ভোটদান বাধ্যতামূলক নে ? চকিদাৰী কিমানদূৰ খাটিব

 ভোটদান বাধ্যতামূলক কৰাৰ বাবে বিভিন্ন সময়ত প্ৰচেষ্টা চলোৱা হৈছে৷ এই প্ৰচেষ্টা বিভিন্ন সময়ত ব্যৰ্থ হৈছে যদিও বিষয়টো আলোচনাৰ প্ৰয়োজন আছে৷ বহু লোকে ভোটদানৰ দৰে পবিত্ৰ কৰ্তব্য পালন কৰাত অবহেলা কৰে৷ এই অৱহেলা বিশেষ ভাবে শিক্ষিত লোকৰ মাজত গা কৰি উঠা দেখা যায়৷ ইয়াৰ বিপৰীতে অৰ্ধ শিক্ষিত বা অশিক্ষিত, দৰিদ্ৰ লোকে বহিঃ ৰাজ্যত বা বহিঃ ৰাষ্ট্ৰত কৰ্মৰত হৈ থৈকিলেও একমাত্ৰ ভোটদানৰ বাবেই হাজাৰ হাজাৰ টকা ব্যয় কৰি ঘৰলৈ আহে৷ এই ভোটদানৰ প্ৰৱনতা  ধৰ্মীয় সংখ্যালঘু সম্প্ৰদায়ৰ লোকৰ মাজত অধিক৷ ভোটদান নকৰিলে ভোটাৰ তালিকাত নাম কৰ্তন অথবা ডি ভোটাৰ হোৱাৰ ভয়ানক সপোনে খেদি ফুৰে সংখ্যালঘু দৰিদ্ৰ লোকক৷ তাৰ লগতে ভোটদান নকৰিলে নাগৰিকৰ কৰণীয়ত কেৰুণে ধৰিব বুলিও বহুতৰে ধাৰণা৷

 নেলীৰ গণহত্যা হোৱাৰ অন্তৰালত ভোটদানেই আছিল মূল কাৰণ৷ অসম আন্দোলনৰ কৰ্মী-সমৰ্থকসকলে ১৯৮৩ ৰ নিৰ্বাচন বৰ্জন কৰাৰ বাবে আহ্বান জনাইছিল যদিও সংখ্যালঘু লোকে তদানিন্তন প্ৰধানমন্ত্ৰী ইন্দিৰা গান্ধীৰ আহ্বান মৰ্মে আৰু অভয়বাণী সাৰোগত কৰি ভোটদান কৰিছিল৷ ফলশ্ৰুতিত প্ৰাণ দিব লগা হৈছিল প্ৰায় তিনি সহস্ৰাধিক লোকে৷ নিৰ্বাচনত ভোটদান নকৰিলে ভোটাৰ তালিকাৰ পৰা নাম কৰ্তন হ’ব বুলি নাইবা ডি ভোটাৰ সজোৱা হ’ব পাৰে বুলি একাংশ জাতীয় (?) নেতাই ভূৱা প্ৰচাৰৰ জৰিয়তে সৰ্বসাধাৰণ ৰাইজক ভয় দেখুৱাই ভোট বেংকৰ ৰাজনীতি কৰা লোকসকলৰ স্বাৰ্থ সিদ্ধি কৰি আহিছে৷  

বিভিন্ন সময়ত এনে চেষ্টা বিফল হয়৷ ভোটদানৰ বিষয়লৈ বহু ৰাজ্যতেই সৰব চৰ্চা চলে৷ চৰকাৰী ভাবে ভোটদানৰ প্ৰতি জনতাক আগ্ৰহী কৰোৱাৰ আঁচনি লোৱা হয়৷ এয়া নিঃসন্দেহে গণতন্ত্ৰৰ বাবে দৰকাৰী৷ কিন্তু এই ভোচদান বাধ্যতামূলক কৰা অযুক্তিকৰ৷ কিন্তু ভোটদান বাধ্যতামূলক কৰাৰ বাবে বিভিন্ন সময়ত বিভিন্ন প্ৰচেষ্টা চলোৱা হৈছে৷ নৰেন্দ্ৰ মোদী মুখ্যমন্ত্ৰী হৈ থকা সময়ত গুজৰাটত ভোটদান বাধ্যতামূলক কৰাৰ প্ৰচেষ্টা কৰা হৈছিল৷ গুজৰাট বিধানসভাত ‘গুজৰাট লোকাল অথৰিটিজ ল‘জ (এমেণ্ডমেন্ট) বিল, ২০০৯’ গৃহীত কৰা হয়৷ কিন্তু তদানীন্তন ৰাজ্যপাল কমলা বেনিওয়ালে বিলত সম্মতি নিদি উভতাই পঠায়৷ সেয়াই নহয় কিয় এই বিলত সন্মতি দিয়া নাযায় সেই সম্পৰ্কে তেওঁ লিখি জনাই উত্তৰ দিয়ে- “ভোটাৰক ভোট দিবলৈ বাধ্য কৰোৱা ব্যক্তি স্বাধীনতাৰ পৰিপন্থী” বুলি৷  এই বিলৰ কোনো পৰিৱৰ্তন নকৰি গুজৰাট বিধানসভায় বিলটো পুনৰায় ৰাজ্যপাললৈ পঠায়, বেনিওয়ালে বিলটোক উলমাই ৰাখে৷ কিছুদিন পিছত ৰাজ্যপালৰ পৰিৱৰ্তন হৈ ও পি কোহলিয়ে উক্ত বিলত সন্মতি প্ৰদান কৰে৷ তাৰ পৰৱৰ্তী সময়ত গুজৰাট চৰকাৰে উক্ত বাধ্যতামূলক ভোটদানৰ বিল সম্পৰ্কত চাৰ্কোলাৰ জাৰি কৰি ভোটদান নকৰা লোকৰ পৰা ১০০ টকা জৰিমনা আদায় লোৱা হ’ব বুলি ঘোষণা কৰে৷ ইয়াৰ বিৰুদ্ধে আইনজীৱী কে আৰ কোষ্ঠীয়ে গুজৰাট উচ্চ ন্যায়ালয়ত গোচৰ তৰে৷ উক্ত ৰায়দানত গুজৰাট হাইকোৰ্টে কয় যে ‘ভোটদানৰ অধিকাৰৰ মাজতেই ভোট নিদিয়াৰো অধিকাৰ নিহিত হৈ আছে৷’ গুজৰাট হাইকোৰ্টত মোদীৰ গুজৰাট চৰকাৰে মুখথেকেচা খায়৷ উচ্চ ন্যায়ালয়ে উক্ত বিল স্থগিত কৰে৷ 

