উচ্ছেদঃ এটি হৃদয় বিদাৰক শব্দ

উচ্ছেদ শব্দটোৱে চকুৰ আগত ভঁহাই তোলে হাজাৰ অসহায় মুখৰ ছবি৷


তেওঁলোক মানুহ
সেইবাবে দুবেলা-দুমুঠি পেটত দিব লাগে,
তেওঁলোকৰ লজ্জা নিবাৰণৰ বাবে লাগে কাপোৰ,
থাকিবলৈ লাগে এখন ঘৰ৷
তেওঁলোকে বুজি নাপায় আইনী মেৰপেচ৷
মানুহতকৈ জীৱ-জন্তুৰ মূল্য বেছি বুলিও নাযানে তেওঁলোকে৷
একো বুজি নোপোৱা পানী কেঁচুৱাবোৰক মানুহ কৰিব বিচাৰিছিল তেওঁলোকে৷
যি সময়ত চৰকাৰী হাজাৰ হাজাৰ বিঘা মাটি কোম্পানী, পুঁজিপতি, বনিয়া গোষ্ঠীক এৰি দিব পাৰে৷ তেনে সময়তে অসমৰ থলুৱা মানুহৰ মাটি-ভেটি উছন কৰি পথৰ ভিক্ষাৰীত পৰিণত কৰোৱা কাৰ্য্য কোনো পধ্যেই গ্ৰহণযোগ্য নহয়৷ প্ৰথমে তেওঁলোকৰ পুনৰ সংস্থাপনৰ ব্যৱস্থা কৰা উচিত আছিল৷
সামান্য মানৱতাবোধ থকা লোকেও কেতিয়াও এনে বৰ্বৰ উচ্ছেদৰ সমৰ্থন কৰিব নোৱাৰে৷
মই এটা কথা বুজি নাপাওঁ— আমাৰ সকলোৰে আস্থাভাজন ন্যায়ালয়ে উচ্ছেদৰ নিৰ্দেশ দিয়াৰ সময়ত পুনৰ সংস্থাপনৰ নিৰ্দ্দেশ কিয় নিদিয়ে ? ন্যায়াধীশসকল মানুহ নহয় নেকি ?
ভাৰত স্বাধীন হৈছিল ইয়াৰ স্থয়ী বাসিন্ধাৰ অন্ন, বস্ত্ৰ, বাসস্থানৰ নিৰাপত্তাৰ স্ল’গানলৈ৷ আজি সেইবোৰ খৰ্ব হ’ব ধৰিছে৷ প্ৰাকৃতিক দুৰ্যোগত ক্ষতিগ্ৰস্থ হোৱা লোকৰ বাবে সাহায্য, নিৰাপত্তা দিয়াৰ বিভাগ আছে চৰকাৰৰ, উচ্ছেদিত লোকৰ বাবে মানৱতাৰ দৃষ্টিৰে দেখাৰ কোনো ব্যৱস্থা কিয় নাই ?

নিজৰ দেশ, নিজৰ ঘৰৰ দৰেই আপোন৷ 

আপোন ঘৰতেই অঘৰী হোৱাজনৰ হৃদয় নাভাঙিব নে?
তেওঁলোকৰ মৌলিক অধিকাৰ খৰ্ব হোৱা নাই নে ?
এতিয়াও ভাৰতৰ অধিকাংশ মানুহ ভূমিহীন৷
ভূমি থকা বহুলোকৰ পট্টা নাই৷
তেওঁলোকৰ কি হ’ব ?
এই প্ৰশ্নবোৰ উত্থাপন হয়৷ উত্তৰ দিয়া কোনো নাই৷

কেতিয়াবা প্ৰশ্ন হয়— ক্ষমতা লাভ কৰিলেই সভ্য মানুহবোৰ অসভ্য হৈ যায় নেকি ?

