এগৰাকী মহিলাৰ ভাইৰেল ভিডিঅ আৰু বিশ্বাসহীনতাৰ এটা অধ্যায়

কদম আলীৰ পিতৃ ওজমান আলীৰ লগত লেখক

বিশ্বাস নামৰ শব্দটো অতিকৈ মৰ্মান্তিক৷ বিশ্বাসহীনতাৰ পৃথিৱীত কাম কৰা অত্যাধিক জটিল৷ বিশ্বাস কৰিব নোৱাৰে সচেতন শিক্ষিত সমাজে, বিশ্বাস কৰিব নোৱাৰে নেতা, শিক্ষক, চাকৰিজীৱী, অধিবক্তা, ডাক্তৰ, অভিজন্তা, ব্যৱসায়ীয়ে৷ আনকি মানৱধিকাৰ সংস্থায়ো বিশ্বাস কৰিব নোৱাৰে মানুহক৷ এই বিশ্বাসহীনতাৰ বেমাৰ আমাৰ মাজত কিয় ? NRC বা নাগৰিকত্বৰ সমস্যাৰ জৰিয়তে জনগোষ্ঠীয় চৰম সংকটৰ সন্ধিক্ষণত আমিবোৰে ইজনে আনজনক বিশ্বাস কৰিব নোৱাৰো৷ এই দুৰ্ভাগ্যজনক পৰিৱেশৰ সৃষ্টি কিয় হ’বলৈ পালে ? আমিবোৰেই আকৌ সেই নবীৰ উম্মত বুলি দাবী কৰো যাক সৰুৰে পৰা কাফিৰসকলেও আল-আমিন (বিশ্বাসী) বুলি সম্বেধন কৰিছিল৷ 

কিয় এই মানৱীয় প্ৰমূল্যবোধৰ সংকট ?

১৯ মে’ তাৰিখে এটা ভিডিঅ তৈয়াৰ কৰিছিলো৷ এগৰাকী মহিলাৰ লগত প্ৰায় ৭ মিনিটৰ হৃদয়বিধাৰক কথোপকথন (ইন্টাৰভিও গ্ৰহণ কৰাৰ পৰা সম্পাদনা কৰা লৈকে বহুবাৰ চকুলো ধৰি ৰাখিব নোৱাৰা হৈছিলো৷ মোৰ লগত সহযোগ কৰিছিল আলিমুল ইছলামে৷) ৷আৰু ‘ভিডিঅৰ মহিলা গৰাকীৰ স্বামী ২ বছৰ ৪ মাহে ডিটেনশ্বন কেম্পত বন্দি। চাৰি গৰাকী সন্তানৰ মাতৃ গৰাকীয়ে কেচুৱা কোলাত লৈ লোকৰ ঘৰত কাম কৰি স্বামীক মোকলাই অনাৰ প্ৰচেষ্টা অব্যাহত ৰাখিছে। এই গৰাকী মহিলাই স্বামীগৃহৰ ৭ জনীয়া পৰিয়ালটোকো চাব লগা হয়। 

তেওঁলোকৰ বাবে জানো আপোনাৰ মনে কান্দি উঠা নাই !

ইদুল ফিতৰৰ আনন্দৰ পৰা বঞ্চিত হ’ব ধৰা পৰিয়ালটোক আপুনিও কিছু আৰ্থিক সাহায্য প্ৰদান কৰিব পাৰে। 

তলত মোৰ একাউন্টৰ তথ্য দিয়া হ’ল¸ আপোনাৰ দান উপযুক্ত সময়ত তেখেতক প্ৰদান কৰাৰ প্ৰতিশ্ৰুতি প্ৰদান কৰা হ’ল।

আশা কৰো সহাৰি জনাব।

AC Holder : Shajahan Ali Ahmed.

SBI Simlaguri Branch.