ভোটদান বাধ্যতামূলক কৰাৰ প্ৰবল ইচ্ছা শক্তি থকাৰ বাবেই হয়তো প্ৰধানমন্ত্ৰী হোৱাৰ পিছতো নৰেন্দ্ৰ মোদীয়ে সমগ্ৰ ভাৰততেই এই বিল অনাৰ প্ৰয়াস কৰিছিল৷ চৰকাৰী ভাবে নহ’লেও বাধ্যতামূলক ভোটদান সংক্ৰান্তত বিহাৰৰ মহাৰাজগঞ্জৰ বিজেপি সাংসদ জনাৰ্দন সিং সিগৰিওৱালে লোকসভাত এই বিল উত্থাপন কৰে৷ এই সিগৰিওৱাল জেষ্ঠ নেতা, তেওঁ বিহাৰৰ বিধানসভাত চাৰিবাৰকৈ বিধায়ক হিচাপে নিৰ্বাচিত হৈছিল৷ লোকসভাত ভোটদান বাধ্যতামূলক কৰিব বিচৰা বিলখনত কোৱা হয় যে ২০১৪ চনৰ সাধাৰণ নিৰ্বাচনত নিৰ্বাচন আয়োগে ১৮ হাজাৰ কোটি টকা খৰচ কৰাৰ পাছতো ৩৪ শতাংশৰো  অধিক লোকে ভোটদান কৰা নাই৷ সিগৰিওয়ালে যিসকলে ভোটদান নকৰিব তেওঁলোকৰ ওপৰত শাস্তিমূলক ব্যৱস্থা গ্ৰহণ কৰাৰ প্ৰস্তাৱ আগবঢ়াইছিল৷ তেওঁৰ বিলত থকা প্ৰস্তাৱ অনুসৰি যিসকলে ভোটদান নকৰিব তেওঁৰ পৰা ৫০০ টকা জৰিমনা লোৱা বা দুই দিনৰ কাৰাদণ্ড দিয়া বা ৰেচনকাৰ্ড বাজেয়াপ্ত হ’ব পাৰে বা পৰৱৰ্তী সময়ত নিৰ্বাচনত প্ৰতিদণ্ডিতা কৰিব নোৱাৰিব বা চৰকাৰী মালিকানাধীন সংস্থাৰ গৃহ বা ভূমি পোৱাৰ ক্ষেত্ৰত অযোগ্য হ’ব বা ঋণ অথবা যিকোনো কল্যানমূলক প্ৰকল্পৰ পৰা বঞ্চিত হ’ব আৰু ভোটদান নকৰা লোক চৰকাৰী কৰ্মচাৰী হ’লে ১০ দিনৰ দৰমহা কৰ্তন হ’ব পাৰে অথবা চাকৰীৰ ক্ষেত্ৰত দুই বছৰৰ বাবে পদোন্নতি হেৰুৱাব পাৰে৷ এই প্ৰস্তাৱত থকা উক্ত শাস্তিবোৰৰ মাজৰ পৰা যিকোনো এটা শাস্তি ভোটদান নকৰা লোকে ভোগিব লাগিল হেঁতেন যদিহে উক্ত বিল খন কাৰ্যকৰী কৰিব পাৰিলে হেঁতেন৷ প্ৰশ্ন হয় মডেল গুজৰাটত মুখ থেকেচা খোৱাৰ পিছতো মোদীৰ সহযোগী নেতাই এই বিল লোকসভাত কিয় উত্থাপন কৰিলে ? আৰু বিল খনক চৰকাৰী ভাবে অথবা দলীয় ভাবে লোকসভাত উত্থাপন কৰা নহ’ল কিয় ? নাগৰিকত্ব (সংশোধনী) বিধেয়ক- ২০১৬ কাৰ্যকৰী কৰাৰ বাবে যিদৰে যৎপৰোনাস্ত চেষ্টা কৰা হ’ল তাৰ বিপৰীত ছবি এই ক্ষেত্ৰত দেখা যোৱাৰ কাৰণ সকলোৱে বুজিবই পাৰিছে৷ তথাপিও বিষয়টো হয়তো মোদীয়ে পৰীক্ষামূলক ভাবে সাংসদৰ দ্বাৰা সংসদত উপস্থাপন কৰাই ‘নক’ কৰি চালে বুলি ক’ব পাৰি৷
সিগৰিওৱালৰ উক্ত বিধেয়ক সংসদত উত্থাপন হোৱাৰ পিছত বিধেয়কখনৰ সমৰ্থনত বিভিন্ন দলৰ সাংসদে সমৰ্থন আগবঢ়াই বক্তব্য দিয়ে৷ যেনে-  টিআৰএছৰ কে কবিতা, এনএলডিৰ দুষ্যন্ত চৌটালা প্ৰমুখ৷ এনে আইনৰ সমৰ্থকসকলৰ মতে দলিত, শ্ৰমিক আৰু বিভিন্ন পিছপৰা শ্ৰেণীৰ লোকক বলপূৰ্বক ভাবে ভোটদানৰ পৰা বিৰত ৰখা হয়৷ এনে আইনে বলপূৰ্বক ভোটদানৰ পৰা আঁতৰাই ৰখাৰ প্ৰৱনতা হ্ৰাস পাব বুলি তেওঁলোকে যুক্তি প্ৰদান কৰে৷ ইয়াৰোপৰি মাওবাদী বা বিভিন্ন বিচ্ছিন্নতাবাদী সংগঠন যিসকলে ভোটবৰ্জনৰ আহ্বান জনায় তেনেসকলকো মূলসূতীলৈ ঘূৰাই আনিব পাৰিব বুলিও মত ব্যক্ত কৰে৷  
এনে বাধ্যতামূলক ভোটদানৰ ধাৰণা যে অমূলক সেই কথা জানি-বুজিয়ে হয়তো এই বিলখনক লৈ বিশেষ চৰ্চা নহ’ল৷
ভোটাধিকাৰৰ দৰে এটা বিষয় লৈ সদনত বিধেয়ক পাছ কৰাই লৈ যোৱা তেনেই সহজ কাম৷ কাৰণ সংসদত যাবলৈ প্ৰতিজন সাংসদ, বিধায়কে ভোটৰ বিনিময়তেই উক্ত দায়িত্ব লাভ কৰে৷ কিন্তু গুজৰাটত যিদৰে এই বিল কাৰ্যকৰী কৰাৰ পিছতেই আইনজীৱীয়ে ন্যায়ালয়ৰ কাষ চাপিছিল, একেদৰে সমগ্ৰ ভাৰতত এনে বিধেয়ক আনিলে বহু নাগৰিকে জৰিমনা ভৰিব লাগিব, গতিকেই ন্যায়ালয়ৰ কাষ চাপিব৷ এইবোৰ কথা ঠিকেই আছে৷ মোৰ প্ৰশ্নটো হ’ল এই ধৰণৰ বিলক লৈ কোনো উত্তাল প্ৰতিবাদ বা আলোচনা নোহোৱা কথাটোৱে বহু কথাই কৈ যায়৷ আমাৰ সংবিধানে ১৯(১) অনুচ্ছেদত সাধাৰণ জনতাক মত প্ৰকাশৰ অধিকাৰ প্ৰদান কৰিছে৷ মই যদি মত প্ৰকাশ কৰো যে ‘মই ভোটদান নকৰো, কাৰণ মই এই ব্যৱস্থাৰ দ্বাৰা আশ্বস্ত নহয় বা সন্তুষ্ট নহয় ’৷ তেতিয়া মোক সংবিধানৰ উৰ্ধত গৈ কোনো ‘চকিদাৰে’ ভোটদান কৰিবলৈ বাধ্য কৰাব নোৱাৰে৷

Read More

NRC গুৰুত্ব পূৰ্ণ বিষয় আৰু সমাধান।

NRCৰ হিয়াৰিং সম্পৰ্কে কিছু জানিব লগিয়া কথা।

হিয়াৰিঙৰ নোটিচ আহিলেই ভয় বা আতংকীত হব নালাগে।আপোনাৰ নাম সম্পূৰ্ণ খচৰাত আহিলেও কেইবাটাও কাৰণত আপোনাৰ নামত হিয়াৰিঙৰ নোটিচ আহিব পাৰে। যেনে-

(১) আপোনাৰ বংশধৰৰ কাৰোবাক পৰিক্ষন বা সাক্ষীৰ প্ৰয়োজনৰ বাবে আপোনাৰ নামত নোটিচ আহিব পাৰে।

(২) অইন কোনোবাই আপোনাৰ লিগেছীত সুমুৱাৰ সন্দেহ হলে৷

(৩) আপোনাৰ জবান বন্দীৰ প্ৰয়োজনবুধ কৰিলেও আপোনাৰ নামত নোটিচ আহিব পাৰে।

নিজৰ হিয়াৰিংলৈ যাওঁতে নোটিচত উল্লেখ থকা যাবতীয় নথি পত্ৰ (অৰ্জিনাল কপি সহ) লগত লৈ যাব লাগিব।

কাৰোবাৰ সাক্ষী দিবলৈ গ’লে, সেই সাক্ষীজনে তলত দিয়া ধৰণে নথি-পত্ৰ লগত লৈ যাব লাগিব
(১)নিজৰ পৰিচয় পত্ৰ, যেনে ভোটাৰ পৰিচয় পত্ৰ বা পান কাৰ্ড অথবা ড্ৰাইভিং লাইচেঞ্চ৷
(২) সম্পূৰ্ণ খচৰাত নাম অন্তৰভূক্ত হোৱাৰ তালিকা৷
(৩) লিগেচী আৰু বংশ বৃক্ষৰ তালিকা ।

আবেদন প্ৰ পত্ৰ বা দাবী আপত্তিৰ প্ৰ পত্ৰ দাখিল কৰোতে যদি কোনোবাই সংযোগী নথি (তালিকা B হিচাপে) দুৰ্বল নথি ব্যৱহাৰ কৰিছে তেনেহ’লে হিয়াৰিঙত ২০১৫ চনৰ পিছৰ বা আগৰ আন যিকোনো সবল নথি দাখিল কৰিব পাৰিব। তালিকা A বা লিগেছি নথিও নতুনকৈ দাখিল কৰিব পাৰিব (প্ৰয়োজন সাপেক্ষে)।

উদাহৰণ স্বৰূপে:

A, B, C আৰু D য়ে একে লিগেচী ডাটা অথবা লিগেচী ব্যক্তি অথবা পৰিয়ালৰ বংশ বৃক্ষ দাখিল কৰিছিলে। তাৰে A, C ও D ৰ নাম চূড়ান্ত খচৰাত অন্তৰ্ভুক্ত হৈছে আৰু B ৰ নাম চূড়ান্ত খচৰাত অন্তৰ্ভুক্ত হোৱা নাই। B য়ে নাম অন্তৰ্ভুক্তিৰ বাবে দাবী (Claim) দাখিল কৰিছে। শুনানীৰ বাবে B লৈ জাননী জাৰী কৰাৰ ওপৰিও A, C ও D লৈও জাননী জাৰী কৰি B য়ে দাখিল কৰা দাবী (Claim) ৰ সত্যতা শুনানীৰ সময়ত নিৰূপণ কৰিব।

(সাধাৰণ ৰাইজক এই সম্পৰ্কে বুজনি দিয়াটো শিক্ষিত সমাজৰ কৰ্তব্য)

কি কাৰণত আমি জাননী পাইছোঁ বা পাব পাৰো, তাৰ প্ৰকাৰ সমুহ-

1. CN 1.1

A) LDC Claimant 

- Regular Claimant 

- Other State

- Minor

- Destitute orphane

B ) Non LDC Claimant 

- Regular Claimant 

- Other State

- Minor 

- Destitute Orphan 

2. CN 1.2

A) LDC Claimant + GP

B ) Non LDC Claimant + GP

3. CN 2.1 Witness ( Current LDC)

4. CN 2.2 Witness ( OLD LDC)

CN= Claimants Number

CN 1= Legacy person নিজে য’ত আবেদনকাৰী

CN 1.1,CN 1.2 = legacy Person ৰ ল'ৰা-ছোৱালী আবেদনকাৰী সকল।

CN 2.1,CN2.2= Legacy holder ৰ নাতি-নাতিনী আবেদনকাৰী সকল।

LDC= Legacy Data Code.