Read More

তিনি তালাকঃ জ্ঞানৰ দৈন্যতা

তিনি তালাক বিষয়ক একো ধাৰণা নথকা মানুহে টিভিৰ পৰ্দাত বা সামাজিক মাধ্যমত বিভিন্ন ধৰণৰ মতামত ব্যক্ত কৰা দেখা পাই আঁচৰিত লাগে৷ তেওঁলোকৰ অধিকাংশৰ মতে একেবাৰতে থিয় হৈ তালাক, তালাক, তালাক কৈ দিলেই তালাক হৈ যায়৷ কিন্তু তেওঁলোকৰ এই জ্ঞান শুদ্ধ নহয়৷

মহান আল্লাহ তায়ালা পবিত্র কুৰআন শৰীফৰ সূৰা তালাকত কৈছে— ‘হে নবী! (উম্মতক কওক) তোমালোকে যেতিয়া স্ত্ৰীক তালাক দিব বিচৰা, তেতিয়া তোমালোকে ইদ্দতৰ প্ৰতি লক্ষ্য ৰাখি, ইদ্দত (ঋতুশ্ৰাৱ) গণনা কৰিবা। তোমালোকে আল্লাহক ভয় কৰিবা। সিহঁতক গৃহৰ পৰা বহিষ্কাৰ নকৰিবা আৰু সিহঁতে যাতে নিৰ্লজ্জ কোনো কাম নকৰিলে গৃহৰ পৰা ওলাই নাযায়। এয়া আল্লাহৰ নিৰ্ধাৰিত সীমা। যিয়ে আল্লাহৰ সীমা লঙ্গন কৰে, তেওঁ নিজৰ ক্ষতি কৰে। তুমি নাজানা, হয়তো আল্লাহই ইয়াৰ পিছত কোনো নতুন উপায় কৰি দিব।’— (সূৰা তালাক, আয়াত নং-১)

তিনি তালাক একেলগে দিয়া বৈধ নহয়৷ এক তালাক মানে সকীয়নীহে মাথো৷ প্ৰতিটো তালাকৰ মাজত কমপক্ষে ১ (এক) ইদ্দতকালৰ(মাহেকীয়া) ব্যৱধান হোৱা বাঞ্চনীয়৷ ইয়াত স্বাধী-স্ত্ৰী দুয়োৰ বাবে চিন্তা কৰাৰ বা ভুল শুধৰণী কৰাৰ বাবে প্ৰায় তিনি মাহ সময় থাকে৷

কিন্তু দেখা যায় একাংশ অধিবক্তা আৰু অজ্ঞলোকে একেলেথেৰিয়ে তিনি তালাক দি দিয়ে, যিটো ইছলামৰ মতে অবৈধ৷ (এই সম্পৰ্কে বহু আলোচনা কৰিলেহে স্পষ্ট হ’ব, অতি চমুকৈ মই ধাৰণাটোহে দিছো৷)

— কোৰাণৰ বিধানৰ বিষয়ে বহুল প্ৰচাৰ নোহোৱাৰ বাবে আৰু কোৰাণৰ জ্ঞান নথকাৰ বাবে ভাৰতৰ অশিক্ষিত আৰু পৰম্পৰাগত শিক্ষাৰে শিক্ষিত লোকে তালাক শব্দটোৰ অপব্যৱহাৰ কৰি আহিছে৷

আইন যিমানেই প্ৰণয়ণ নহওঁক কিয়, মানুহ সচেতন আৰু গুণগত শিক্ষাৰে শিক্ষিত নহ’লে নাৰী নিৰ্জাতন বন্ধ নহ’ব৷

সিযিকি নহওঁক— ইছলামত নাৰীৰ মৰ্যাদা কিমান সেই সম্পৰ্কেও তালাক লৈ চৰ্চা কৰাসকলে জানিব লাগিব৷