IFSC : SBIN0015078

AC no. 20237822999

Mobile : 9401916223

বৰঙণী প্ৰেৰণ কৰি WhatsApp ত নাম ঠিকনা আৰু দানৰ পৰিমাণ জনাবলৈ অনুৰোধ জনালো। 

(পৰিয়ালটোক লগ পাব বিচাৰিলেও সহযোগিতা কৰা হ’ব)’ — বুলি আমাৰ ইউটিউব চেনেল VOICE Riser ত ২১ মে তাৰিখে প্ৰথমে আপলোড কৰি ফেচকুতক একে নামেৰে থকা পেজতো আপলোড কৰিছিলো আৰু মোৰ ব্যক্তিগত একাউন্টৰ পৰা লিংক শ্বেয়াৰ কৰিছিলো৷ কিছুসময়ৰ ভিতৰেই বন্ধু আশ্ৰাফুল হোছেইনে ফোন কৰি ক’লে— ‘নিজৰ একাউন্ট দিব নালাগিছিল, আপোনাক বহুতে বিশ্বাস নকৰিব, বদনাম কৰিব, মনত দুখ পাব৷ পাৰিলে মহিলাগৰাকীৰ নিজৰ একাউন্ট নম্বৰ দিয়ক৷’ মই ক’লো— মই বদনামক ভয় নকৰো৷ তাইৰ একাউন্টৰ তথ্য মোৰ হাতত নাই, গতিকে ২ বছৰ চাৰি মাহে সকলো মানৱতাবাদীৰ পৰা এন্ধাৰত থকা দুৰ্ভগীয়া পৰিয়ালটোক কিছু আৰ্থিক সকাহ দিয়াৰ বাবে বদনামী হ’বলৈ সাজু আছো৷ ভুল তাতেই হ’ল৷ মই তেওঁৰ কথা মানিব লাগিছিল৷

মই ভাবিছিলো, ইতিপূৰ্বে মহিলাগৰাকীয়ে বিদেশী ন্যায়াধীকৰণ আৰু গুৱাহাটী উচ্চ ন্যায়ালয়লা গৈ জুৰুলা হৈছে৷ গতিকে আমি যদি ভবা ধৰণে ৰাইজৰ সঁহাৰি পাওঁ ঈদৰ সময়ত আৰ্থিক সকাহ দিয়াৰ লগতে উচ্চতম ন্যায়ালয়লৈ যোৱাত সহায় কৰিব পাৰিম৷ কিন্তু আজিৰ দিনটোত (২২ মে’) যিমান ফোনকল পালো, মোক সঁচাকৈয়ে হতাশ কৰিলে৷ মনত দুখ পাইছো৷ কেইবাজনো বন্ধুৱে বিশ্বাস কৰি মোৰ একাউন্টত ১৭৫০ টকা জমা কৰাৰ বিপৰীতে প্ৰায় অৰ্ধ শতাধিক ফোন কল পালো য’ত কোৱা হ’ল মহিলা গৰাকী আপোনাৰ কি হয় ? তাইৰ নিজৰ বা আত্মীয়ৰ একাউন্ট নম্বৰ আছেনে ? আপোনাক আমি কিয় বিশ্বস কৰিম আদি বহু কথা৷ অৱশ্যে মোৰ ভাল লাগিছে যে মহিলাগৰাকীৰ বেদনা উপলব্দি কৰি বহুতে দান কৰাৰ মানসিকতাৰে ফোন কৰিছে৷ 