মন কৰিব এই পইন্ট কেইটা জাননী খনৰ বাওঁফালে একেবাৰে ওপৰত দিয়া আছে ।

Read More

মিয়া সম্পৰ্কে মুক্ত স্বীকাৰোক্তি

 1. Are you from any Char/Chapori? Where do you stay now? What do you do now? 

—মোৰ জন্ম বাক্সা জিলাৰ আইখাৰী গাওঁত৷ বৰ্তমানো একে গাওঁৰ বাসিন্দা৷ এই গাওঁখন চৰ-চাপৰিৰ অন্তৰ্ভূক্ত নহয় যদিও সামাজিক, অৰ্থনৈতিক আৰু বৈশিষ্টগত ভাবে চৰ-চাপৰিৰ দৰে একে৷ 
মই ২০১০ চনৰ পৰা ২০১৮ চনলৈকে আমছুৰ লগত জড়িত হৈ আছিলো৷ বৰ্তমানে এনআৰচি আৰু ডি ভোটাৰ বিষয় সজাগতা আৰু সচেতনতা সৃষ্টি কৰাৰ লগতে নাগৰিকৰ অধিকাৰৰ সংগ্ৰামৰ লগত জড়িত৷ 

2. Do you recognise yourself as a ‘Miya’? 

— জনগোষ্ঠীগত ভাবে মই এজন মিয়া আৰু জাতি হিচাপে অসমীয়া৷ 

3. Who is a ‘Miya’ according to you? 

—অখণ্ড ভাৰতৰ প্ৰাগজ্যোতিষপুৰীয় আৰু বংগীয় হিন্দু মূলৰ ধৰ্মান্তৰিত আৰু ১৯৫১ চনৰ পূৰ্বে বাংলাভাষী ব্ৰহ্মপুত্ৰ উপত্যকাৰ মুছলমানক ‘মিয়া’ বা ‘মিয়া মুছলমান’ বুলিব পাৰি। ১৯৫১ চনৰ লোক পিয়লত অসমৰ অস্তিত্ব ৰক্ষাৰ স্বার্থত আৰু অসমীয়া ভাষাক ৰাজ্য ভাষা হিচাপে পোৱাৰ বাবে  মিয়াসকলে মাতৃ ভাষা হিচাপে ‘অসমীয়া ভাষা’ গ্ৰহণ কৰি অসমীয়া ভাষা, সাহিত্য, সংস্কৃতিৰ ভড়াল চহকী কৰি আহিছে৷

4. Why name it ‘Miya Poetry’? 

—মিয়াসকলে ঘৰত ব্যৱহাৰ কৰা দোৱানত, অসমীয়া ভাষাত ইংৰাজী বা অইন কোনো ভাষাত ব্ৰহ্মপুত্ৰ উপত্যকাৰ মিয়াসকলৰ মনৰ ক্ষোভ, অভিজ্ঞতা, ইতিহাস, বঞ্চনা, শোষণ, নিপীড়ণ আৰু অৱহেলাৰ মৰ্মবেদনাৰ কঠিন বাস্তৱৰ ছবি প্ৰকাশিত হোৱা বাবে এই কবিতাক মিয়া কবিতা বুলি ক’ব পাৰি৷ এই মিয়া কবিতাৰ দ্বাৰা সমগ্ৰ অন্যায়ৰ বিৰুদ্ধে এক গণতান্ত্ৰিক প্ৰতিবাদ সাব্যস্ত কৰাৰ চেষ্টা কৰা হৈছে৷ 

5. What is your opinion on the NRC? How has the NRC impacted the Poetry Movement? 

—এন আৰ চি উন্নীতকৰণ সকলো বৈধ ভাৰতীয় নাগৰিকক চিনাক্তকৰণ কৰাৰ এটা ন্যায়সঙ্গত আৰু বিশ্বাসযোগ্য প্ৰক্ৰিয়া৷ ১৯৭৯ চনৰ পৰা অসমত চলা ৬ বছৰীয়া বিদেশী খেদা আন্দোলনৰ ফলত সৃষ্টি হোৱা অবিশ্বাসৰ পৰিৱেশ এন আৰ চি উন্নীতকৰণৰ দ্বাৰা আঁতৰ কৰা সম্ভৱ৷ বৰপেটা, ধুবুৰী, গোৱালপাৰা আদি নামনি অসমৰ জিলাৰ পৰা মিয়া শ্ৰমিকে উজনি অসমলৈ কাম কৰিবলৈ গ’লে বিদেশী বুলি সন্দেহ কৰা হয়, অত্যাচাৰ কৰা হয়, বিদেশীৰ গোচৰ জাপি দিয়া হয়, নথি-পত্ৰ বা মানুহজনৰ নাগৰিকত্বৰ উপযুক্ত পৰীক্ষা নকৰাকৈ ডি ভোটাৰ হিচাপে চিহ্নিত কৰা হয়— এনেবোৰ ঘটনা-পৰিঘটনা  এন আৰ চিৰ জড়িয়তে সমাধান হ’ব বুলি আশা কৰো৷ কিন্তু সমগ্ৰ পক্ৰিয়া ত্ৰুটিমুক্ত আৰু পক্ষপাতিত্ব বিহীন হোৱা প্ৰয়োজন৷ 
এন আৰ চিৰ বাবে কবিতাৰ আন্দোলনৰ সৃষ্টি হোৱা নাই৷ এই আন্দোলন প্ৰত্যিজন নিৰ্যাতিতৰ তেজত আছে আৰু সময়ে সময়ে বহিঃপ্ৰকাশ ঘটিছে৷ কিন্তু এন আৰ চিৰ জটিলতাই ইয়াৰ বহল ভিত্তিত বহিঃপ্ৰকাশ ঘটাত সহায় কৰিছে আৰু মিয়া কবিতাৰ আন্দোলন হিচাপে পৰিগনিত হৈছে৷

6. Why did you become part of it? Who are the people who are mostly part of it? How many people who are part of it? 

—নিৰ্যাতন, শোষণ, ঘৃণা, বঞ্চনাৰ অংশীদাৰ প্ৰতিজনেই এই আন্দোলনৰ অংশীদাৰ৷ এই আন্দোলনৰ প্ৰথমটো কবিতা 'Write down I am a Miya' লিখিছিল হাফিজ আহমেদে আৰু দ্বিতীয়টো কবিতা ‘মইও মিয়া’ মই (সাজাহান আলী আহমেদ) লিখিছিলো৷ ইয়াৰ লগতে মৌলানা বন্দে আলী, খবিৰ আহমেদ, আব্দুল কালাম আজাদ, আশ্ৰাফুল হুছেইন, সালিম এম হুছেইন, কাজী নীল, চুলতান মাহমুদ মিৰ্ধা ৰেহনা চুলতানা, চিৰাজ খান, ছান মিঞা, আব্দুৰ ৰহিম, ৰিজুৱান হুছেইন, শ্বামিম আহমেদ, জাহাঙ্গীৰ আলম, জহিৰুল ইছলাম আৰু বিজু জাহানে এই মিয়া কবিতা লিখা বুলি জানিব পাৰিছো৷ নতুনকৈ অনেক যুৱক-যুৱতীয়ে ফেচবুকৰ জড়িয়তে মিয়া কবিতা চৰ্চা কৰা দেখা যায়৷

7. Any thoughts on the future of this initiative?

—এই মিয়া কবিতা চৰ্চা, প্ৰচাৰ, প্ৰসাৰ কৰাৰ বাবে কবি সন্মিলন, গ্ৰন্থ প্ৰণয়ন আৰু কবিতাত প্ৰকাশিত বিষয়বোৰ সমাজৰ প্ৰতিজন মানুহৰ মাজলৈ লৈ যোৱাৰ চেষ্টা কৰা হ’ব৷ 

