামান্য উচ্চ ন্যায়ালয়ৰ এজনীয়া বিচাৰপীঠে গোচৰটো নাকচ কৰাৰ লগতে যোৱা ২৩.০৩.২০১১ তাৰিখে ভাৰতীয় নির্বাচন আয়োগক নির্দেশ দিয়ে যে ভোটাৰ তালিকাত নাম থকা ব্যাক্তি যাৰ নাগৰিকত্ব সন্দেশ হয় তথা যাৰ বিৰুদ্ধে বিদেশী ন্যায়াধীকৰনত গোচৰ চলি আছে তেওঁলোককো "ডি" ভোটাৰ হিচাবে গন্য কৰিব লাগে।

মহামান্য এজনীয়া বিচাৰপীঠে যোৱা ২৩.০৩.২০১১ তাৰিখে "ডি" ভোটাৰ সম্পর্কে প্রদান কৰা নির্দেশনাক প্রত্যহ্বান জনাই অসম চৰকাৰে মহামান্য উচ্চ ন্যায়ালয়ত আপিল অর্থাৎ WA No.114/2011 (The Govt. of Assam Vs Mameza Khatun and Ors) দাখিল কৰে।

মহামান্য গৌহাটী উচ্চ ন্যায়ালয়ৰ দুজনীয়া খন্ড বিচাৰপীঠে যোৱা ১৩.১০.২০১৫ তাৰিখে WA No.114/2011 (The Govt. of Assan Vs Mameza Khatun and Ors) গোচৰত প্রদান কৰা ৰায়দান যোগে অসম চৰকাৰ আপিল নাকচ কৰে তথা এজনীয়া বিচৰপীঠে যোৱা ২৩.০৩.২০১১ তাৰিখে WP (C) No.1334/2009 গোচৰত "ডি" ভোটাৰ সম্পর্কে প্রদান কৰা নির্দেশনাক বাহাল ৰাখে।

মহামান্য গৌহাটী উচ্চ ন্যায়ালয়ৰ দুজনীয়া খন্ড বিচাৰপীঠে যোৱা ১৩.১০.২০১৫ তাৰিখে WA No.114/2011 গোচৰত প্রদান কৰা ৰায়ক প্রত্যাহ্বান জনাই অসম চৰকাৰে মহামান্য উচ্চতম ন্যায়ালয়ত SLP (C) No.3045/2016 (Govt. of Assam Vs Mameza Khatun and Ors) দাখিল কৰে।

মহামান্য উচ্চতম ন্যায়ালয়ৰ দুজনীয়া খন্ড বিচৰপীঠে ০৮.০২.২০১৬ তাৰিখে SLP (C) No.3045/2016 গোচৰত ৰায়দান দিয় যে-"ডি" ভোটাৰ সকলে নাগৰিকত্ব আইনৰ ধাৰা-৬ক মতে উপযুক্ত নথি কতৃপক্ষৰ ওচৰত দাখিল কৰি নির্বাচনী প্রক্রিয়াত ভোটদান ও অংশগ্রহন কৰিব পাৰিব।

২০১১ চনৰ পৰা মহামান্য উচ্চতম ন্যায়ালয়ত ডি (Doubtful/Disputed) ভোটাৰৰ সাংবিধানিক বৈধতা ও বিদেশীৰ নামত হাৰাহাস্তি সম্পৰ্কীয় গোচৰ বিচাৰাধীন হৈ আছে। মহামান্য গৌহাটী উচ্চ ন্যায়ালয়ৰ দুজনীয়া খন্ড বিচাৰপীঠে ১১.০১.২০০২ তাৰিখে Civil Rule (PIL) Nos.185, 253 and 254 of 1998 গোচৰত ৰায়দান দিয়ে যে, ভোটাৰ তালিকাত নামৰ আগত ডি সন্নিবিষ্ট কৰা অৰ্থাৎ সন্দেহযুক্ত ভোটাৰক ডি হিচাপে চিহ্নিত কৰাটো সাংবিধানিক ভাবে বৈধ। মহামান্য গৌহাটী উচ্চ ন্যায়ালয়ৰ এজনীয়া বিচাৰপীঠে ২১.০৪.২০১১ তাৰিখে WP (C) No.2288 of 2008 আৰু ২৬.০৫.২০১১ তাৰিখে WP (C) No.3236 of 2009 গোচৰত বিদেশী ন্যায়াধীকৰনত বিচাৰাধীন গোচৰ সম্পৰ্কে কিছুমান নিৰ্দেশনা প্ৰদান কৰে।

মহামান্য গৌহাটী উচ্চ ন্যায়ালয়ৰ ১১.০১.২০০২, ২১.০৪.২০১১ আৰু ২৬.০৫.২০১১ তাৰিখৰ ৰায়ক প্ৰত্যাহ্বান জনাই ১৮.০৮.২০১১ তাৰিখে মহামান্য উচ্চতম ন্যায়ালয়ত আপিল অৰ্থাৎ SLP (C) No.29727-29731/2011 দাখিল হয়। মহামান্য উচ্চতম ন্যায়ালয়ৰ দুজনীয়া খন্ড বিচাৰপীঠে ২১.১০.২০১১ তাৰিখে কেন্দ্ৰীয় চৰকাৰ, অসম চৰকাৰ ও ভাৰতীয় নিৰ্বাচন আয়োগক জাননী জাৰী কৰে। ভাৰতীয় নিৰ্বাচন আয়োগে ২০১২ চনৰ মে মাহত আৰু কেন্দ্ৰীয় চৰকাৰে ২০১২ চনৰ আগষ্ট মাহত উক্ত আপিলত শপতনামা দাখিল কৰে। মহামান্য উচ্চতম ন্যায়ালয়ত বিচাৰাধীন ডি ভোটাৰৰ সাংবিধানিক বৈধতা ও বিদেশীৰ নামত হাৰাহাস্তি সম্পৰ্কীয় আপিল অৰ্থাৎ SLP (C) No.29727-29731/2011 চূড়ান্ত নিষ্পত্তি (Final Disposal) পৰ্যায়ত আছে।

অসম চৰকাৰে মহামান্য এজনীয়া বিচাৰপীঠৰ ২৩.০৩.২০১১ তাৰিখৰ ৰায়ৰ বিৰুদ্বে আপিল WA No.114/2011 দাখিল কৰিছিলে যদিও ১৩.১০.২০১৫ তাৰিখে গৌহাটী উচ্চ ন্যায়ালয়ৰ দুজনীয়া বিচাৰপীঠে অসম চৰকাৰ আপিল খাৰিজ কৰে।

Source: Mustafa Khaddam Hussain, Advocate Gauhati High Court.