কদম আলীৰ মাতৃ কমলা খাতুন

ভিডিঅত দেখা মহিলাগৰাকীৰ নাম আনোৱাৰা খাতুন(৩৫)৷ তাইৰ স্বামীৰ নাম কদম আলী(৪৩)৷ বাক্সা জিলাৰ গোৱৰ্দ্ধনা আৰক্ষী থানাৰ নিচেই কাষত তাইৰ স্বামী গৃহ৷ কদম আলীৰ পিতৃ-মাতৃ ক্ৰমে ওচমা আলী(৭০) আৰু কমলা খাতুন (৬০), চাৰি সন্তান ক্ৰমে পিংকী খাতুন (১৫) ৰেজিনা খাতুন (১২), আৰমান আলী (৮), শ্বাহিনা খাতুন (৫)ৰে মুঠ ৭ জনীয়া পৰিয়াল৷ একমাত্ৰ উপাৰ্জনকাৰী কদম আলী ডিটেনশ্বন কেম্পত বন্দি হোৱাৰ বাবে সমগ্ৰ পৰিয়ালটো বিধ্বস্ত হৈ পৰিছে৷ পিতৃ-মাতৃৰ একমাত্ৰ পুত্ৰ কদম আলীয়ে কঠোৰ পৰিশ্ৰমৰ বলত  প্ৰায় ১০ বিঘা মাটি বন্দকত লৈ খেতি কৰি সুখী পৰিয়ালৰ মাজত আনন্দেৰে জীৱন-যাপন কৰি আছিল৷ হঠাৎ ঘৰৰ ওচৰৰ থানাৰ পৰা সীমান্ত আৰক্ষীয়ে বিদেশী ন্যায়াধীকৰণৰ জাননী আনি দিছিল কদম আলীক৷৩৪৪/২০১৫ নম্বৰৰ গোচৰত ১-০৮-২০১৬ তাৰিখে অধিবক্তা জাকিৰ হোছেইন শিকদাৰৰ সহযোগত বৰপেটাৰ বিদেশী ন্যায়াধীকৰণ ৯ ত উপস্থিত হৈ ভাৰতীয় হোৱাৰ সকলো প্ৰমাণ লিখিত ৰূপত জমা দিছিল৷ মনকৰিবলগীয়া কথাটো হ’ল— দৰিদ্ৰ, শ্ৰমজীৱী, নিৰক্ষৰ পৰিয়ালটোৰ একমাত্ৰ উপাৰ্জনকাৰীৰ নাগৰিকত্ব সন্দেহ হোৱাৰ পিছত মাননীয় অধিবক্তাৰ জৰিয়তে তেওঁৰ ককাৰ ১৯৬৬ চনৰ ভোটাৰ তালিকা, ১৯৯৭ চনৰ পিতৃৰ ভোটাৰ তালিকা, পিতৃৰ ভোটাৰ পৰিচয়পত্ৰ, তেওঁৰ ২০১৬ চনৰ ভোটাৰ তালিকা আৰু গাওঁবুঢ়াৰ প্ৰমাণপত্ৰ প্ৰদান কৰা হৈছিল৷ বৰ্তমান আমি বিদেশী ন্যায়াধীকৰণত যিবোৰ গোচৰ চলা দেখা পাওঁ সেইবোৰত আৰু অধিক নথিৰ কথা উল্লেখ থাকে৷ যেনে — ১৯৫১ চনৰ NRC, ১৯৫২ চনৰ পৰা ১৯৬৫ চনলৈকে যিকোনো এটা ভোটাৰ তালিকা অথবা সমসাময়িক চৰকাৰী নথি-পত্ৰ, ১৯৬৬ চনৰ পৰা ১৯৭১ চনলৈকে যিকোনো এটা ভোটাৰ তালিকা অথবা সমসাময়িক চৰকাৰী নথি-পত্ৰ, ১৯৮৫ চনৰ পৰা ১৯৮৯ চনলৈকে যিকোনো এটা ভোটাৰ তালিকা অথবা সমসাময়িক চৰকাৰী নথি-পত্ৰ, ১৯৯৩ বা ১৯৯৪ চনৰ যিকোনো এটা ভোটাৰ তালিকা অথবা সমসাময়িক চৰকাৰী নথি-পত্ৰ, ১৯৯৭ চনৰ ভোটাৰ তালিকা, ২০০১ চনৰ পৰা বৰ্তমানলৈকে ৭-৮ বছৰ ব্যৱধানৰ ভোটাৰ তালিকা বা সমসাময়িক নথিপত্ৰ, মহিলাৰ বাবে পিতৃৰ লগত সংযোগী নথি-পত্ৰ আদি৷ ওপৰত উল্লেখ কৰা নথি-পত্ৰবোৰ ক্ৰমানুসাৰে নিজৰ বা পূৰ্বপুৰুষৰ অথবা উভয়ৰ হ’ব পাৰে৷ কিন্তু কদম আলীৰ গোচৰত নথিপত্ৰ কম পৰিমাণে উপস্থাপন কৰা দেখা গৈছে৷ কদম আলী আমাৰ দৃষ্টিত আৰু প্ৰকৃততেই এগৰাকী বৈধ ভাৰতীয় নাগৰিক৷ কাৰণ আজিৰ তেওঁৰ পিতৃ-মাতৃ বা পৰিয়ালৰ সকলো সদস্য বৈধ ভাৰতীয় নাগৰিক৷ কিন্তু বিদেশী ন্যায়াধীকৰণৰ জটিলতাৰ বাবে ২০-০২-২০১৭ তাৰিখে তেওঁ বিদেশী হ’ব লগা হ’ল৷ আৰু বিদেশী ন্যায়াধীকৰণৰ পৰাই তেওঁক গোৱালপাৰা ডিটেনশ্বন কেম্পলৈ লৈ যোৱা হ’ল৷ 