Read More

এনআৰচিৰ দাবী/ আপত্তিৰ নিষ্পত্তিৰ বাবে বৰপেটাৰোডত প্ৰশিক্ষণ শিবিৰ

প্ৰশিক্ষণত অংশ গ্ৰহণ কৰা একাংশ

১০ ফেব্ৰুৱাৰী তাৰিখে বৰপেটাৰোডৰ গ্ল’বেল ইনষ্টিটিউটত পুৱা ১১ বজাৰ পৰা ৰাষ্ট্ৰীয় নাগৰিকপঞ্জীৰ দাবী/ আপত্তিৰ শুনানীৰ সময়ত ভূক্তভোগী লোকক সহায় কৰাৰ বাবে প্ৰায় ৪০ গৰাকী স্বেচ্চাসেৱকক প্ৰয়োজনীয় প্ৰশিক্ষণ দিয়া হয়। ১৫ ফেব্ৰুৱাৰীৰ পৰা হ’ব লগা শুনানীৰ জৰিয়তে দাবী দাখিল কৰা লোকৰ দাবী বা আপত্তিৰ নিষ্পত্তি অনুষ্ঠিত হ’ব। ইতিমধ্যে শুনানীৰ বাবে জাননী সমূহ ৰাইজে লাভ কৰি আছে। সৰ্বসাধাৰণ ৰাইজে ইয়াৰে বহু বিষয় জ্ঞাত নহ’ব পাৰে। দাবী/ আপত্তি দাখিল প্ৰক্ৰিয়াত ৰাইজে সেচ্ছাসেৱকৰ কাষ চাপিছিল¸ এতিয়া ওলোটা দেখা গৈ আছে। গতিকে বহু সমস্যাৰ সমাধানসূত্ৰ বিচাৰি নাপাব। সেয়েহে এই বিষয়বোৰ বিস্তাৰিত ভাবে আলোচনা কৰি ৰাইজক সজাগ কৰাৰ কামত মনোনিবেশ কৰিবৰ বাবে উক্ত শিবিৰত আলোচনা কৰা হয়। 

প্ৰশিক্ষাৰ্থীসকলৰ একাংশ

মিছাল নামৰ বেচৰকাৰী সংস্থা আৰু এ পি আই চি আৰৰ যৌথ উদ্যোগত অনুষ্ঠিত শিবিৰত অধিবক্তা জাহিৰ আব্বাছে নাগৰিকত্ব আইন কিভাবে ৰাষ্ট্ৰীয় নাগৰিকপঞ্জী উন্নীতকৰণৰ কামত প্ৰয়োগ হয় সেই বিষয়ে বিস্তাৰিত ভাবে আলোকপাত কৰে৷ তেওঁ উল্লেখ কৰে যে- ১৯৮৭ চনৰ ৩১ জুলাইৰ পৰা ২০০৩ চনৰ ৩১ ডিচেম্বৰৰ ভিতৰত জন্ম লাভ কৰা লোকৰ পিতৃ-মাতৃৰ যিকোনো এজন ভাৰতীয় হ’লে তেওঁ জন্মসূত্ৰে ভাৰতীয়, ২০০৪ চনৰ পিছত জন্ম লাভ কৰা লোকৰ নথি নাথাকিলেও পিতৃ-মাতৃ উভয়ৰ নাম অন্তৰ্ভূক্ত হ’লে বা ভাৰতীয় হিচাপে প্ৰমাণ হ’লে পিতৃ-মাতৃৰ মৌখিক বা লিখিত সাক্ষ্যৰ ভিত্তিত সন্তানৰ নাম অন্তৰ্ভূক্ত হ’ব৷

অধিবক্তা জাহিৰ আব্বাছ

শিবিৰত ‘শিপাৰ সন্ধান’ কৰে এক্টিভিষ্ট আব্দুল কালাম আজাদে৷ অসমত দৰিদ্ৰ সৰ্বসাধাৰণ জনতাই বিভিন্ন সময়ত, কাপোৰ, খাদ্য আৰু ভাষাৰ নামত বাৰম্বাৰ অত্যাচাৰৰ মুখামুখী হোৱা লোকসকলৰ পৰিৱৰ্তনৰ বাবে কাম কৰিবলৈ দিহা পৰামৰ্শ প্ৰদান কৰে৷ পৰিৱৰ্তিত সমাজ ব্যৱস্থাত খাপখোৱাই আগোৱাই যোৱাৰ বাবে প্ৰতিজন জনতাই মানসিক নিৰাপত্তা লাভ কৰা অত্যন্তই প্ৰয়োজনীয়৷ এনে নিৰাপত্তা লাভ কৰাৰ বাবে অধিকাৰৰ বিষয়ে মানুহে জ্ঞাত হ’ব লাগিব আৰু নিজৰ পৰিচয় মনত ৰাখিব লাগিব বুলি ব্যক্ত কৰে৷ 

এক্টিভিষ্ট আব্দুল কালাম আজাদ

প্ৰশিক্ষণ শিবিৰৰ মুখ্য আয়োজক সাজাহান আলী আহমেদে এন আৰ চিৰ দাবী-আপত্তি প্ৰক্ৰিয়াত ভূক্তভওগী বৈধ ভাৰতীয় জনসাধাৰণক কিদৰে সহায় কৰিব সেইবোৰ সাঙুৰি প্ৰয়োজনীয় প্ৰশিক্ষণ প্ৰদান কৰে। শুনানীৰ সময়ত সকলোবোৰ নথি যেনে- মূল আবেদন প্ৰ-পত্ৰ আৰু তাৰ লগত প্ৰদান কৰা সকলো নথি-পত্ৰ, বংশবৃক্ষ, দাবী প্ৰ-পত্ৰ আৰু এনআৰচি সম্পৰ্কীয় সকলো নথি-পত্ৰ লৈ হাজিৰ হ’ব লাগিব৷ তাৰ বাবে সকলোকে এই বিষয়বোৰ সৰ্বসাধাৰণ ৰাইজৰ মাজলৈ লৈ যোৱাৰ বাবে আহ্বান জনায়। অনাগত সময়ত সমগ্ৰ অসমত ৰাষ্ট্ৰীয় নাগৰিকপঞ্জীৰ বিভিন্ন দিশ সাঙুৰি এনেধৰণৰ প্ৰশিক্ষণ শিবিৰ অনুষ্ঠিত কৰাৰ বাবে আৰু ৰাইজক সহায় কৰাৰ বাবে আহ্বান জনোৱাৰ লগত প্ৰয়োজনীয় সহযোগিতা আগবঢ়োৱা হ’ব বুলি ব্যক্ত কৰে আহমেদে।

সাজাহান আলী আহমেদ

অধিক জনাৰ বাবে ইয়াত ক্লিক কৰকঃ এন আৰ চিৰ দাবী আপত্তিৰ নিষ্পত্তি— প্ৰয়োজনীয় আলোচনা

সমস্যাৰ গভীৰতা জানিবলৈ ক্লিক কৰকঃ নিৰিহ বৈধ ভাৰতীয়ৰ কথাৰেঃ গ্ৰাউণ্ড জিৰো

তলৰ লিংকত ভিডিঅ প্ৰশিক্ষণ গ্ৰহণ কৰক ঃ 

১২ জানুৱাৰীত গণ অধিকাৰ কাকতত প্ৰকাশিত বাতৰি

Read More

নিৰিহ বৈধ ভাৰতীয়ৰ কথাৰেঃ গ্ৰাউণ্ড জিৰো

ৰাষ্ট্ৰীয় নাগৰিকপঞ্জীৰ চূড়ান্ত খচৰা তালিকাৰ পৰা নাম বাদ পৰা লোকৰ চমু আলোকপাত—

মানুহৰ সমস্যাৰ লগত মুখামুখীঃ সাজাহান আৰু অধিবক্তা জাহিৰ আব্বাছ

প্ৰকৃততে ডি ভোটাৰ আছিল কিন্তু বিদেশী ন্যায়াধিকৰণৰ দ্বাৰা ভাৰতীয় হিচাপে ৰায়দান পোৱাৰ পিছতো নাম বাদ পৰিল—

মালেকা খাতুন (৪২), বৰপেটা জিলাৰ বগুৰীগুৰী গাওঁত স্বামী ছামছুল হকৰ লগতে মুঠ চাৰি (আন দুগৰাকী কন্যাৰ বিয়া হৈছে) গৰাকী সন্তানৰ লগত বাস কৰি আছিল৷ ১৯৯৭ চনত মালেকা খাতুনক ‘ডি ভোটাৰ’ হিচাপে চিহ্নিত কৰিছিল৷ ০৯-০৩-২০১৭ তাৰিখে বৰপেটাৰ ৮ নং বিদেশী ন্যায়াধীকৰণৰ দ্বাৰা ভাৰতীয় হিচাপে ৰায়দান লাভ কৰে৷ কিন্তু ৰাষ্ট্ৰীয় নাগৰিকপঞ্জীৰ সম্পূৰ্ণ খচৰা তালিকাৰ পৰা ‘ডি ভোটাৰ’ বুলি দেখুৱাই নাম বাদ পেলোৱা হয়৷ কৃষিজীৱী পৰিয়ালটোৰ একমাত্ৰ উপাৰ্জনকাৰী নিৰক্ষৰ, শ্ৰমিক ছামচুল হকে (৪৬) ১৫ নৱেম্বৰ, ২০১৮ তাৰিখে মানসিক ভাগে ভাগি পৰে আৰু আত্ম হত্যা কৰে৷