Read More

ফুটপাথৰ সৰাপাত

ভৰিৰ চেপাত আৰ্তনাদ কৰে
সৰাপাত
ষ্ট্ৰীট লাইটৰ পোহৰত
শুই থাকে ফুটপাথ৷

মই আৰু মোৰ ছাঁ
এন্ধাৰৰ জাল ফালি
গচকি যাওঁ দানৱৰ দৰে
এবাৰ-দুবাৰ বহুবাৰ...৷

ৰাজপথত কণী দিছে
ৰৌ-বৰালি আৰু সহস্ৰ দৰিকণাই
ট্ৰাক অথবা যাত্ৰীবাহী বাহনৰ চেপাত
আত্মহত্যা কৰাৰ সপোন ৰচা নাছিল তেওঁলোকে৷

পাচলিৰ দুৰ্গন্ধত মূৰগুজি
ৰচি বিচাৰি ফুৰা হাজাৰ কৃষকৰ বেদনা
ৰৌ-বৰালি আৰু সহস্ৰ দৰিকণা আৰু
ফুটপাথৰ সৰাপাতৰ দৰে৷

তোমাৰ প্ৰেমত পৰি
দেউতাৰ দৰে হ’বলৈ মন নাই মোৰ
ৰ’দৰ চিঠি পঢ়ি পঢ়ি
শোষণৰ ভৰত কোঁজা হৈ
দিনবাৰ চাব নোৱাৰিম 
অমাৱশ্যাৰ নিশা বিচাৰি৷৷

-------------------------------------------------------------------------------

মনৰ কথাঃ
        বিদ্ৰোহী কবি কাজী নজৰুল ইছলামে কৈছিল— ‘মই বাঁহী বনাব জানো, সুৰ তোলাৰ দায়িত্ব মোৰ নহয়’৷ এই বাক্য সাৰোগত কৰি ভালে কেইদিন থকাৰ পিছত মোৰ মন গ’ল বাঁহী বনাই সুৰ তোলাৰ বাবে৷
কবিতাৰ ভাবাৰ্থ সঠিক ভাবে স্বয়ং কবিয়েই প্ৰকাশ কৰিব নোৱাৰে৷ সেইবাবেই চাগে কাজী নজৰুলে তেনেদৰে কৈছিল৷ তথাপিও ‘ফুটপাথৰ সৰাপাত’ৰ বিষয়ে দুটামান বাক্য লিখিব মন গৈছে৷
        কবিতাটোৰ জন্ম যন্ত্ৰণা আৰম্ভ হৈছিল কেইদিনমান পূৰ্বে উত্তৰ বৰপেটাৰোডৰ ফুটপাথেৰে খোজকাঢ়ি যোৱাৰ সময়ত৷ সকলোৱে জানে যে আমাৰ উত্তৰ বৰপেটাৰোডৰ ৰাজপথৰ অৱস্থা পুখুৰীসদৃশ৷
বৰপেটাৰোডৰ কৃষকসকলে শাক-পাচলি উপযুক্ত বজাৰমূল্য লাভ নকৰি আত্মহত্যা কৰিব লগা হয়৷
-------------------------------------------------------------------------------

Read More

মৃণাল তালুকদাৰৰ ‘অৱধাৰিত গৃহযুদ্ধ !’— মই কিয় একমত নহয়

মৃণাল তালুকদাৰৰ ‘অৱধাৰিত গৃহযুদ্ধ’ এটা তত্বগধুৰ, প্ৰয়োজনীয় আৰু সময়োপযোগী প্ৰবন্ধ৷ কিন্তু তথ্য বিভ্ৰান্তিও আছে৷ ন্যায়ালয়ত ১৯৭১ ৰ পক্ষত প্ৰবল শক্তিশালী স্থিতিত থকা আমছুৰ কথা তেখেতে পাহৰিয়ে গ’ল৷ বিপৰীতে আজমল বাহিনীৰ নাম উল্লেখ কৰিলে, য’ত আজমল বাহিনীৰ ভূমিকা নাই বুলিয়েই ক’ব পাৰি৷

দ্বিতীয়তে প্ৰবন্ধটোত অনাহক আৰু ভাতৃঘাতী আশংকা ব্যক্ত কৰা হৈছে৷ ৫১‘ হওঁক বা নহওঁক যিবোৰ আশংকাই মুছলমানসকলক এতিয়াৰ পৰাই সন্দেহৰ দৃষ্টিৰে চাবলৈ আৰম্ভ কৰা হ’ব৷ তেনেকুৱা অলাগতিয়াল আশংকা ব্যক্ত কৰা হৈছে৷ বহুতেই প্ৰবন্ধটো শ্বেয়াৰ কৰিলে, মই প্ৰবন্ধটোৰ লগত এশ শতাংশ একমত হ’ব পৰা নাই৷ (সোইদিনাৰ পৰাই কথাবোৰ লিখিম বুলি ভাবি থাকোতে গ’ল) তেখেতে কৈছে যে ১৯৫১ হ’লে আইছিছে সুবিধা ল’ব পাৰে৷ তেখেতৰ এই আশংকাৰ দ্বাৰা অসমৰ প্ৰায় এক কোটি ধৰ্মীয় সংখ্যালঘুলোক ক্ষতিগ্ৰস্থ হ’ব৷ ইতিপূৰ্বে আইএছআই বা জেহাদীৰ নামত এইসকল লোকক বহু হাৰাশাস্তি কৰা হ’ল৷ তেখেতৰ দৰে এগৰাকী আগশাৰীৰ সাংবাদিক, বুদ্ধিজীৱীয়ে কিবা এটা আশংকা কৰাটো প্ৰতিক্ৰিয়াশীল মহলে আগতীয়াকৈ কাৰ্যতৰূপায়ন কৰিব বিচাৰে৷

অসম আন্দোলনৰ আমি বিৰোধিতা কৰিলেও ভিত্তিবৰ্ষক সমৰ্থন কৰিছিলো৷ তাৰ কাৰণো আছে৷ বেচৰকাৰী হিচাপত প্ৰায় ১০ হাজাৰ ধৰ্মীয় সংখ্যালঘুৰ প্ৰাণ আৰু ৮৫৫ জন আন্দোলনকাৰীৰ প্ৰাণৰ বিনিময়ত স্বাক্ষৰিত হৈছিল এই চুক্তি৷ ঘূণীয়া হোৱাসকলক বাদেই দিলো৷