সকলো সমস্যাৰ এটাই সমাধান সু-শিক্ষাৰে শিক্ষিত হ’ব লাগিব৷

Read More

গোৱৰ্দ্ধনাত উত্তেজনা, আক্রান্ত ৰাইজৰ মুখামুখী হােৱাৰ সাহস নহ’ল মন্ত্রী প্রমীলাৰ

আজি প্রতিবাদী সভা, ঘটনাস্থলীত নৱ শৰণীয়া, উত্তেজনা

বৰপেটাৰোড, ২০ আগষ্টঃ

আজি সন্ধিয়া প্রায় ৬ বজাত অসম চৰকাৰৰ বনমন্ত্রী প্রমীলাৰাণী ব্ৰহ্মাই গোৱৰ্দ্ধনাৰ গৰাখহনীয়াত ক্ষতিগ্রস্থ হােৱা অঞ্চল পৰিদৰ্শন কৰাৰ বাবে বৰপেটাৰােডলৈকে আহিও বেঁকীৰ পাৰত উপস্থিত হােৱাৰ সাহস গোটাব নােৱাৰি প্রশাসনে অনুমতি নিদিয়াৰ অজুহাত দেখুৱায়। শাসকীয় চৰকাৰৰ মিত্র দল বিপিএফৰ পৰা প্রতিনিধিত্ত কৰা ব্ৰহ্মক স্থানীয় বিধায়ক তথা বিজেপিৰ ৰাজ্যিক সভাপতি ৰঞ্জিত কুমাৰ দাসে উক্ত স্থানলৈ নোযোৱাৰ বাবে ৰাজনৈতিক হেঁচা প্রয়োগ কৰাৰ অভিযোগ উত্থাপন হৈছে আৰু নিজৰ ব্যর্থতা ঢকাৰ বাবে ৰাইজৰ সমস্যা আহিলেই কুম্ভকৰ্ণ নিদ্ৰাত থকা বিধায়ক গৰাকীয়ে এনে নিকৃষ্ট ৰাজনীতি কৰা বুলি ৰাইজৰ মাজত ব্যাপক প্রতিক্রিয়াৰ সৃষ্টি হৈছে। বাৰম্বাৰ বিভিন্ন দল-সংগঠন আৰু ভূক্তভোগী পৰিয়ালে বেঁকীৰ গৰাখহনীয়াৰ বিজ্ঞানসন্মত ভাবে সমাধান কৰাৰ বাবে দাবী উত্থাপন কৰি অহাৰ পিছতো বিধায়ক গৰাকীয়ে নিজৰ চকীখনকে খামুচি ধৰি ৰখা কামত ব্যস্ত থকা বুলিও চর্চা অব্যাহত আছে। উল্লেখ্য যে প্রবল গৰাখহনীয়াৰ ফলত বৰপেটাৰোড মানাহ সংযোগী পথৰ প্ৰায় আধা অংশ বেঁকীত জাহ যোৱাৰ ফলত বৰপেটাৰোড পৰা মানাহ ৰাষ্ট্ৰীয় উদ্যান, শালবাৰী, আনন্দ বজাৰকে আদি কৰি সমগ্ৰ উত্তৰ অঞ্চলৰ যোগাযোগ বিচ্ছিন্ন হৈ পৰাৰ পিছতো গা লৰা নাই পৰিৱৰ্তনৰ ভুৱা প্ল’গান দিয়া বিজেপি নেতৃত্বাধীন মিত্ৰজোঁটৰ অসম চৰকাৰৰ। ইফালে বেঁকীৰ গৰাখহনীয়াস্থলীত কোকৰাঝাৰৰ সাংসদ নৱকুমাৰ শৰণীয়াই উপস্থিত গৰাখহনীয়াৰ বুজ লোৱাৰ সময়ত উত্তপ্ত পৰিস্থিতিৰ সৃষ্টি হােৱা পৰিলক্ষিত হয়। ভোটৰ সময়ত আশ্বাস দিয়াৰ পিছতো ৰাইজৰ খবৰ লোৱাৰ আহৰি নােপোৱাৰ বাবেই এনেদৰে ক্ষোভ ব্যক্ত কৰে একাংশ ক্ষুব্ধ ৰাইজে।

প্রশাসনে প্রমিলাৰাণীক বাধা দিয়া নাছিলঃ ৰাজ্য চৰকাৰৰ হাতত কোটি কোটি টকা থকা বুলি দম্ভালি মৰা অসম চৰকাৰে বানগৰাখহনীয়াৰ কবলত পৰা লোকক উপযুক্ত পৰিমাণৰ ক্ষতিপূৰণ প্রদান কৰাত চৰম ভাবে ব্যর্থ হােৱাৰ পিছত মতিভ্ৰম হােৱা পৰিলক্ষিত হৈছে। আজি গোৱৰ্দ্ধনাৰ গৰাখহনীয়াথলীত উপস্থিত হৈ ৰাইজক একো দিব নোৱাৰাৰ ভয়ত বৰপেটাৰোডৰ পৰাই উভতি যোৱা মন্ত্রী প্রমীলাৰাণী ব্ৰহ্মক প্রশাসনে অনুমতি নিদিয়া বুলি ভুৱা প্ৰচাৰ কৰা বুলি স্পষ্ট হৈ পৰিছে। জানিব পৰা মতে জিলা প্রশাসনে মন্ত্রীগৰাকীক উক্ত গৰাখহনীয়াগ্রস্থ অঞ্চল পৰিদৰ্শন কৰাৰ ক্ষেত্ৰত কোনো ধৰণৰ বাধা আৰােপ কৰা নাছিল।