কদম আলৰ নিৰ্জাতিত পৰিয়াল

‘মই কদম আলীক ধৰি লৈ যোৱাৰ খবৰ পাই মাটিতেই আছিলো নে আকাশত পাহৰি গৈছিলো’— কদম আলীৰ মাতৃয়ে আমাক জনাইছিল৷ —‘আমি সীমান্ত আৰক্ষীৰ পৰা সহায়  বিচাৰিলো, কদম আলীক মুক্তি কৰাৰ বাবে কাকুতি-মিনতি কৰিলো, সীমান্ত আৰক্ষীয়ে আমাক এজন অধিবক্তাৰ নম্বৰ দিলে৷ আমি ফোন কৰি লগ কৰিলো, গুৱাহীটৰ শিজুবাৰীৰ জছিম উদ্দিন আহমেদ৷’— আমাক দুৰ্ভগীয়া মাতৃয়ে জনালে৷ অধিবক্তাৰ লগত ৩০ হাজাৰ টকাৰ বন্দবস্তিৰে গোচৰটো উচ্চ ন্যায়ালয়ত চলোৱাৰ সিদ্ধান্ত গ্ৰহণ কৰিলে৷ ক্ৰমাৎ আৰ্থিক ভাবে জুৰুলা হৈ পৰা পৰিয়ালটোৱে বন্দকত লোৱা মাটিবোৰৰ পৰা টকা উভতাই আনি খৰচ কৰিব লগা হ’ল, তাৰে পৰা ২৫ হাজাৰ টকা অধিবক্তাক দিয়া হ’ল৷ কিছুদিন পিছত কেচটো ভাল নহ’ব বুলি কৈ অধিবক্তাই ২৯-০৩-২০১৭ তাৰিখে উচ্চ ন্যায়ালয়ত ১০০ টকা ফিচ দি অৰ্ডাৰ কপি উলিয়াই পৰিয়ালটোক বিদায় দিলে৷ বাকী ৫ হাজাৰ টকা অধিবক্তাই বিচৰাৰ পাছত দিব নোৱাৰা পৰিয়ালটোৱে বিষাদত উভতি আহি দিকবিদিক হেৰুৱাই পেলালে৷ 

১০ বিঘা মাটিৰ বন্দকৰ টকা শেষ হ’ল৷ কদম আলীৰ পত্নী আনোৱাৰা খাতুনে লোকৰ ঘৰত কাম কৰে৷ ১৩০ৰ পৰা ১৫০ টকা হাজিৰাত কাম কৰে৷ পুষ্টিহীনতাত ভোগা পৰিয়ালটোৰ পোহপাল দিয়ে৷ কোলাৰ কন্যা সন্তান বিকলাঙ্গ৷ দুই কন্যা নৱম আৰু ষষ্ট শ্ৰেণীৰ ছাত্ৰী, একমাত্ৰ পুত্ৰ দ্বিতীয় শ্ৰেণীৰ ছাত্ৰ৷ — ভুক্তভোগী মহিলাৰ সন্মুখত মাথো অন্ধকাৰ..................৷৷

আন্দোলনৰ কাৰ্যসূচীৰ আলোকচিত্ৰ—

হাতত লিগেচি নথি লৈ ভুক্তভোগীৰ আন্দোলন

নথি পত্ৰ লৈ ভূক্তভোগীৰ আন্দোলন

ডি ভোটাৰৰ আন্দোলনত মানৱধিকাৰ কৰ্মী হাৰ্ষ মান্দেৰ

আন্দোলনৰ এটা দৃশ্য

১ অক্টোবৰ,২০১৮ ত ডি ভোটাৰসকলৰ প্ৰতি চলি থকা অন্যায়ৰ প্ৰতিবাদত বৰপেটা জিলাৰ উপায়ুক্তৰ কাৰ্যালয়ৰ সন্মুখত ৬ শাধিক ভুক্তভোগী পৰিয়ালৰ সহযোগত আমি ৩ ঘন্টীয়া অৱস্থান ধৰ্ণা ৰূপায়ন কৰি ভাৰতৰ ৰাষ্ট্ৰপতিলৈ ১০ দফীয়া দাবী সম্বলিত স্মাৰকপত্ৰ প্ৰেৰণ কৰিছিলো৷ মাথো ডি ভোটাৰৰ দ্বাৰা কৰা এইটোৱেই আছিল প্ৰথমটো আন্দোলন৷ এই আন্দোলনত দিল্লীৰ পৰা মানৱধিকাৰ কৰ্মী হাৰ্ষ মান্দেৰৰ লগতে ১০ গৰাকী বিশিষ্ট নাগৰিকে অংশ গ্ৰহণ কৰিছিল৷ সেই আন্দোলনত এই আনোৱাৰা খাতুনে অংশ লৈছিল৷ কিন্তু তেতিয়া সকলো কথা আমাক খুলি কোৱা নাছিল৷ 

