টেট শিক্ষক আৰু আমাৰ ভৱিষ্যত

ছাচ্চাৰ কমিটিৰ প্ৰতিবেদনৰ পৰা বহু কথা জানিব পৰা যায়৷ তাৰ আটাইতকৈ গুৰুত্বপূৰ্ণ কথাটো হ’ল ধৰ্মীয় সংখ্যালঘু সকলৰ শিক্ষাৰ অৱস্থা৷

জানিব পৰা মতে চৰ-চাপৰি অঞ্চলত মাত্ৰ ১৯.৩২ শতাংশ লোক শিক্ষিত (এতিয়া অলপ বাঢ়িব পাৰে)৷

মই যিমানদূৰ জানো এই অঞ্চল সমূহৰ প্ৰাথমিক বিদ্যালয় সমূহত ছাত্ৰ অনুপাতে শিক্ষকৰ হাৰ পুতৌ লগা ধৰণে কম৷ 

শেহতীয়াকৈ টেটৰ জড়িয়তে নিয়োগ কৰা শিক্ষকৰ অধিকাংশই বদলি হৈ অইন ঠাইলৈ আঁতৰি গৈছে৷ ফলত এই অঞ্চলবোৰৰ শিক্ষাৰ বিশেষ অগ্ৰগতি লাভ কৰা নাই৷ এয়া নিশ্চয়কৈ দুৰ্ভাগ্যজনক৷ 

যোৱা কেইদিন মানৰ পৰা এই অঞ্চলবোৰত শিক্ষয়িত্ৰীসকল সুৰক্ষিত নহয় বুলি সামাজিক মাধ্যমত তোলপাৰ লাগিছে (সঁচা-মিছা প্ৰমাণ কৰাৰ বাবে উচ্চ পৰ্যায়ৰ তদন্তৰ প্ৰয়োজন)৷ বহু ৰাজনৈতিক নেতা আৰু সাম্প্ৰদায়িক চৰিত্ৰৰ লোকে ইয়াকলৈ নিকৃষ্ট ৰাজনীতি কৰা দেখা গৈছে৷ যিটো কোনোপধ্যেই গ্ৰহণযোগ্য নহয়৷ কিছুমান গেৰুৱা নেতাই ‘সংখ্যালঘু অঞ্চলবোৰত এইবোৰ হয়’ বুলি মত ব্যক্ত কৰি সমগ্ৰ সংখ্যালঘু ৰাইজক নিকৃষ্ট মানসিকতাৰ বুলি বুজাব বিচাৰিছে৷ 

----------------------------

ইয়াৰ সমাধান ক’ত— 

১৷ ওপৰত উল্লেখ কৰা কথাবোৰ দায়িত্বশীল চৰকাৰে গুৰুত্ব সহকাৰে গ্ৰহণ কৰা প্ৰয়োজন৷ 

২৷ উচ্চ পৰ্যায়ৰ তদন্ত হ’ব লাগে আৰু অপৰাধীক দৃষ্টান্তমূলক শাস্তিৰ প্ৰদান কৰিব লাগে৷

৩৷ যিবোৰ অঞ্চলত এনে নিকৃষ্ট ঘটনা সংঘটিত হৈছে সেই অঞ্চলত চৰকাৰী-বেচৰকাৰী ভাবে সজাগতাৰ সৃষ্টি কৰি ভৱিষ্যত সুৰক্ষিত কৰিব লাগে৷

৪৷ এই অঞ্চলৰ পৰা এগৰাকী শিক্ষক-শিক্ষয়িত্ৰীকো বদলি কৰিব নালাগে, প্ৰয়োজনত নিৰাপত্তাৰ ব্যৱস্থা কৰিব লাগে৷ অন্যথায় এই ব্যধি দীৰ্ঘ দিনৰ বাবে বাহাল থাকিব, যিটো সুস্থ আৰু সভ্য মানুহে কেতিয়াও কামনা নকৰে৷ 

৫৷ ‘শিক্ষা’ক লৈ ৰাজনীতি কৰা বন্ধ কৰিব লাগে৷

------------------------------

সচেতন আৰু সাংগঠনিক বন্ধু সকলে এই বিষয়বোৰৰ অৱসান ঘটাব লাগে৷ এনেকুৱা এটা মহল থাকিব পাৰে যিসকলে শিক্ষাৰ ক্ষেত্ৰত পিছপৰা সকলক অধিক পিছ পেলাই ৰখাৰ কূটিল ষড়যন্ত্ৰ ৰচনা কৰিব পাৰে৷ তাৰ প্ৰতি লক্ষ্য ৰাখি প্ৰতিজন সচেতন লোকে সুস্থ সমাজ গঠনৰ অংশীদাৰ হ’ব লাগে৷

------------------------------

‘আমাক এখন জ্ঞানৰ দ্বাৰা পৰিচালিত সমাজ ব্যৱস্থা লাগে’

—সাজাহান আলী আহমেদ

শিক্ষা সম্পাদক, ‘আমছু’