--------------------------------------------------------------------------------

প্ৰকৃততে ডি নোহোৱা লোকক বিদেশী ন্যায়াধীকৰণত গোচৰ বিচাৰাধীন বুলি দেখুৱালে—

বাক্সা জিলাৰ  খুশ্ৰাবাৰী গাওঁৰ  জলিল আলীৰ পুত্ৰ ছুৰহাব আলী (৬০) এন আৰ চিত নাম অন্তৰ্ভূক্ত  কৰাৰ বাবে পিতৃৰ নামত থকা ‘এন আৰ চি ১৯৫১’ লিগেছি নথি হিচাপে আৰু নিজৰ নামত থকা ভোটাৰ পৰিচয়পত্ৰৰ সহায়ত আবেদন জনাইছিল৷ কিন্তু তেওঁক বিদেশী ন্যায়াধীকৰণত গোচৰ বিচাৰাধীন বুলি দেখুৱাই চূড়ান্ত খচৰা তালিকাৰ পৰা নাম পেলোৱা হৈছে৷ তেওঁৰ লগতে একে আবেদন পত্ৰত থকা তেওঁৰ ৮ গৰাকী সতি-সন্তুতিৰ নাম বাদ পেলোৱা হৈছে৷

--------------------------------------------------------------------------------

ভুলবশত বিদেশী বুলি ঘোষণা কৰা ব্যক্তি—

বাক্সা জিলাৰ মটঙা গাওঁৰ আবেদ আলী (৬০)৷ তেওঁ নিজৰ নামৰ ১৯৭১ চনৰ লিগেছি নথিৰে এন আৰ চিত নাম অন্তৰ্ভূক্ত কৰাৰ বাবে আবেদন দাখিল কৰিছিল৷ কিন্তু তেওঁক ‘ঘোষিত বিদেশী’ ব্যক্তি বুলি দেখুৱাই নাম বাদ পেলোৱা হৈছে৷ তেওঁৰ তিনি গৰাকী পুত্ৰ আৰু দুগৰাকী কন্যা সহ মুঠ ৯ গৰাকী সতি-সন্তুতিৰ নাম এন আৰ চিৰ চূড়ান্ত খচৰা তালিকাৰ পৰা বাদ পৰিছে৷

--------------------------------------------------------------------------------

প্ৰকৃততে ডি নোহোৱা লোকক ডি ভোটাৰ বা সতি-সন্তুতি বুলি দেখুৱা হ’ল—

বাক্সা জিলাৰ বাৰাপেটা গাওঁৰ ইছমাইল হুছেইনৰ পুত্ৰ মহৰ উদ্দিন (৬৫) নিজৰ পত্নীৰ লগত বসবাস কৰে৷ নিজৰ নামত থকা ১৯৭১ চনৰ ভোটাৰ তালিকাৰ লিগেছি নথিৰে এন আৰ চিত নাম অন্তৰ্ভূক্ত কৰাৰ বাবে আবেদন কৰিছিল৷ কিন্তু ভুলৱশত ‘ডি ভোটাৰ’ বুলি দেখুৱাই চূড়ান্ত খচৰা তালিকাৰ পৰা তেওঁ আৰু পত্নীৰ নাম বাদ পেলায়৷ তেওঁৰ তিনি পুত্ৰ আৰু চাৰি গৰাকী কন্যাৰ নাম পৃথক আবেদন পত্ৰৰ জড়িয়তে অন্তৰ্ভূক্ত হৈছে৷

--------------------------------------------------------------------------------

মাতৃৰ ডি থকা কিন্তু পিতৃৰ নামত ডি নথকা  আৰু ২০০৪ চনৰ আগত জন্ম লাভ কৰা সতি-সন্তুতিৰ নাম ডি ভোটাৰৰ বংশধৰ দেখুৱা হ’ল— 

বাক্সা জিলাৰ চূণবাৰী গাওঁৰ মৃত নুৰুল ইছলাম মিৰ্ধাৰ পুত্ৰ জাহিদুল ইছলাম মিৰ্ধা (৩৫), তেওঁৰ মাতৃ জৰিণা খাতুন ডি ভোটাৰ, কিন্তু বিদেশী ন্যায়াধীকৰণৰ দ্বাৰা কোনো জাননী লাভ কৰা নাই৷ তেওঁৰ পিতৃৰ নামত থকা ‘এন আৰ চি ১৯৫১’ লিগেছি নথিৰে এন আৰ চিত নাম অন্তৰ্ভূক্ত কৰাৰ বাবে আবেদন জনাইছিল৷ কিন্তু মাতৃ ডি ভোটাৰ হোৱা বাবে মিৰ্ধাৰ নিজৰ, মাতৃৰ, দুই পুত্ৰ সন্তান, এগৰাকী ভাইটি আৰু এগৰাকী ভন্টিৰ নাম বাদ পৰিছে৷

--------------------------------------------------------------------------------

FTR No. বা ‘বংশ বৃক্ষ গ্ৰহণযোগ্য নোহোৱা’ ৰ বাবে নাম বাদ পৰিল—

বাক্সা জিলাৰ আইখাৰী বিলৰ পথাৰ গাওঁৰ মোকছেদ আলীৰ পুত্ৰ আব্দুল মোন্নাফ (৫৩)৷ পিতৃ মোকছেদ আলীৰ ‘এন আৰ চি ১৯৫১’  লিগেছি নথি আৰু নিজৰ ভোটাৰ পৰিচয়পত্ৰ দাখিল কৰি এন আৰ চিত নাম অন্তৰ্ভূক্ত কৰাৰ বাবে আবেদন জনাইছিল৷ কিন্তু ‘বংশ বৃক্ষৰ অমিল’ বুলি দেখুৱাই তেওঁৰ নাম বাদ পেলায়৷ তেওঁৰ লগতে তিনি পুত্ৰ, দুই কন্যা আৰু এগৰাকী নাতিৰ নাম বাদ পৰে৷ একেদৰে একে লিগেছি ব্যৱহাৰ কৰা মৃত মোকছেদ আলীৰ সৰ্বমুঠ ৩০ গৰাকী সতি-সন্তুতিৰ নাম বাদ পৰে৷ 

---------------------------------------------------------------------------------

চক্ৰ বিষয়া/ লাট মণ্ডল / গাওঁ পঞ্চায়তৰ সচিবৰ প্ৰমাণ পত্ৰ গ্ৰহণযোগ্য নোহোৱা সকলৰ বাবে—

বাক্সা জিলাৰ কঁচুগাওঁৰ মজিবৰ ৰহমানৰ কন্যা ফাতেমা খাতুন (৫০) য়ে পিতৃৰ এন আৰ চি ১৯৫১ লিগেছি নথি হিচাপে দাখিল কৰি আৰু পিতৃৰ লগত সংযোগী নথি হিচাপে ‘লাট মণ্ডলৰ প্ৰমাণ পত্ৰ’ প্ৰদান কৰি এন আৰ চিত নাম অন্তৰ্ভূক্ত কৰাৰ বাবে আবেদন দাখিল কৰিছিল৷ এই নথিৰ বাদে ফাতেমা খাতুনৰ পিতৃৰে আন কোনো সংযোগী নথি নাছিল৷ নিজৰ নামত স্বামীৰ লগত একেলগে নাম থকা ভোটাৰ পৰিচয় পত্ৰ আছে আৰু বংশ বৃক্ষৰ শুনানীৰ জৰিয়তে পিতৃ, চাৰি ভাতৃ আৰু পাঁচ ভগ্নীৰ লগত গ্ৰহণযোগ্য হয়৷ কিন্তু এন আৰ চিৰ চূড়ান্ত খচৰা তালিকাত ‘লাট মণ্ডলৰ প্ৰমাণ পত্ৰ গ্ৰহণযোগ্য নহ’ল’ বুলি দেখুৱাই নাম অন্তৰ্ভূক্ত কৰা নহ’ল৷

--------------------------------------------------------------------------------

তালিকা B ৰ প্ৰমাণ পত্ৰ গ্ৰহণযোগ্য নোহোৱা সকলৰ বাবে—

বাক্সা জিলাৰ বাৰাপেটা গাওঁৰ কুমৰ উদ্দিনৰ পুত্ৰ শ্বৰিফুল ইছলাম (২৫)৷ তেওঁৰ ককাৰ নামত থকা এন আৰ চি ১৯৫১ লিগেছি নথি হিচাপে দাখিল কৰাৰ লগতে জন্মৰ প্ৰমাণপত্ৰ দাখিল কৰিছিল৷ তেওঁৰ পিতৃ, মাতৃ, এগৰাকী ভাতৃৰ নাম এন আৰ চিৰ চূড়ান্ত খচৰা তালিকাত অন্তৰ্ভূক্ত হৈছে যদিও তেওঁৰ জন্মৰ প্ৰমাণপত্ৰ গ্ৰহণযোগ্য নোহোৱাৰ বাবে নাম অন্তৰ্ভূক্ত হোৱা নাই৷ দাবী প্ৰ-পত্ৰৰ লগত বিদ্যালয়ৰ প্ৰমাণপত্ৰ আৰু পান কাৰ্ড প্ৰদান কৰিছে৷