এটা কথা ঠিক যে বাৰম্বাৰ এটা জাতিয়ে তেজ দিব নোৱাৰে, আত্মৰক্ষা কৰিব পাৰে৷ এতিয়া মুছলমানে আত্ম ৰক্ষা কৰিলেই তাক উগ্ৰপন্থীৰ লগত তুলনা কৰাটো যুক্তিসঙ্গত নহয়৷

এইখিনিতে আৰু এটা কথা উল্লেখ কৰিব লাগিব যে ১৯৫১ চনৰ ৰাষ্ট্ৰীয় নাগৰিক পঞ্জী অথবা ১৯৫২ চনৰ ভোটাৰ তালিকা সম্পূৰ্ণৰূপে স্বয়ং চৰকাৰৰ হাততেই মজুত নাই, প্ৰতিকূল বতৰৰ বাবে বহু জিলাত উক্ত ছেনছাছেই কৰা নাছিলে৷ ৫১‘ ভিত্তিবৰ্ষ হ’লে তেওঁলোকৰ কি হ’ব— এই প্ৰসঙ্গত তেখেতে কোনো বক্তব্য আগবঢ়োৱা নাই৷ লগতে তেখেতে নিশ্চয় জানে যে ষাঠিৰ দশকত বহু মুছলমানলোকক পূৰ্ব পাকিস্তানলৈ বিতাৰণ কৰা হৈছিল, বৰ্তমানৰ বাংলাদেশত থকা তেনে বহুলোকৰ হাতত ১৯৫১ চনৰ ৰাষ্ট্ৰীয় নাগৰিকপঞ্জী মজুত আছে৷ তেওঁলোক এতিয়া বাংলাদেশৰ বৈধ নাগৰিক৷ কিন্তু ১৯৫১ চন ভিত্তিবৰ্ষ হোৱাৰ লগে লগে বহু ভাৰতীয় মানুহৰ হাতত কোনো নথি নাথাকিব, বিপৰীতে বাংলাদেশৰ নাগৰিকৰ হাতত নথি থাকিব৷ সাধাৰণ যুৱক হিচাপে মোৰ আশংকা এইখিনিতে৷

প্ৰসঙ্গক্ৰমে উল্লেখ কৰিব পাৰি যে অসম আন্দোলনৰ সময়ত বহুলোকৰ নথি-পত্ৰ জ্বলাই ভষ্মিভূত কৰা হৈছিল, তাৰ পাছৰ সময়ছোৱাত জনগোষ্ঠীয় অধিকাৰৰ নামত কেইবাবাৰো বৰ্তমানৰ বিটিচি অঞ্চলত সংখ্যালঘুলোকৰ ঘৰ-বাৰী জ্বলাই দিয়া হৈছিল, লগতে জ্বলিছিল নথি-পত্ৰও৷ আৰু অসম চুক্তি যিহেতু সকলোপক্ষই মানি লৈছিল, হত্যাৰ অপৰাধীসকলৰ বিৰুদ্ধে থকা গোচৰসমূহ উঠাই লৈছিল৷ ৭১‘ ভিত্তিবৰ্ষ হোৱা বাবে মানুহে তাৰ আগৰ নথিবোৰক অদৰকাৰী বুলি ভাবিবলৈ আৰম্ভ কৰিছিল, সংৰক্ষণ কৰাৰ পৰাও বহুতে বিৰত থাকিল৷ আনকি মানুহে বিভিষিকাময় স্মৃতিবোৰক বিস্মৃতিৰ গহব্বৰত হেৰুৱাই থ’ব বিচাৰিছিল৷ ৫১-৭১ বিতৰ্কই পুনৰ শোকাণ ঘা কেঁচা কৰাৰ হে আশংকা ঘণিভূত কৰিছে৷

সকলোৱে মনত ৰখা উচিত যে অসম আন্দোলনৰ সময়ত যিসকল লোক বুৰ্বক আৰু আত্মজ্ঞানহীন আছিল তেওঁলোক আজিৰ তাৰিখত তেনেকুৱা হৈ থকা নাই৷ লাঞ্চনা-বঞ্চনা, অত্যাচাৰ-উৎপীড়ন সহ্য কৰি তেওঁলোকৰ মাজতো দুই-চাৰিজন ভাল-বেয়া বিচাৰ কৰিব পৰা মানুহ উলাইছে৷ তেতিয়াৰ পৰিৱেশৰ লগত এতিয়াৰ পৰিৱেশৰ বহুখিনি অমিল আছে৷
দুৰ্ভাগ্যজনক কথাটো এই যে প্ৰবন্ধটোৰ শেষাংশত তেখেতে এনে কিছু আশংকা ব্যক্ত কৰিছে যাৰ জৰিয়তে অসমৰ মুছলমানসকলৰ দেশপ্ৰেমৰ ক্ষেত্ৰতো সন্দেহৰ আঙুলী টোওৱা হৈছে৷ ১৯৫১ চন ভিত্তিবৰ্ষ হ’লে নিশ্চিত ভাবে বঞ্চিতসকলে আন্দোলন কৰিব, তাৰ অৰ্থ এইটো নহয় যে তেওঁলোকে চীনৰ লগত চামিল হ’ব অথবা আইছিছৰ দৰে এটা বৰ্বৰ সন্ত্ৰাসবাদী সংগঠনৰ লগত মিলি যাব৷ — এই কথাবোৰ অতি সুক্ষ্ম ভাবে আমাৰ অসমৰ সাংবাদিক-বুদ্ধিজীৱীসকলে চিন্তা কৰা উচিত৷ মনত আহিলেই প্ৰবন্ধৰ নামত এটা জনগোষ্ঠীৰ দেশপ্ৰেম ওলাই কৰাৰ অধিকাৰ কাৰো নাই৷

Read More

ধূতি আৰু নীলা শিয়ালৰ কাহিনী

এবাৰ এটা নীলা শিয়ালক কঠোৰ সমালোচনা কৰাৰ বাবে মোৰ পুৰণি বন্ধু এজনে মোক চিৰ দিনৰ বাবে ফেচবুকত ব্লক কৰিছিল৷ নীলা শিয়ালটোক মই বেয়া নাপাওঁ, মাথো তেওঁ নিজৰ জাতিক পাহৰি গৈছে বুলি উনুকিয়াইছিলো৷ নিজস্বতা পাহৰি কাৰোবাক তৈলমৰ্দন কৰা ঘটনাক সমালোচনা কৰিছিলো৷ এতিয়া যি দেখিছো নীলা শিয়ালটোৰ চিন্তাই আছিল দূৰদৰ্শি৷ তেওঁ বহু আগৰ পৰাই ধূতি পিন্ধি বিহু ডেন্স মাৰিব শিকিছিল৷ ভক্তবোৰৰ লগত ভালকৈয়ে তাল-মিল কৰি চলিব শিকিছিল৷ আজি কামত আহি গ’ল...........৷