আজি প্রতিবাদী সভাঃ বেঁকীৰ গৰাখহনীয়া বিজ্ঞানসন্মত ভাবে প্ৰতিৰােধ কৰা, বিশ্বখ্যাত মানাহ ৰাষ্ট্ৰীয় উদ্যানৰ গৌৰৱ ৰক্ষা কৰা আৰু হাজাৰ হাজাৰ কৃষকৰ ভৱিষ্যত সুৰক্ষিত কৰাৰ দাবীত স্থানীয় বিভিন্ন দল-সংগঠনৰ উদ্যোগত গোৱৰ্দ্ধনাৰ লক্ষ্মৗচাকত সোমবাৰে আবেলি ৩ বজাত এখন প্রতিবাদী সভা অনুষ্ঠিত কৰিব বুলি জানিবলৈ দিছে।

ৰাইজৰ মাজত হাঁহাকাৰঃ গৰাখহনীয়াত ক্ষতিগ্রস্থ হােৱা পৰিয়ালসমূহে চৰকাৰী সাহায্য পর্যাপ্ত পৰিমাণে লাভ নকৰাৰ ফলত সমগ্র অঞ্চলত এক হাঁহাকাৰময় পৰিৱেশৰ সৃষ্টি হৈছে।

Read More

বৰপেটাৰােড-মানাহ ৰাষ্ট্ৰীয় উদ্যানৰ লগত যোগাযোগ বিচ্ছিন্ন

গোৱৰ্দ্ধনাত বেঁকীৰ গৰাখহনীয়াৰ কালৰূপ

খহিল গড়কপ্তানি পথ, চলিত বৰ্ষত গৃহহীন ৮০ টা পৰিয়াল

১৮ আগষ্ট, ২০১৭ঃ

যোৱা কিছু দিনৰ পৰা অব্যাহত থকা মুষলধাৰ বৰষুণ আৰু জাননী নিদিয়াকৈ এৰি দিয়া কুৰিশ্ব জলবিদ্যুত প্রকল্পৰ পানী এৰি দিয়াৰ ফলত বেঁকীৰ গৰাখহনীয়া প্রবল হৈ পৰিছে। আজি দুপৰীয়া বৰপেটাৰােড মানাহ সংযোগী পথৰ প্ৰায় দুই মিটাৰকৈ অংশ বেঁকীত জাহ যোৱাৰ ফলত বৰপেটাৰােডৰ পৰা মানাহ ৰাষ্ট্ৰীয় উদ্যান, শালবাৰী, আনন্দ বজাৰকে আদি কৰি সমগ্ৰ উত্তৰ অঞ্চলৰ যোগাযোগ বিচ্ছিন্ন হৈ পৰিছে। উল্লেখ্য যে ২০০৪ ইং চনৰপৰা ভূটানৰ কুৰিশ্বৰ বান্ধৰ পৰা পানী এৰি দিয়াৰে পৰা অব্যাহত থকা বেঁকীৰ গৰাখহনীয়া কাল ৰূপৰ ফলত বৰপেটা-বাক্সাৰ নাৰায়গুৰী, এলেঙামাৰী, কলপানী, ৰাঘববিল, বিশপানী, মৈথামাৰী, খাগ্ৰাবাৰী উত্তৰ খাগ্ৰাবাৰী, শিমুলবাৰী, গোৱৰ্দ্ধনা, গোৱৰ্দ্ধনা গাওঁ আৰু বৰপেটা জিলাৰ গামাৰীগুৰী, উত্তৰ ছাফাকামাৰ, ছাফাকামাৰ, কাটাঝাৰ, উত্তৰ কাটাঝাৰ আদি কৰি ডুমুনীলৈকে এই বৃহত অঞ্চলৰ গাওঁসমূহ আজি মানচিত্ৰৰপৰা নাইকিয়া হৈ গ’ল। বিগত ২০০৪ চনৰ পৰা গৰাখহনীয়াৰ কৱলত পৰি প্রায় তিনি সহস্রাধিক পৰিয়াল গৃহহাৰা হ’ল, হাজাৰ-হাজাৰ বিঘা কৃষি ভূমি বেঁকীৰ বুকুত বিলিন হৈ গ’ল তথাপিওঁ পূৰ্বৰ কংগ্রেছ চৰকাৰ আৰু বর্তমানৰ বিজেপি চৰকাৰখনে কোনো ধৰণৰ গুৰুত্ব আৰোপ নকৰিলে। বেঁকীৰ এই প্রবল গৰাখহনীয়া প্ৰতিৰোধৰ দাবীত বিভিন্ন