সিযিকি নহওঁক নিৰ্মম বাস্তৱৰ মুখামুখী হোৱাৰ পিছত আমি যেতিয়া পৰিয়ালটোক আৰ্থিক সকাহ দিয়াৰ বাবে আহ্বান জনালো তেতিয়া কথাবোৰ সৰ্বস্তৰৰ মানুহৰ মন চুই গ’ল৷ ধিং ৰ বিধায়ক আমিনুল ইছলামে আমাৰ পেজৰ পৰা উক্ত ভিডিঅ ডাউনলোড কৰি উপযুক্ত ঠিকনা পালে আৰ্থিক সহযোগিতা কৰিব পাৰিলে হেঁতেন বুলি ফেচবুকত পোষ্ট কৰিলে৷ ভিডিঅটোৱে অতি কম সময়ৰ ভিতৰত ভাইৰেল হৈ পৰিল৷ তেওঁৰ পেজৰ পৰাই প্ৰায় ১.৩ লাখ ভিউ, ৪ হাজাৰ শ্বেয়াৰ হ’ল৷ ভিডিঅৰ মাজত দুবাৰকৈ মোৰ মোবাইল নম্বৰ প্ৰকাশ কৰা হৈছে৷ বিধায়ক গৰাকীয়ে সেই মোবাইল নম্বৰত এবাৰো যোগাযোগ কৰিব আহৰি নাপালে৷ ভিডিঅ ভাইৰেল হোৱাত অত্যাধিক ফোন কল লাভ কৰিহে জানিলো যে আমাৰ ভিডিঅ ভাইৰেল হৈছে৷ লগে লগে বিধায়ক গৰাকীক মেছেজ কৰিলো যে যদি পৰিয়ালক সহায় কৰিব বিচাৰে তেন্তে আমাৰ সৈতে যোগাযোগ কৰিলে সহযোগিতা কৰা হ’ব৷ উত্তৰত ধন্যবাদ বুলি লিখি থৈ দিলে৷ নিশা লৈকে কেইবাজনে ফোন কৰিলে যে তেওঁলোকক হেনো বিধায়কে পৰিয়ালৰ একাউন্ট নম্বৰ বিচাৰি অনুৰোধ কৰিছে৷ —আমি অপমান বোধ কৰিলেও মহিলা গৰাকীৰ একাউন্ট নম্বৰ যোগাৰ কৰিছো আৰু অচিৰেই IFSC ৰ সমস্যা সমাধান কৰি ৰাজহুৱা কৰিম৷ কাৰণ আমাক বিশ্বাস কৰক বা নকৰক পৰিয়ালটোৰ প্ৰতি জাতে সকলোৱে মানৱতা প্ৰদৰ্শন কৰাৰ সুবিধা পায় আৰু নকৰক যন্ত্ৰণাৰ পৰা পৰিয়ালটোৱে পৰিত্ৰাণ পায়৷ 

আমাৰ সচেতন শিক্ষিত সমাজ, ৰাজনৈতি-অৰাজনৈতিক নেতা, শিক্ষক, চাকৰিজীৱী, অধিবক্তা, ডাক্তৰ, অভিজন্তা, ব্যৱসায়ীসকলে সমাজৰ এই দুখবোৰ কেতিয়া নিজৰ চকুৰে দেখা পাব ? 