(নীলা শিয়ালৰ কাহিনীটো বন্ধুসকলে পঢ়ি ল’ব দেই, কোনোবা এটা সাধু কথাৰ কিতাপত পাইছিলো৷)

আৰু এটা কথা মনত পৰি গ’ল বাবে ইডিট কৰি দিলো—আমাৰ অসমত মোডী প্ৰেমৰ জোৱাৰ উঠিছে৷ ভক্তগনে প্ৰতিযোগিতাত নামিছে ভাৰতৰ অইন ৰাজ্যতকৈ আগত অসমত সাম্প্ৰদায়িকতাৰ ৰং সানিব৷ থাকক অসম পিছপৰি তাতে কি যায়, আহে৷ অসমৰ সম্পদ লাগিলে লৈ যাওঁক ভক্তৰ প্ৰেমিক সকলে....৷ সৰ্বাধিক কাল শাসনৰ গাদি দখল কৰাসকলে উৎসাহিত হোৱাৰ প্ৰয়োজন নাই৷ তেওঁলোকে যি কৰিব নোৱাৰিলে সেই কাম কৰি দেখুৱাৰ নামেইতো পৰিৱৰ্তন৷ অৱশ্যে অসমৰ উন্নয়ন, ভাতৃত্ববোধৰ প্ৰশ্নত ৰাষ্ট্ৰীয়তাবাদীসকল সদায়ে উদাসীন৷

Read More

নাৰায়ণগুৰিৰ মিঞা হত্যাকাণ্ড, তেজৰ বেঁকীঃ এক বিষাক্ত সোঁৱৰণ

১৮ ফেব্ৰুৱাৰীত মহান কবি সকলে দুখৰ সাগৰত উটি ভাঁহি নষ্টালজিক হৈ পৰে যদিও বিপ্লবী কবিতা লিখে, মহান লেখকসকলে জুয়ে পুৰা তিৰাশীৰ ৰক্তাক্ত সোঁৰণত গল্প, উপন্যাস লিখে, “ষ্টৰি” লিখে, সংগ্ৰামীসকলে সোঁৱৰণী সভা পাতে, আলোচনা চক্ৰ অনুষ্ঠিত হয়, পিতৃ, মাতৃ, ভাতৃ, ভগ্নী... হেৰুৱাই আত্মীয়তাৰ যন্ত্ৰণাত ছটফটাই থকাসকলে মোনাজাত কৰে, দোৱা কৰে। আমি প্রত্যেকেই মনত পেলাও নেলীৰ গণহত্যাৰ ৰক্তাক্ত ছবিবােৰ, এটা বর্বৰ জাতিৰ নিষ্ঠুৰতাৰ চৰম ঘূণীত চিত্র আৰু মনত পেলাও ঘাতক বাহিনীয়ে পোৱা ৰাজ আতিথ্য, চুক্তি আৰু ভূক্তভোগীক কৰা বঞ্চনাৰ কথা। বেচৰকাৰী হিচাপত ১০ হাজাৰতকৈ অধিক লোকক হত্যাকৰি হত্যাকাৰীসকলে সংগ্রামী নাম লাভ কৰা আৰু পাছলৈ ৰাজত্ব লাভ কৰিলেও কিন্তু আত্মীয় হেৰুওৱাসকলে এতিয়ালৈকে লাভ নকৰিলে উপযুক্ত ক্ষতিপূৰণ। আশীৰ দশকত ৰাজ্য, কেন্দ্ৰত কাৰ শাসন আছিল সেই কথা আপোনালোকে নিশ্চয় জানে আৰু এই কথাও মন কৰিবলগীয়া। বিদেশী বিতৰণৰ দৰে এটা পবিত্ৰ আৰু অতিকৈ আবেগিক ইচ্ছ। এটাক সন্মুখত ৰাখি বিনাদ্বিধায় আন্দােলনৰ নাম দি ফেচিবাদীসকলৰ পৃষ্ঠপোষকতাত মানুহ হত্যা কৰাসকলৰ পক্ষৰ নিহতসকলক শ্বহীদৰ ময্যদা প্ৰদান কৰাৰ বিপৰীতে একে বিদেশী খেদা আন্দোলনত যিসকল ভাৰতীয় নাগৰিকে প্রাণাহুতি দিলে তেওঁলোকক দেশৰ শত্ৰুৰ দৰেই জ্ঞান কৰি থকা হ’ল। আৰু আমিবোৰে চমৰ ব্যর্থ হলো মানৱতাৰ হত্যাৰ তীব্র বিৰােধিতা কৰাৰ ক্ষেত্ৰত। নাইকীয়া হ’ল শক্তি, সাহস অথবা কাষ চাপিব নোৱাৰিলো ন্যায় ব্যৱস্থাৰ।

এটা নতুন দিৱসঃ নেলীৰ গণহত্যাৰ দিৱসৰ দৰে ২ মে’ এটা দিৱস, কাৰণ এই দিৱসতেই হত্যা কৰা হৈছিল নাৰায়ণগুৰিৰ ২১ গৰাকী শিশু, ১৫ গৰাকী মহিলা আৰু এগৰাকী বৃদ্ধ, এজন যুৱককলৈ মুঠ ৩৮ গৰাকী। তাৰাে দুগৰাকী শিশুৰ মৃতদেহও নাপালে পৰিয়ালে, ফলশ্রুতিত ক্ষতিপূৰণো নাপালে আত্মীয়ই। জ্বলাই ভষ্মিভূত কৰা হৈছিল অৰ্ধ শতাধিক লোকৰ বাসস্থান৷ ইয়াৰে তৃতীয় বর্ষপূর্তি অনুষ্ঠান পতা হৈছে গাওঁখনত। বর্ষপুতি অনুষ্ঠানত নিহতসকলৰ বাবে দোৱা কৰা হ’ব, আত্মীয়ৰ কথা সোঁৱৰি চকুলো টােকা হ’ব, মোৰ দৰে অকামিলা বােৰে লেখা-মেলা কৰিব। তাৰ পিছতেই পুনৰ এবছৰৰ বাবে পাহৰিবলৈ চেষ্টা কৰা হ’ব এই বর্বৰ হত্যাকাণ্ডৰ ঘটনাক ।