প্রতিবাদী কাৰ্যসূচী ৰূপায়ন কৰাৰ লগতে ২০১৫ চনত অক্টোবৰ মাহত সদৌ অসম সংখ্যালঘু ছাত্র ইউনিয়ন চমুকৈ আমছৰ নেতৃত্বত আমৰণ অনশন কাৰ্য্যসূচী ৰূপায়ন কৰিছিল যদিও তদানিন্তন তৰুণ গগৈ নেতৃত্বাধীন অসম চৰকাৰৰ গা লৰাব পৰা নাছিল। চলিত বছৰৰ জুলাই মাহৰপৰা গামাৰীগুৰী, উত্তৰ ছাফাকামাৰ গাওঁত ধাৰাবাহিক ভাৱে গৰাখহনীয়া অব্যাহত থকাৰ ফলত উত্তৰ ছাফাকামাৰ গাওঁৰ মুঠ ৮০ টা পৰিয়ালৰ ঘৰ-ভিটা জাহ গৈছে যদিও পূৰ্বৰ দৰে বৰ্তমানেও ভূক্তভোগী পৰিয়ালৰ খবৰ লোৱাৰ আহৰি পোৱা নাই স্থানীয় বিধায়ক তথা অসম ৰাজ্যিক বিজেপিৰ সভাপতি ৰঞ্জিত কুমাৰ দাসে। আনকি বৰপেটা জিলা প্রশাসনৰ তৎপৰতাত আৰম্ভ হােৱা পাইলিং আৰু জিঅ’ বেগৰ কামো কুম্বকৰ্ণ নিদ্ৰাত থকা বিধায়ক গৰাকীৰ ছত্ৰছায়াতে স্তব্দ হৈ পৰাৰ তথ্য পোহৰলৈ আহিছে। ইফালে ক্ষমতাত থকা সময়ত ৰাইজৰ খবৰ লোৱাৰ আহৰি নােপোৱা কংগ্ৰেছ দলৰ ৰাজ্যিক সভাপতি তথা সাংসদ ৰিপুন বৰাই কালি গোৱৰ্দ্ধনা অঞ্চলত উপস্থিত হৈ ঘৰিয়ালৰ চকুলোঁ টুকে। উল্লেখ্য যে উক্ত গড়কাপ্তানি পথছোৱা বেঁকীৰ বুকুত জাহ গ’লে বেঁকীৰ বাঢ়নী পানীয়ে কাটাঝাৰ, ছাফাকামাৰ, বংশিবাৰী, ভাটৌপুখুৰী, আইখাৰী, বিলাসীপাৰা,বুনমাজা, আটাগাওঁ, মৈৰাঝাৰ, গান্ধাৰীপাৰা, মেচপাৰা, বাৰাগুৱা, কুছিয়াখান্দা, কয়েমাৰী, বৰঘোপা, খুশ্রাবাৰী, নিমুৱা, ঢেকীয়াজনী আদি প্রায় অর্ধশতাধিক গাওঁ পানীৰ তলত বুৰ যোৱাৰ প্ৰবল সম্ভাৱনা নুই কৰিব নোৱাৰি।

বিস্তাৰিত পোৱাৰ বাবে তলৰ ভিডিঅ’ প্ৰত্যক্ষ কৰক—

Read More

তোমাক হত্যা কৰিম¸ প্ৰস্তুত থাকিব

(১)

তোমাক মই হত্যা কৰিম¸
তোমাৰ তেজৰ চেঁকুৰাত সাঁতুৰিম
বন্য উল্লাসত নাচিম-হাঁহিম
মই গণতন্ত্ৰৰ পাঠ পঢ়িব নিবিচাৰো
তোমাৰ পৰা
মোক শিকাব নালাগে তুমি
বিশ্বাসৰ সংঞ্জা

তুমি প্ৰস্তুত হৈ থাকিবা
তোমাক হত্যা কৰি
প্ৰদান কৰিম ৫ লাখ টকা
ভিক্ষাৰী কেইটাই চেলেকিব পৰা
দুৰ্গন্ধময় ব্ৰেডৰ টুকুৰা;
মই ভালদৰেই জানো
পুখুৰীৰ মাছৰ চৰ্বিৰ খবৰ
আৰু চোক ভেঁকুলীৰ আস্ফালন।

(২)

হেৰ’ বিশ্বাসঘাতকৰ নায়ক
এইবাৰ
তোক হত্যা কৰি
১ কোটি ভিক্ষা দিলে
মান্তি হ’বি নে ?

Read More