কি কাৰণত এনেবোৰ হাজাৰ হাজাৰ যন্ত্ৰণাৰ কাহিনী তেওঁলোকৰ চকুত ধৰা নিদিয়ে ? প্ৰতিজন সংখ্যালঘু বিধায়কে এজনকৈয়ো যদি সামাজিক কৰ্মীক তথ্য সংগ্ৰহৰ কামত নিয়োজন কৰি এনেবোৰ কঠোৰ বাস্তৱ পোহৰলৈ আনিব পাৰিলে হেঁতেন কদম আলীৰ দৰে হাজাৰ হাজাৰ নিৰিহজনে ন্যায় লাভ কৰিবলৈ সক্ষম হ’ল হেঁতেন৷

—সাজাহান আলী আহমেদ

সমন্বয়ক, ডি ভোটাৰ গৱেষণা কেন্দ্ৰ, বৰপেটাৰোড৷

সাধাৰণ সম্পাদক, APICR

Read More

প্ৰসংগঃ উচ্চতম ন্যায়ালয়ত NRC সম্পৰ্কীয় গোচৰৰ শুনানী

           মাননীয় উচ্চতম ন্যায়ালয়ৰ মূখ্য ন্যায়াধীশ ৰঞ্জন গগৈ আৰু মাননীয় ন্যায়াধীশ ৰহিন্তন ফলি নৰিমানৰ দ্বাৰা গঠিত খণ্ড বিচাৰপীঠত আজি ০৮.০৫.২০১৯ ইং তাৰিখে ৰাতিপুৱা ১০.৩০ বজাত NRC সম্পৰ্কীয় গোচৰৰ শুনানী অনুষ্ঠিত হয়। বৰ্তমান ৰাজ্য ব্যাপি চলি থকা objection hearing ত  আপত্তিকাৰী (objection কৰোতা) উপস্থিত নথকা বিষয়টি মাননীয় উচ্চতম ন্যায়ালয়ৰ দৃষ্টিগোচৰ কৰাত মাননীয় ন্যায়ালয়ে ৰাজ্যিক সমন্বয়ক শ্রী প্রতীক হাজেলাক আইনমতে সিদ্ধান্ত দিবলৈ নিৰ্দেশনা দিয়ে। আপত্তিকাৰী উপস্থিত থাকক বা নাথাকক আইনৰ কথা মনত ৰাখি ৰাজ্যিক সমন্বয়কক নিজৰ বিবেচনাৰে সেই সমূহ নিষ্পত্তি কৰি ৩১ জুলাই বা তাৰ এদিনৰ পূৰ্বে পূৰ্ণাঙ্গ NRC প্ৰকাশ কৰিবলৈ নিৰ্দেশনা প্ৰদান কৰে। আপত্তিকাৰীৰ সবিশেষ তথ্য যাৰ বিৰুদ্ধে আপত্তি কৰিছে তেওঁক দিয়া নিদিয়া বিষয়টিয়ো ৰাজ্যিক সমন্বয়কৰ বিবেচনাৰ ওপৰত এৰি দাবী-আপত্তি নিস্পত্তিৰ ক্ষেত্ৰত ৰাজ্যিক সমন্বয়ক শ্রী প্রতীক হাজেলাক সম্পূৰ্ণ স্বাধীনতা দি মুঠতে এদিনো বিলম্ব নকৰাকৈ ৩১ জুলাই বা তাৰ এদিন পূৰ্বে চূড়ান্ত NRC প্ৰকাশ কৰিবলৈ কঠোৰ নিৰ্দেশনা প্ৰদান কৰে। NRC সম্পৰ্কীয় এই আবেদনৰ পুনৰ ১০ জুলাই, ২০১৯ ইং তাৰিখে শুনানী অনুষ্ঠিত হব। 