নাৰায়ণগুৰিত এতিয়া হাতী ওলায়, বাঘ ওলায়, একমাত্র প্রাথমিক বিদ্যালয়, আঙ্গানবাড়ী কেন্দ্ৰ উঠাই অনাৰ চিন্তা বাস্তবায়িত কৰাৰ আপ্রাণ চেষ্টা কৰা হয়। লগতে নিৰাপত্তাৰক্ষীসকলে আলোচনা কৰে কেতিয়া তাৰ পৰা ওলাই আহিব পাৰিব। উদ্বেগজনক ভাবে গাওঁখনৰ বাসিন্দাসকলেও বৰপেটাৰোডৰ আশে-পাশে মাটি ক্রয় কৰি ঘৰ-বাৰী বান্ধিবলৈ আৰম্ভ কৰিছে। এই ক্ষেত্ৰত মন কৰিবলগীয়া কথাটো হ’ল যে যিসকল লোকৰ আত্মীয় হেৰুৱাইছে তেওঁলোকৰ সতি-সন্তুতিসকলৰ অধিকাংশকেই গাওঁখনৰ পৰা আঁতৰত ৰখা হৈছে। ইয়াৰ বিপৰীতে যিসকলৰ আত্মীয় হেৰুওৱা নাই তেওঁলোক যিহেতু কোনো ক্ষতিপূৰণৰ ধনো লাভ কৰা নাই তেওঁলোকে ভয় আৰু শংকৰে নিশাবােৰ পাৰ কৰি গাওঁখনত বাস কৰিব লগা হৈ আছে যদিও বহুতে নিজৰ ল’ৰা-ছোৱালীক আত্মীয়ৰ ঘৰত আশ্রিত কৰি তাতেই “লেখা-পঢ়া” কৰাই আছে। ফলত বিদ্যালয়ত ছাত্র-ছাত্রীৰ সংখ্যা পুতীেজনক ভাবে কমি গৈ আছে। প্রায় দুই কিলোমিটাৰ বহল বেঁকী নদী পাৰ হৈ মানাহ ৰাষ্ট্ৰীয় উদ্যানৰ গাতে লাগি থকা মিঞা গাওঁ নাৰায়ণগুৰিত কিয় মানুহে থাকে বুলি প্রশ্ন কৰা লোকৰ অভাব নথকাৰ ফলশ্রুতিত আৰু চকুৰ আগত আত্মীয়ক গুলিৰে থকা-সৰকা কৰাৰ দৃশ্যবােৰ পাহৰিব নােৱাৰাৰ বাবে গাওঁখনৰ বাসিন্দাসকলৰ গাওঁখনৰ প্ৰতি মোহভঙ্গ হ’বলৈ আৰম্ভ কৰিছে। ইফালে লেহেমীয়া বিচাৰ প্ৰক্ৰিয়াৰ অন্ত নপৰালৈ লক্ষ্য কৰি নাৰায়ণগুৰিৰ নিহতৰ আত্মীয়ক ন্যায়। প্রদান কৰা হ’ব নে নাই তাৰ নিশ্চয়তা নথকাত আৰু এতিয়া জামিনত থকা অধিকাংশ হত্যাকাৰীয়ে প্রত্যক্ষদশীসকলক পুনৰায় আক্রমণ কৰিব বুলি মুকলি প্রত্যাহ্বান জনােৱাৰ পিছতো প্রশাসনে কোনো ব্যৱস্থা নােলোৱাত শংকা আৰু আতঙ্ক অধিক ঘণিভুত হৈছে।

২ মে’ইতিহাস হ’লঃ ২০১৪ চনৰ ১ মে’ৰ দিনটাে অসমৰ ইতিহাসৰ আৰু এটা ক’লা দিন। ২০১৪ চনৰ ১ মে’ত বাক্সা জিলাৰ নৰসিংবাৰীত ৩ গৰাকী আৰু কোকৰাঝাৰ জিলাৰ বালপাৰাত ৮ গৰাকী লোকক হত্যা কৰাৰ পিছত। সম্পূর্ণ পৰিকল্পিত ভাবে আৰু বাঁহবাৰী ৰেঞ্জঅফিচত (বন বিভাগৰ কাৰ্যালয়) তেতিয়াৰ বন বিষয়া তথা বিটিচিৰ উপ মুখ্য কার্যবাহী সদস্য খাম্পা বৰগয়াৰীৰ আত্মীয় অমিয় কুমাৰ ব্ৰহ্মাৰ নেতৃত্বত হােৱা আলোচনা আৰু মদ-গাহৰিৰ আড্ডাত লোৱা সিদ্ধান্ত মর্মে ২ মে’ তাৰিখে দিনৰ পোহৰত অর্থাৎ আবেলি প্রায় ৪ বজাত গুলিয়াই হত্যা কৰা হৈছিল নাৰায়ণগুৰিৰ ৩৮ গৰাকীকৈ নিৰিহ জনতাক। এই বিষয়ে বিস্তাৰিত আলোচনা আগবঢ়োৱাৰ যত্ন কৰা হৈছে।

বন বিষয়াই গুলীয়াইছিল ৰাইজকঃ ইতিমধ্যে কেইবাটাও আলোচনাত প্রত্যক্ষদশীৰ বৰ্ণনাৰ পৰা পাঠক সমাজে গম পাইছে যে কিদৰে বনকমীসকলে অচিনাক্ত উগ্ৰপন্থীৰ সহযোগত হত্যাযজ্ঞ চলাইছিল। তাৰ উপৰি ঘটনাৰ এদিনৰ পিছত অর্থাৎ ৩ মে’ তাৰিখে অভিযুক্ত বনকমীসকলক কৰায়ত্ত কৰাৰ দাবীত বাঁহবাৰী বন বিষয়াৰ কাৰ্যালয় ঘেৰাও কৰিবলৈ যোৱাত সদৌ অসম সংখ্যালঘু ছাত্র ইউনিয়নৰ সাংগঠনিক সতীর্থ, সদৌ বিটিচি সংখ্যালঘু ছাত্র সন্থকে আদি কৰি স্থানীয় প্রতিবাদকাৰীসকলকো ৰেঞ্জাৰ অমিয় কুমাৰ ব্ৰহ্মাৰ নেতৃত্বত গুলীওৱা হৈছিল।