--------------------------------------------------------------------------------

১৪ বছৰৰ তলৰ, সংযোগী নথি গ্ৰহণ নোহোৱা—

বাক্সা জিলাৰ অটা গাওঁৰ আৰশ্বাদ আলী আৰু তাহামিনা খাতুনৰ কন্যা আমানা খাতুন (১১)৷ পিতৃৰ ল’গত একে লিগেছি নথি অৰ্থাৎ এন আৰ চি ১৯৫১ আৰু জন্মৰ প্ৰমাণপত্ৰ দাখিল কৰি এন আৰ চিত নাম অন্তৰ্ভূ কৰাৰ বাবে আবেদন জনাইছিল৷ পিতৃ-মাতৃৰ নাম অন্তৰ্ভূক্ত হ’ল যদিও তাইৰ জন্মৰ প্ৰমাণ পত্ৰ গ্ৰহণযোগ্য পোৱা নগ’ল বুলি দেখুৱা হৈছে৷ উল্লেখ্য যে তাইৰ পিতৃ-মাতৃ কৰ্ম সূত্ৰে দিল্লীত থকা অৱস্থা তাই জন্ম লাভ কৰে৷ জন্মৰ প্ৰমাণপত্ৰ দিল্লীৰ এখন স্বাস্থ্য কেন্দ্ৰৰ পৰা গ্ৰহণ কৰিছিল, য়’ত তাইৰ মাতৃয়ে বেজি লৈছিল৷ উক্ত জন্মৰ প্ৰমাণপত্ৰৰ অবিহনে তাইৰ অইন কোনো সংযোগী নথি নাই৷ 

Read More

এন আৰ চিৰ দাবী আপত্তিৰ নিষ্পত্তি— প্ৰয়োজনীয় আলোচনা

আলোচনাৰ বিষয়বস্তু অতি স্পষ্ট৷ আমি আলোচনা কৰিম এন আৰ চিৰ দাবী আপত্তিৰ নিষ্পত্তি সম্পৰ্কে৷ অভিজ্ঞতা আৰু তথ্য সহকাৰে বিশ্লেষণাত্মক ভাবে কৰা হৈছে৷ যাতে অস্পষ্ট বহু বিষয়বোৰ স্পষ্ট হয় আৰু ৰাষ্ট্ৰীয় নাগৰিক পঞ্জীৰ কাম  নিৰ্ভূল, সুস্থ আৰু বিশ্বাসযোগ্য ভাবে সমাপ্ত হয়৷

        ১৫ ফেব্ৰুৱাৰী, ২০১৯ তাৰিখৰ পৰা ৰাষ্ট্ৰীয় নাগৰিক পঞ্জীৰ চূড়ান্ত খচৰা তালিকাৰ পৰা নাম বাদ পৰা লোকসকলে দাখিল কৰা দাবী দাখিল কৰা লোকৰ শুনানী আৰু আপত্তিৰ নিষ্পত্তিৰ কাম আৰম্ভ হ’ব৷ এই সময়ত এনআৰচিৰ চূড়ান্ত খচৰা তালিকাৰ পৰা বাদ পৰা ৪০ লক্ষ্যাধীক লোকৰ ৩৬.২ লাখ লোকে দাবী দাখিল কৰিছিল আৰু তেওঁলোকে ১ ফেব্ৰুৱাৰীৰ পৰাই শুনানীৰ বাবে জাননী লাভ কৰি আছে৷ এই প্ৰক্ৰিয়াত বিশেষভাবে মন কৰিবলগীয়া বিষয়বোৰ আজি বিস্তাৰিত ভাবে আলোচনা কৰিব বিচাৰিছো৷ প্ৰথমেই তেনে জাননীৰ প্ৰতিলিপিৰ কথাখিনিলৈ সকলোৰে দৃষ্টি আকৰ্ষণ কৰিছো—

দাবী দাখিল কৰা লোকক এনআৰচি কৰ্তৃপক্ষই প্ৰদান কৰা জাননীৰ মূল অংশ

—এই জাননীত স্পষ্ট ভাবে কেইবাটাও কথা প্ৰকাশ পাইছে৷ তাৰে অতি গুৰুত্বপূৰ্ণ বিষয়বোৰ চমুকৈ আলোচনা কৰি ল’ব বিচাৰিছো—

          দাবী দাখিল কৰা প্ৰতিজন সদস্য, বংশবৃক্ষৰ প্ৰতিজন সদস্য শুনানীকালত উপস্থিত থকা অত্যন্ত জৰুৰী৷ উপস্থিত নাথাকিলে তেওঁলোকৰ জবানবন্দী লিপিবদ্ধ কৰিব নোৱাৰিব৷ গতিকে সকলো প্ৰক্ৰিয়া সম্পূৰ্ণ হোৱা অসম্ভৱ৷ এই প্ৰক্ৰিয়াত সকলোবোৰ নথি যেনে- মূল আবেদন প্ৰ-পত্ৰ আৰু তাৰ লগত প্ৰদান কৰা সকলো নথি-পত্ৰ, বংশবৃক্ষ, দাবী প্ৰ-পত্ৰ আৰু এনআৰচি সম্পৰ্কীয় সকলো নথি-পত্ৰ লৈ হাজিৰ হ’ব লাগিব৷ এইবোৰ কৰাৰ বাবে আমাৰ অশিক্ষিত ৰাইজ সজাগ আৰু সচেতন নে ?

• সমস্যাৰ গভীৰতা কিমান ? 

           দাবী দাখিল প্ৰক্ৰিয়াত লাভ কৰা ডাঙৰ শিক্ষাটোৱে আছিল যে আমি বিচৰা প্ৰায় ৬০ শতাংশ লোকে বংশবৃক্ষৰ হাতে লিখা প্ৰতিলিপি দেখুৱাব পৰা নাছিল৷ তেওঁলোকৰ অধিকাংশই নিৰক্ষৰতাৰ বাবে এই নথি চিনিয়ে নাপায় আৰু জমা দিয়াৰ সময়ত প্ৰতিলিপি ৰখা নাছিল৷ এনে ক্ষেত্ৰত পূৰ্বে দাখিল কৰা হাতে লিখা বংশবৃক্ষ পুনৰ লৈ যোৱা এটা ডাঙৰ প্ৰত্যাহ্বান৷ যিবোৰ নথি এবাৰ প্ৰদান কৰা হৈছে আৰু তাৰ নিৰ্দিষ্ট শুনানী হৈছে, যেনে— মূল আবেদন প্ৰ-পত্ৰ, বংশ বৃক্ষ, দাবী প্ৰ-পত্ৰ, ২০১৫ চনত মূল আবেদন প্ৰ-পত্ৰৰ লগত আৰু পৰৱৰ্তী শুনানীৰ জৰিয়তে দাখিল কৰা সকলো নথি পত্ৰ কৰ্তৃপক্ষৰ হাতত মজুত আছে৷ 

         আটাইতকৈ গুৰুত্বপূৰ্ণ আৰু জটিল বংশবৃক্ষৰ শুনানী প্ৰতিটো বংশৰ বাবে সুকীয়া বা যৌথ ভাবে অনুষ্ঠিত হৈছিল৷ তেওঁলোকৰ বংশবৃক্ষৰ কোনো বিসংগতি নাই, মাথো নথি-পত্ৰত সামান্য বিসংগতি আছে৷ এতিয়া বিসংগতি থকা নথিৰ পৰিৱৰ্তে বিকল্প নথি প্ৰদান কৰি দাবী দাখিল কৰিছে৷ গতিকে নতুনকৈ প্ৰদান কৰা নথি ভালকৈ পৰীক্ষা কৰিব পাৰে৷ কাৰণ ২০১৫ চনৰ পৰা নিষ্ঠাৰে কাম কৰি থকা কৰ্মচাৰীসকলে সমস্ত নথি পত্ৰ তন্নতন্নকৈ পৰীক্ষা কৰি CVR অৰ্থাৎ Combine Verification Report তৈয়াৰ কৰিছিল৷ এই প্ৰতিবেদনতেই এগৰাকী আবেদনকাৰীৰ সকলো তথ্য সন্নিবিষ্ট হৈছে৷ তেনে ক্ষেত্ৰত পুনৰায় সমগ্ৰ বংশবৃক্ষৰ সদস্যসকলক শুনানীৰ সময়ত বাধ্যতামূলক উপস্থিতি কৰা কথাটোৱে কি সূচাইছে? প্ৰতিজনে সুস্থ ভাবে চিন্তা কৰা দৰকাৰ৷ 

মনত ৰাখিব— আপোনাৰ বংশবৃক্ষত ধৰা হ’ল ৩৩ জন সদস্য আছে৷ তাৰে ৩০ জনৰ নাম এনআৰচিৰ চূড়ান্ত খচৰা তালিকাত অন্তৰ্ভূক্ত হৈছে৷ তিনিজনৰ সংযোগী নথিত বিসংগতি থকা বাবে নাম অন্তৰ্ভূক্ত হোৱা নাছিল৷ এতিয়া আপোনালোক ৩৩ জনেই শুনানীত উপস্থিত থাকিব লাগিব৷ কাৰণ হয়তো এনেকুৱা হ’ব পাৰে- আপোনালোকৰ পৰা জবানবন্দী গ্ৰহণ কৰা হ’ব পাৰে যে সেই বাদ পৰা ৩ জন সদস্য আপোনালোকৰ বংশৰেই হয়৷ সেই কথা নিশ্চিত কৰাৰ বাবে পূৰ্বৰ বংশ বৃক্ষৰ প্ৰতিবেদন কৰ্তৃপক্ষৰ হাতত CVR ৰূপে মজুত আছেই৷ 