বন বিষয়াৰ কাৰ্যালয়ত তৈয়াৰ হৈছিল হত্যাযজ্ঞৰ বুপ্রিন্টঃ বিটিচিৰ উপমুখ্য কাৰ্যবাহী খাম্পা বৰগয়াৰীৰ পৃষ্ঠপোষকতাত চলি থকা বাক্সাৰ বাঁহবাৰী ফৰেষ্ট ৰেঞ্জ অফিচতে ৰচনা কৰা হৈছিল নৰসিংবাৰী, নাৰায়ণগুৰি (ননকে খাগ্ৰাবাৰী)ৰ হত্যাকাণ্ডৰ বুপ্রিন্ট। বাহ্যিক দৃষ্টিত বাঁহবাৰী ৰেঞ্জ কার্যালয়টাে বন বিভাগৰ কাৰ্যালয় হিচাপে দেখা গ’লেও প্রকৃততে তথাকথিত মানাহ ব্যাঘ্ৰ সংৰক্ষণ প্রকল্পত কৰ্মৰত এনজিঅ’ নামধাৰী প্রাক্তন বিএলটি সদস্যসকলে ৰেঞ্জ অফিচটো ট্ৰেনজিট কেম্প হিচাপে ব্যৱহাৰ কৰি আহিছে। প্রাক্তন বিএলটিৰ আডিডাস্থলী ট্ৰেনজিট কেম্প বাঁহবাৰী ফৰেষ্ট ৰেঞ্জ অফিচৰ পৰাই নিয়ন্ত্রিত হয়। মানাহত চােৰাংকৈ গছ কটা, বিটিএডিত ধন দাবী, হত্যা-অপহৰণ আদি হিংসাত্মক ঘটনাৱলী৷ স্থানীয় সূত্রসমূহৰ মতে এই কার্যালয়টােলৈ অত্যাধুনিক মাৰণাস্ত্রৰে সুসজ্জিত যুৱক দলৰ অবাধ আহ-যাহ চলি থাকে। কেতিয়াবা সেনাৰ পোছাকত বৃহৎসংখ্যক অস্ত্ৰধাৰী যুৱকে তাত একেলগে সমৱেত হােৱাও অঞ্চলবাসীয়ে প্রত্যক্ষ কৰিছে। উল্লেখযোগ্য যে বিটিচিৰ দায়িত্বত থকা উপমুখ্য কার্যবাহী খাম্পা বৰগয়াৰীয়ে একাংশ প্রাক্তন বিএলটি সদস্যক এনজিঅ’ৰ কর্মকর্তা হিচাপে মানাহৰ ব্যাঘ্র প্রকল্পত নিয়োগ কৰি তেওঁলোকক ৰাজত্ব কৰাৰ লাইচেন্স প্রদান কৰিছে। আনহাতে বাঁহবাৰী ৰেঞ্জৰ বন বিষয়া অমিয় কুমাৰ ব্ৰহ্মা খাম্পা বৰগয়াৰীৰ ঘনিষ্ঠ আত্মীয় হােৱা হেতুকে এনেধৰণৰ দুষ্কার্য বিনা দ্বিধাই কৰি যাব পাৰিছে।

১ মে’ৰ নিশা চলিছিল মদ-গাহৰি মাংসৰ আডিডা ঃ নৰসিংবাৰীৰ হত্যাকাণ্ড সংঘটিত কৰাৰ পাছত হত্যাকাৰীৰ দলটাে উভতি আহিছিল বাঁহবাৰী ৰেঞ্জলৈ। সিদিনা নিশা কেম্পটােত ৩০-৩২জন প্রাক্তন বিএলটিৰ লোক মিলিত হৈ ভোজভাত খাইছিল। স্থানীয় সূত্ৰৰ পৰা পোৱা তথ্য অনুসৰি সিদিনা দিনৰ ভাগতে গাহৰিৰ মাংস আৰু মদ মজুত কৰি ৰাখিছিল কেম্পটােত আৰু এই সকলোবােৰৰ যোগান ধৰিছিল ৰেঞ্জাৰ অমিয় কুমাৰ ব্ৰহ্মই। সূত্ৰটােৰ মতে অমিয় কুমাৰ ব্ৰহ্মই এই সকলোবােৰ মেনেজ কৰি পিছদিনাৰ ঘটনাত কোন কোন যাব তাৰ তালিকা এখনাে প্রস্তুত কৰি দিছিল। বাক্সা আৰক্ষীৰ শীৰ্ষ সূত্রই সদৰী কৰা মতে ননকে খাগ্ৰাবাৰী বা নাৰায়ণগুৰিলৈ যাবৰ বাবে হত্যাকাৰী দলটােক বন বিভাগৰ নাও যোগান ধৰিছিল অমিয় কুমাৰ ব্ৰহ্মাই।

নেতৃত্বত ৰজেন-নামলাং ঃ নৰসিংবাৰী, নাৰায়ণগুৰি আৰু ননকে খাগ্ৰাবাৰীৰ সংখ্যালঘু হত্যা অভিযানৰ নেতৃত্ব লৈছিল। প্রাক্তন বিএলটি ৰজেন বড়ো আৰু নােমলাং বড়োৱে৷ উল্লেখ্য যে ১৯৯৪ চনতো এই সমগ্র অঞ্চলতে সংঘটিত হৈছিল এনে ভয়ংকৰ হত্যাকাণ্ড। বাঁহবাৰী ৰেঞ্জ অফিচৰ নিচেই ওচৰত থকা বাঁহবাৰী এম ই স্কুলত শিবিৰ পাতি থকা প্রায় অর্ধশতক সংখ্যালঘু লোকক জুলাই, গুলীয়াই, চােকা অস্ত্ৰৰে হানি-খুচি হত্যা কৰা হৈছিল। নাৰায়ণগুৰি, বাঁহবাৰী, ননকে খাগ্ৰাবাৰীকে আদি কৰি সমগ্র অঞ্চলটােৰ পৰা ৭২জনকৈ সংখ্যালঘু লোক নিহত হােৱা সেই হত্যাকাণ্ডটােৰাে নেতৃত্ব প্রদান কৰিছিল সেই সময়ৰ বিএলটি কেডাৰ ৰাজেন বড়ো আৰু নামলাং বড়োৱে। ইপিনে কুৰি বছৰ পাছতো অপৰাধৰ শাস্তি ভোগ নকৰাসকলেই নেতৃত্ব লৈ পুনৰ হত্যাযজ্ঞ সংঘটিত কৰিছে বুলি স্থানীয় প্রত্যক্ষদশী আৰু সূত্রসমূহৰ পৰা নিশ্চিত তথ্য লাভ কৰা হৈছে আৰু এই সন্ধৰ্ভত ৰাষ্ট্ৰীয় অনুসন্ধান এজেন্সি (এন.আই.এ)য়ে বিগত তিনি বছৰে তদন্ত অব্যাহত ৰাখিছে।

ভূটানৰ “চােনীৰ আশ্রয় গ্রহণ হত্যাকাৰীৰঃ বিটিচিৰ একাংশ প্ৰভাৱশালী নেতাৰ সৈতে ঘনিষ্ঠ সম্পর্ক ভূটানৰ “চােনী’ নামৰ এগৰাকী উচ্চপদস্থ চৰকাৰী বিষয়াৰ। চােৰাংচােৱাৰ এক সূত্ৰৰ পৰা জানিব পৰা মতে বিটিএডিত নৰসংহাৰ চলোৱা ঘাতক বাহিনীৰ অধিকাংশক বিটিচিৰ এগৰাকী নেতাই তেওঁৰ গাড়ীৰে ভূটানলৈ পলুৱাই পঠায়। বিটিচিৰ নেতাগৰাকীৰে ঘনিষ্ঠ সম্পর্ক থকা ভূটানৰ ছানদ্রুপ-জংখাৰ জিলাৰ প্রশাসনিক বিষয়াগৰাকীয়ে আশ্রয় প্রদান কৰিছে হত্যাকাৰী দলটােক।

মধ্যযুগীয় বর্বৰতাৰে চলাইছিল হত্যাকাণ্ডঃ হত্যাকাণ্ডৰ বৰ্বৰতাৰ কথা আগতেও কেইবাটাও লেখাত উল্লেখ কৰিছো। হত্যাকাণ্ড চলি থকা সময়ত পিতৃ-মাতৃক বিচাৰি ইফাল-সিফাল দৌৰি ফুৰা কণ কণ কেঁচুৱা শিশুসকলক পাৱাৰপাম্পত কোবাই হত্যা কৰাৰ লগতে বেঁকীৰ পাৰত থিয় হৈ শিশুসকলক দুখন ভৰিত ধৰি খুকুৰিৰে দুফাল কৰি হত্যা কৰি বেঁকী নদীত পেলাই দিছিল। হত্যাকাৰীৰ দলটােৱে।। গাৰ নোম শিয়ৰি উঠা এই ঘটনাবোৰ প্ৰত্যক্ষদশীয়ে গছৰ আৰি লৈ নাইবা নদীত প্ৰাণ বচাবলৈ সাঁতুৰি থাকি দেখা পাই আমি সাক্ষ্য গ্রহণ কৰাৰ সময়ত বৰ্ণনা কৰিছিল।

দুফাল কৰি মাৰিছিল এলিনাকঃ মধ্যযুগীয় বর্বৰতাকো চেৰ পেলাই হত্যাযজ্ঞ চলাইছিল নৰখাদকসকলে। ননকে খাগ্ৰাবাৰীৰ দুলাল মিঞাৰ চাৰি বছৰীয়া কন্যা এলিনা বেগমক খেদি খেদি ধৰি দুই ভৰি মেলি দুফাল কৰি হত্যা কৰিছিল। নৰখাদকে। এই বীভৎস কাণ্ডৰ কথা সদৰী কৰিছিল এলিনাৰ আত্মীয়ই। কিন্তু ৰহস্যজনক কাৰণত দুলালে এই ঘটনাক গাপ দিয়াৰ চেষ্টা কৰা বুলি স্থানীয় লোকে জনাইছে। দুফাল কৰি হত্যা কৰি বেঁকীত পেলাই দিয়া হৈছিল এলিনাক। আনকি দুলালৰ পত্নী মজিন্না বেগম (৩৭)ক গুলীওৱাৰ পিছত নদীত জাঁপ দিছিল যদিও নদীত তাইৰ মৃতদেহহে উদ্ধাৰ হৈছিল।

গাঁতত লুকাই ৰক্ষা এলিজাৰঃ হত্যাকাণ্ডৰ সময়ত উপস্থিত বুদ্ধিৰ বলতে নিজৰ প্ৰাণ ৰক্ষা কৰিবলৈ সক্ষম হৈছিল। কোনােবাই যদি মানাহৰ গছৰ আঁৰ লৈ নিজৰ জীৱন ৰক্ষা কৰিছিল, কোনােবাই আকৌ নদীৰ পাৰত গছ বাগৰি পৰি সৃষ্টি হােৱা গাঁতত আত্মগোপন কৰি নিজৰ প্ৰাণ ৰক্ষা কৰিবলৈ সক্ষম হৈছিল। গাঁওখনৰে এলিজা খাতুন নামৰ কিশোৰীগৰাকীয়ে এনেদৰে প্ৰাণ ৰক্ষা কৰাৰ লগতে তাইৰ লগত কেইবাটাও কেঁচুৱাই তেনেকৈ হত্যাকাৰীসকলৰ পৰা প্ৰাণ ৰক্ষা কৰিছিল বুলি জানিব পাৰিছিলো।

নদী সাঁতুৰি প্ৰাণ ৰক্ষা কৰিছিল দুকুৰি কিশোৰ-কিশোৰীয়ে ঃ বর্বৰ আৰু অমানৱীয় হত্যাকাণ্ডৰ পৰা নিজৰ জীৱনটােক ৰক্ষা কৰাৰ বাবে বেঁকী নদী সাঁতুৰি পাৰ হৈছিল দুকুৰি কিশোৰ-কিশোৰীয়ে। হত্যাকাৰীসকলে নদীৰ পানীতো ধাৰাসাৰে গুলী চলাই থকাৰ সময়তো তেওঁলোকে সাঁতুৰি পাৰ হৈছিল। খৰস্রোতা বেঁকী নদী। মহিদুল ইছলাম (১০), মকিবুল ইছলাম (৮), জলিল আলী (৬), জয়নাল আবদিন (১৪), জৰিনা বেগম (১০), ছুৰমান আলী (৭) আদি কিশোৰ-কিশোৰীয়ে আমাৰ আগত বর্ণনা কৰিছিল নৃশংস। সেই হত্যাকাণ্ডৰ দৃশ্যৰ কথা। নদীখন সাঁতুৰি পাৰ হােৱা এই কিশোৰ-কিশোৰীসকলৰ অধিকাংশই মাতৃ-ভাতৃ-ভনীক হেৰুৱাইছে। এই বর্বৰ হত্যাকাণ্ডত। তেওঁলোকৰ পৰাও কেইবাজনে চিনি পাইছিল। হত্যাকাৰী বিজিত, অনিল, কীর্তি, ৰজেনহঁতক।