            এই প্ৰসঙ্গত কৰ্তৃপক্ষক এটা অনুৰোধ জনাই থ’ব বিচাৰিছো যে মূল আবেদন প্ৰ-প্ৰত্ৰৰ প্ৰতিলিপি যেনেদৰে আবেদনকাৰীক দিয়া হৈছিল, বংশবৃক্ষৰ প্ৰতিলিপি দিয়া হোৱা নাছিল৷ গতিকে শুনানীৰ পূৰ্বে অথবা শুনানীৰ সময়ত সেইবোৰ ৰাইজক দিয়াৰ ব্যৱস্থা কৰিব লাগে৷

সি যি কি নহওঁক—

শুনানীৰ সময়ত প্ৰতিজন সদস্য, বংশবৃক্ষৰ প্ৰতিজন সদস্য, একে লিগেছি ব্যৱহাৰ প্ৰতিজন সদস্য, এনআৰচি সম্পৰ্কীয় যাবতীয় নথি-পত্ৰ লগত লৈ নিৰ্ধাৰিত দিনত হাজিৰ হ’ব লাগিব৷ এই অত্যাধিক জটিল প্ৰক্ৰিয়াত আমাৰ নিৰক্ষৰ আৰু অজ্ঞ লোকসকলক সঠিক পন্থা দেখুৱাব নোৱাৰিলে নথি-পত্ৰৰ খেলি-মেলিৰে প্ৰকৃত নথি বাদ পৰি যাব পাৰে আৰু বহু কষ্ট কৰি দাবী প্ৰ-পত্ৰ পূৰণ কৰাৰ পিছতো বৈধ ভাৰতীয় নাগৰিকৰ নাম বাদ পৰি থাকিব পাৰে৷ সেইবাবে শিক্ষিত সমাজ, বিশেষকৈ যুৱ সমাজে এই বিষয়বোৰ সুক্ষ্ম ভাবে পৰ্যবেক্ষণ কৰি ৰাইজক সহায় কৰাৰ কামত আত্ম নিয়োগ কৰিব লাগে৷

• কেনেদৰে সহায় কৰিব ৰাইজক ?

তলত উল্লেখ কৰা ক্ৰমত ৰাইজক নথি-পত্ৰ বিভক্ত কৰি ৰাখিবলৈ পৰামৰ্শ দিব পাৰে—
প্ৰথম- বাদ পৰাৰ কাৰণ বা কি কাৰণে আবেদনকাৰীৰ নাম বাদ পৰিছে৷ 

দ্বিতীয়- মূল আবেদনপত্ৰ আৰু তাৰ লগত গাথি দিয়া নথি-পত্ৰ৷

তৃতীয়- দাবী প্ৰ পত্ৰ আৰু অতিৰিক্ত ভাবে দাখিল কৰা নথি পত্ৰ৷
চতুৰ্থ- হাতে লিখা বংশবৃক্ষ৷ 

ইয়াৰ লগতে কি কাৰণে আবেদনকাৰীৰ নাম এনআৰচিৰ চূড়ান্ত খচৰা তালিকাৰ পৰা বাদ পৰিছে আৰু কিয় বাদ পৰিব নালাগিছিল সেই বিষয়ৰ সামৰি দাবী প্ৰ-পত্ৰৰ পৃষ্ঠা D বা ৭ নং প্ৰশ্নৰ উত্তৰ নাইবা DV, DF, PFT ৰ বাবে পৃষ্ঠা B বা ৫ নং প্ৰশ্নৰ উত্তৰত লিপিবদ্ধ কৰা স্বীকাৰোক্তি বা ঘোষণাৰ লগত সামঞ্জস্য ৰখাকৈ যুক্তিসঙ্গত আৰু বিস্তাৰিত লিখিত শপত নামা প্ৰস্তুত কৰি নিবলৈ পৰামৰ্শ প্ৰদান কৰিব পাৰে৷ এনে ক্ষেত্ৰত অধ্যয়নপুষ্ঠ বা নাগৰিকত্ব সম্পৰ্কীয় বিষয়ত অভিজ্ঞতা থকা সচেতন অধিবক্তাৰ সহায় লৈ আগবাঢ়িব পাৰিলে ভাল৷

প্ৰতিজন আবেদনকাৰীৰ সমস্যা আৰু তাৰ সমাধানৰ বাবে প্ৰদান কৰা দাবী প্ৰ পত্ৰৰ ভিত্তিত শপতনামা প্ৰস্তুত হ’ব যদিও তলত কেইটামান আৰ্হি দাঙি ধৰা হ’ল—

--------------------------------------------------------------------------------

প্ৰকৃততে ডি ভোটাৰ আছিল কিন্তু বিদেশী ন্যায়াধিকৰণৰ দ্বাৰা ভাৰতীয় হিচাপে ৰায়দান পোৱাসকলৰ/ সতি-সন্তুতিৰ বাবে  টোকা—

NRC ৰ চূড়ান্ত খচৰা তালিকাৰ পৰা মোৰ নাম বাদ পৰাৰ কাৰণ আবেদনকাৰীক ডি ভোটাৰ/ সতি-সন্তুতি দেখুৱা হৈছে যদিও .................. (উদাহৰণ FT-2, Barpeta) গোচৰ নং ............ (উদাহৰণ FT case No. 1029/16) ৰ জৰিয়তে ................  তাৰিখে মোক/ পূৰ্ব পুৰুষক ভাৰতীয় বুলি ৰায়দান কৰে৷ সেয়েহে  FTৰ ৰায়দানৰ ভিত্তিত মোৰ নাম পূৰ্ণাঙ্গ NRC ত অন্তৰ্ভূক্ত কৰাৰ বাবে আবেদন জনাইছো৷  

(নথিৰ বিবৰণ— বাদ পৰাৰ কাৰণ, ৰায়দান পত্ৰ, মূল আবেদন প্ৰ-পত্ৰ, দাখিল কৰা নথি-পত্ৰ, দাবী প্ৰ-পত্ৰ, বংশবৃক্ষ)

--------------------------------------------------------------------------------

Wrongly Identify as DF. ভুলবশত বিদেশী বুলি ঘোষণা কৰা ব্যক্তিসকলৰ বাবে—

মই এজন ভাৰতীয় নাগৰিক৷ মোৰ বিৰুদ্ধে কোনো ন্যায়াধিকৰণত গোচৰ নাই৷ মোক কেতিয়াও বিদেশী হিচাপে ঘোষণা কৰা হোৱা নাই৷ এনআৰচিৰ কৰ্তৃপক্ষৰ পৰা মোক ভুলবশত বিদেশী বুলি কাৰণ জনোৱা হৈছিল৷ সেয়েহে দাখিল কৰা নথি-পত্ৰৰ ভিত্তিত মোৰ নাম NRC ত অন্তৰ্ভূক্ত কৰাৰ বাবে আবেদন জনোৱা হ’ল৷

(নথিৰ বিবৰণ— বাদ পৰাৰ কাৰণ, মূল আবেদন প্ৰ-পত্ৰ, দাখিল কৰা নথি-পত্ৰ, দাবী প্ৰ-পত্ৰ, বংশবৃক্ষ, অতিৰিক্ত নথি পত্ৰ, যেনে ১৯৯৭ চনৰ পৰা কমপক্ষে ৫ বছৰৰ ব্যৱধানত ৩ খন ভোটাৰ তালিকা)

--------------------------------------------------------------------------------

প্ৰকৃততে ডি নোহোৱা লোকক ডি ভোটাৰ বা সতি সন্ততি বুলি দেখুৱসকলৰ বাবে—

NRC ৰ চূড়ান্ত খচৰা তালিকাত মোৰ নাম অন্তৰ্ভূক্ত নোহোৱাৰ কাৰণ ডি ভোটাৰ/ সতি-সন্তুতি বুলি জনোৱা হৈছে৷ মই ডি ভোটাৰ/ সতি-সন্তুতি নহয়৷ মই এগৰাকী ভাৰতীয় নাগৰিক৷ মোৰ বিৰুদ্ধ কোনো বিদেশী ন্যায়াধীকৰণত গোচৰ চলি থকা নাই৷ সেয়েহে প্ৰামাণ্য নথিৰ ভিত্তিত মোৰ নাম সম্পূৰ্ণ NRC ত অন্তৰ্ভূক্ত কৰাৰ বাবে আবেদন জনালো৷