বিজিত বড়োৱে মাতি আনিছিল হত্যাকাৰীকঃ বাঁহবাৰী ফৰেষ্ট ৰেঞ্জৰ বনকমী বিজিত বড়োৱে মাতি আনিছিল হত্যাকাৰীসকলক। বিজিত বড়ো হত্যাকাণ্ড সংঘটিত হােৱাৰ প্ৰায় আধা ঘন্টা পূর্বেই গাঁওখনলৈ গৈ উপস্থিত হৈছিল। তেওঁৰ আগমনত গাঁৱৰ মানুহ বিশেষ আতংকিত হােৱা নাছিল। কাৰণ তেওঁ ইয়াৰ আগতেও গাঁওখনলৈ সঘনে আহ-যাহ কৰিছিল। সেইদিনা তেওঁ গাঁওখনত উপস্থিত হৈ চিনাকি মানুহৰ লগত আলোচনা-বিলোচনা কৰিছিল। সমগ্ৰ গাঁও ঘূৰি চাই তেওঁ পুৰুষ মানুহৰ অনুপস্থিতিৰ কথা ফোন যোগে সতীর্থ হত্যাকাৰীসকলক জনাইছিল। এই কথা-বতৰাবোৰ নিজ কাণেৰে শুনিছিল নিহত মাজনী খাতুনৰ মাতৃ আজিৰন নেছাই। (কথাবােৰ মাজনী খাতুনৰ পিতৃ-মাতৃৰ মুখেৰে, ঘটনাৰ বাস্তৱ চিত্র’ শীর্ষক লেখাত ইতিপূর্বে বিস্তাৰিত ভাবে উল্লেখ কৰিছে)। বিজিত বড়ো নামৰ লোকজনে নিজৰ হাতেৰে গুলীয়াই মানুহক হত্যা কৰাৰ কথা প্রায় সকলোকেইজন প্রত্যক্ষদশীয়ে বর্ণনা কৰিছে। এই হত্যাকাণ্ডত বাঁহবাৰী ৰেঞ্জৰ বনকমী কীর্তি বড়ো, অনিল বড়ো, জগত বড়ো, বিজিত বড়ো, ৰজেন বড়ো আদিয়ে হত্যাকাণ্ড চলোৱাৰ কথা প্রত্যক্ষদশীসকলে আমাৰ আগত স্বীকাৰ কৰাৰ লগতে তেওঁলোকৰ লগতে কেইবাজনো সতীৰ্থৰ বিৰুদ্ধে এজাহাৰো দাখিল কৰিছে।

মুঠতে হত্যাকাণ্ডৰ আগত উত্তেজনাৰ সৃষ্টি কৰা বক্তব্য প্রদান কৰাৰ বাবে বিপিএফ নেত্রী তথা বিধায়িকা, তদানিন্তন প্রাক্তন মন্ত্রী, বর্তমানৰ বনমন্ত্রী প্রমীলাৰাণী ব্ৰহ্মা, হত্যাকাণ্ডৰ বুপ্রিন্ট ৰচনা কৰাৰ বাবে বাঁহবাৰী ৰেঞ্জৰ বন বিষয়া অমিয় কুমাৰ ব্ৰহ্ম আৰু হত্যাকাৰীসকলক ৰক্ষণাবেক্ষণ প্রদান কৰা বিটিচিৰ উপ-কার্যবাহী খাম্পা বৰগয়াৰীও সমানে অপৰাধী বুলি ভুক্ত ভোগীসকলে গোচৰ বা এজাহাৰ দিছিল যদিও প্ৰভাৱশালী লোকসকল আইনৰ সুৰুঙাৰে সাৰি যাবলৈ সক্ষম হৈছে। ওপৰত উল্লেখ কৰা বিষয়বোৰ আগত ৰাখি নিৰপেক্ষ আৰু উচ্চ পর্যায়ৰ তদন্ত ক্ষীপ্ৰতাৰে কৰিলে নাৰায়ণগুৰিৰ হত্যাকাণ্ডৰ লগত জড়িত প্ৰতিজন অপৰাধীক কৰায়ত্ব কৰিবলৈ সক্ষম হ’ল হেঁতেন চৰকাৰ-প্ৰশাসনে।

এই খিনিতে উল্লেখ কৰিব লাগিব যে ১৯৮০ চনৰ আগৰ পৰাই অসমৰ ধৰ্মীয় সংখ্যালঘু সকলক ধাৰাবাহিক ভাবে অত্যাচাৰ-উৎপীড়ণ অব্যাহত ৰখাৰ অংশ হিচাপে ১৯৮৩, ১৯৮৯-৯৪, ২০০৮, ২০১২ আৰু ২০১৪ চনত নির্বিচাৰে হত্যা কৰা কৰি থকা হ’ল। এইখিনিতে পুনৰ মনত পেলাই দিয়া উচিত যে এই সকলো হত্যাকাণ্ডৰ সময়ত ৰাজ্য আৰু কেন্দ্ৰত সেই একেই তথাকথিত সংখ্যালঘু দৰদীৰ চৰকাৰ আছিল। মন কৰিবলগীয়া যে সংখ্যালঘু সকলৰ সমস্যাকলৈ সততে ঘৰিয়ালৰ চকুপানী টােকা সেই শাসকগোষ্ঠীয়ে উপৰােক্ত কোনো এটা হত্যাকাণ্ডৰে সুবিচাৰ নকৰিলে।

গণতন্ত্রত ঘোৰ বিশ্বাসী সহজ-সৰল জনতাই বনাই দিয়া চৰকাৰৰ উচ্চপদস্থ মন্ত্রী-আমোলা, চৰকাৰী বিষয়া আৰু প্রশাসন যন্ত্ৰই সংখ্যালঘুৰ হত্যাকাৰীসকলক মুক্ত বিচৰণ কৰিবলৈ এৰি দিয়ে। কাৰণ আমাৰ জ্ঞান আৰু সাহসৰ অভাৱ। আমি মনত ৰখাটাে প্রয়ােজনবােধ নকৰাে যে— মোৰ মাতৃক পাষণ্ডসকলে কেতিয়া উলঙ্গ কৰিছিল, কেতিয়া মোৰ ভনী-বাইদেউক ধর্ষণ কৰিছিল আৰু কোন দিনা মোৰ সকলো আত্মীয়, সমস্ত সত্তাক হত্যা কৰিছিল।

(বিঃদ্রঃ লেখকৰ ‘বিষাদলেণ্ড নাৰায়ণগুৰি” নামৰ গ্ৰন্থৰ পৰা তথ্য সংগ্ৰীহিত)

একে প্ৰসঙ্গতঃ  Khagrabari to Baguriguri: The Shame Unlimited

http://www.ganaadhikar.com/04052017/hd/page4.html

—লেখকঃ সাজাহান আলী আহমেদ

বৰপেটাৰোড- ৯৪ ০১৯১৬২২৩

বাতৰি কাকতত প্ৰকাশঃ

Read More