(নথিৰ বিবৰণ— বাদ পৰাৰ কাৰণ, মূল আবেদন প্ৰ-পত্ৰ, দাখিল কৰা নথি-পত্ৰ, দাবী প্ৰ-পত্ৰ, বংশবৃক্ষ, অতিৰিক্ত নথি পত্ৰ, যেনে ১৯৯৭ চনৰ পৰা কমপক্ষে ৫ বছৰৰ ব্যৱধানত ৩ খন ভোটাৰ তালিকা, ভোটাৰ আই ডি)

--------------------------------------------------------------------------------মাতৃৰ ডি থকা কিন্তু পিতৃৰ নামত ডি নথকা বা পিতৃৰ নাম অন্তৰ্ভূক্ত হোৱা আৰু ২০০৪ চনৰ আগত জন্ম লাভ কৰা সতি-সন্তুতিৰ নাম ডি ভোটাৰৰ বংশধৰ দেখুৱালে— 
জন্মসূত্ৰে মই ভাৰতীয় নাগৰিক৷ মোৰ পিতৃৰ নাম এন আৰ চিৰ চূড়ান্ত খচৰা তালিকাত অন্তৰ্ভূক্ত হৈছে আৰু পূৰ্বপুৰুষৰ লগতে মোৰ ভাৰতীয় হোৱাৰ যাৱতীয় নথি পত্ৰ আছে৷ যিহেতু মই ২০০৪ চনৰ পূৰ্বে জন্ম লাভ কৰিছো, সেয়েহে পিতৃ পক্ষৰ নথি পত্ৰ আৰু বংশ বৃক্ষৰ জৰিয়তে মোৰ নাম সম্পূৰ্ণ NRC ত অন্তৰ্ভূক্ত কৰাৰ বাবে আবেদন জনালো৷

(নথিৰ বিবৰণ— বাদ পৰাৰ কাৰণ, মূল আবেদন প্ৰ-পত্ৰ, দাখিল কৰা নথি-পত্ৰ, দাবী প্ৰ-পত্ৰ, বংশবৃক্ষ, অতিৰিক্ত নথি পত্ৰ, যেনে ১৯৯৭ চনৰ পৰা কমপক্ষে ৫ বছৰৰ ব্যৱধানত ৩ খন ভোটাৰ তালিকা, ভোটাৰ আই ডি)

--------------------------------------------------------------------------------

মনত ৰাখিব মহামান্য উচ্চতম ন্যায়ালয়ে প্ৰদান কৰা আদেশ অনুসৰি প্ৰকৃত ডি ভোটাৰে আবেদন দাখিল কৰাৰ প্ৰয়োজন নাই৷ FTৰ দ্বাৰা ভাৰতীয় ঘোষণা হোৱাৰ পিছত ARNৰ জৰিয়তে তেওঁলোকৰ নাম পৰ্যায়ক্ৰমে অন্তৰ্ভূক্ত হ’ব৷ কিন্তু ১৯৮৭ চনৰ ৩১ জুলাইৰ পৰা ২০০৩ চনৰ ৩১ ডিচেম্বৰৰ ভিতৰত জন্ম লাভ কৰা লোকৰ পিতৃ-মাতৃৰ যিকোনো এজন ভাৰতীয় হ’লে  তেওঁ জন্মসূত্ৰে ভাৰতীয়৷ ২০০৪ চনৰ পিছত জন্ম লাভ কৰা লোকৰ নথি নাথাকিলেও পিতৃ-মাতৃৰ নাম অন্তৰ্ভূক্ত হ’লে পিতৃ-মাতৃৰ মৌখিক বা লিখিত সাক্ষ্যৰ ভিত্তিত নাম অন্তৰ্ভূক্ত হ’ব৷

--------------------------------------------------------------------------------

FTR No. বা ‘বংশ বৃক্ষ গ্ৰহণযোগ্য নোহোৱা’ ৰ বাবে নাম বাদ পৰা লোকৰ বাবে—

বংশ বৃক্ষৰ ভুলৰ বাবে মোৰ নাম অন্তৰ্ভূক্ত হোৱা নাই বুলি বাদ পৰাৰ কাৰণ জনোৱা হৈছিল৷NRCৰ চূড়ান্ত খচৰা তালিকাত বংশবৃক্ষৰ অইন সদস্য (যদি হৈছে৷ নাম উল্লেখ কৰিব) নাম অন্তৰ্ভূক্ত হৈছে৷ সেয়েহে পূৰ্বে প্ৰদান কৰা বংশবৃক্ষ আৰু নথি-পত্ৰৰ ভিত্তিত পুনৰ পৰীক্ষণৰ জৰিয়তে মোৰ নাম অন্তৰ্ভূক্ত কৰাৰ বাবে অনুৰোধ জনালো৷ 

(মনত ৰাখিব— একে লিগেছি ব্যৱহাৰ কৰি যদি অইন ব্যক্তিৰ নাম অন্তৰ্ভূক্ত হৈছে তেন্তে প্ৰয়োজন অনুহাৰে ওপৰৰ কথাখিনি লিখিব৷ বংশবৃক্ষৰ পৰীক্ষণৰ সময়ত কি হৈছিল সেই বিষয়ে ভালদৰে জানিলৈ শপতনামা বা জবানবন্দী দিব লাগিব৷)

---------------------------------------------------------------------------------

চক্ৰ বিষয়া/ লাট মণ্ডল / গাওঁ পঞ্চায়তৰ সচিবৰ প্ৰমাণ পত্ৰ গ্ৰহণযোগ্য নোহোৱা সকলৰ বাবে—

NRC ৰ চূড়ান্ত খচৰা তালিকাৰ পৰা মোৰ নাম বাদ পৰাৰ কাৰণ চক্ৰ বিষয়া/ লাট মণ্ডল / গাওঁ পঞ্চায়তৰ সচিবৰ প্ৰমাণ পত্ৰ গ্ৰহণযোগ্য নোহোৱা বুলি দেখুৱা হৈছে৷ সেয়েহে দাবী প্ৰ-পত্ৰৰ লগত অতিৰিক্ত হিচাপে -------------- নথি প্ৰদান কৰি পূৰ্বৰ নথি পুনৰিক্ষণৰ লগতে অতিৰিক্ত ভাবে প্ৰদান কৰা নথিৰ ভিত্তিত মোৰ নাম অন্তৰ্ভূক্ত কৰাৰ বাবে দাবী দাখিল কৰিছো৷ মোৰ স্বামীৰ লগত প্ৰমাণ স্থাপনৰ বাবে ভোটাৰ পৰিচয় পত্ৰ আৰু পিতৃৰ লগত সম্পৰ্ক স্থাপনৰ বাবে বংশবৃক্ষৰ অইন সদস্য (নিৰ্দিষ্টকৈ উল্লেখ কৰিব, পিতৃ, মাতৃ, ভাতৃ, ভনী বা আন কোনে পঞ্চায়তৰ নথি সংগ্ৰহ কৰোতে সাক্ষ্য দিছিল উল্লেখ কৰিব৷)ৰ দ্বাৰা সাক্ষ্য প্ৰদান কৰি চক্ৰ বিষয়া/ লাট মণ্ডল / গাওঁ পঞ্চায়তৰ সচিবৰ প্ৰমাণ পত্ৰ সংগ্ৰহ কৰি জমা কৰিছিলো৷

(নথিৰ বিবৰণ— বাদ পৰাৰ কাৰণ, মূল আবেদন প্ৰ-পত্ৰ, দাখিল কৰা নথি-পত্ৰ, দাবী প্ৰ-পত্ৰ, বংশবৃক্ষ, অতিৰিক্ত নথি পত্ৰ)  

--------------------------------------------------------------------------------

তালিকা B ৰ প্ৰমাণ পত্ৰ গ্ৰহণযোগ্য নোহোৱা সকলৰ বাবে—

NRC ৰ চূড়ান্ত খচৰা তালিকাৰ পৰা মোৰ নাম বাদ পৰাৰ কাৰণ সংযোগী নথি-পত্ৰ গ্ৰহণযোগ্য নোহোৱা বুলি জনাইছিল৷ সেয়েহে দাবী প্ৰ-পত্ৰৰ লগত অতিৰিক্ত........  নথি প্ৰদান কৰি দাবী দাখিল কৰিছো৷ মই জন্মসূত্ৰে ভাৰতীয় নাগৰিক আৰু মোৰ বংশবৃক্ষৰ ........... সদস্যৰ নাম অন্তৰ্ভূক্ত হৈছে৷ পূৰ্বে প্ৰদান কৰা নথি পুনৰিক্ষণ(যদি প্ৰয়োজন হয়)ৰ লগতে অতিৰিক্ত ভাবে প্ৰদান কৰা নথি আৰু বংশবৃক্ষৰ ভিত্তিত মোৰ নাম অন্তৰ্ভূক্ত কৰাৰ বাবে অনুৰোধ জনালো৷

(নথিৰ বিবৰণ— বাদ পৰাৰ কাৰণ, মূল আবেদন প্ৰ-পত্ৰ, দাখিল কৰা নথি-পত্ৰ, দাবী প্ৰ-পত্ৰ, বংশবৃক্ষ, অতিৰিক্ত নথি পত্ৰ)  

--------------------------------------------------------------------------------

Read More