          আপত্তি আবেদন দাখিল কৰাৰ অন্তিম তাৰিখত নিৰ্বিচাৰে সৰ্বানন্দ সোনোৱাল নেতৃত্বাধীন ৰাজ্য চৰকাৰৰ পৃষ্ঠপোষকতাত অসমৰ কিছু সংগঠনৰ সহযোগত হকে বিহকে কোনো বিচাৰ বিবেচনা নকৰাকৈ কেৱল বিশেষ সম্প্ৰদায়ৰ ৰাইজক শাৰীৰিক মানসিক আৰু আৰ্থিক ভাৱে নিৰ্যাতন চলোৱাৰ উদ্দেশ্যৰে দাখিল কৰা আপত্তি আবেদন সমূহ যে কেৱল NRC প্ৰস্তুতকৰন প্ৰক্ৰিয়াত জটিলতা সৃষ্টি কৰাৰ বাবেহে কৰিছিল সেয়া আজি প্ৰমানিত হৈছে। Objection hearing ত আপত্তিকাৰী উপস্থিত নাথাকিলে সেই আপত্তি খাৰিজ কৰি একপক্ষীয় সিদ্ধান্ত দিব লাগে। যিহেতু ৰাজ্যিক সমন্বয়ক শ্রী প্রতীক হাজেলাক দাবী আপত্তি নিষ্পত্তিৰ বাবে সম্পূৰ্ণ কৰ্তৃত্ব প্ৰদান কৰিছে সেয়ে অযথাই দাখিল কৰা আপত্তি আবেদন সমূহ খাৰিজ কৰি ১৯৭১ চনৰ ২৫ মাৰ্চ তাৰিখৰ পূৰ্বৰ বৈধ ভাৰতীয় নাগৰিকক ৰাজ্যিক সমন্বয়ক শ্ৰী প্ৰতীক হাজেলাই উচিত ন্যায় প্ৰদান কৰিব বুলিও আমি আশাবাদী। অবৈধ বিদেশী সমস্যাৰ চূড়ান্ত সমাধানৰ লগতে বছৰ বছৰ ধৰি বিদেশীৰ নামত অত্যাচাৰিত হৈ থকা সংখ্যালঘু সম্প্ৰদায়ৰ ৰাইজে এই অপবাদৰ পৰা মুক্তি পোৱাৰ স্বাৰ্থত NRC প্ৰস্তুতকৰন প্ৰক্ৰিয়াত পূৰ্বৰ দৰে সহযোগ কৰা উচিত।  মিছাতে যিসকলে আপত্তি আবেদন দাখিল কৰি সমগ্ৰ প্ৰক্ৰিয়াটোতে বিধিপথালি দিব বিচাৰি আছে বা অযথাই ১৯৭১ চনৰ ২৫ মাৰ্চ তাৰিখৰ পূৰ্বৰ বৈধ-শুদ্ধ নথি থকা ভাৰতীয় নাগৰিকক হাৰাশাস্তি কৰি আছে তেনে দুষ্ট প্ৰকৃতিৰ লোক বা সংগঠনৰ নেতৃত্বক তদন্ত মৰ্মে চিনাক্ত কৰি উচিত শাস্তি প্ৰদান কৰিবলৈ কৰ্তৃপক্ষক দাবী জনাওঁ । অন্যথাই তেনে ব্যক্তিৰ  বিৰূদ্ধে নাগৰিকত্ব আইনৰ ধাৰা ১৭ অনুসৰি গোচৰ তৰি  আইনৰ জৰিয়তে বিহীত ব্যৱস্থা লবলৈ ভুক্তভোগী ৰাইজক আহ্বান জনালো।

Read More

উচ্চতম ন্যায়ালয়ৰ ৰায়ক অৱমাননা কৰি ডি ভোটাৰৰ ভোটদানত বাধা

উচ্চতম ন্যায়ালয়ৰ ৰায়ক অৱমাননা কৰি ডি ভোটাৰৰ ভোটদানত বাধা

বৰপেটাৰোডৰ পৰা শাকিল আহমেদ আৰু সাজাহান আলী আহমেদৰ প্ৰতিবেদন, ২৩ এপ্ৰিলঃ

ৰাজ্যৰ দীৰ্ঘ দিনীয়া নাগৰিকত্বৰ সমস্যা সমাধানৰ বাবে যি সময়ত উচ্চতম ন্যায়ালয় তত্বাবধানত ৰাষ্ট্ৰীয় নাগৰিকপঞ্জীৰ কাম চলি আছে সেই একে সময়তে উচ্চতম ন্যায়ালয়ৰ ৰায়দানক চৰম অৱমাননা কৰি ভোটগ্ৰহণ অনুষ্ঠিত কৰিছে নিৰ্বাচন আয়োগে৷ ১৯৯৭ চনৰ পৰা ভোটাৰ তালিকাত ডি চিহ্নৰে সন্দেহযুক্ত নাগৰিক হিচাপে চিহ্নিত কৰি ৰখা তথাকথিত সন্দেহযুক্ত নাগৰিকৰ পক্ষত ৰায়দান কৰি ৮ ফেব্ৰুৱাৰী, ২০১৬ তাৰিখে উচ্চতম ন্যায়ালয়ে SLP (C) 3045/2016 যোগে ডি ভোটাৰ আৰু বিদেশী ন্যায়াধীকৰণত গোচৰ বিচাৰাধীন হৈ থকা লোকে নিৰ্বাচনী প্ৰক্ৰিয়াত অংশ গ্ৰহণ কৰিব পাৰিব বুলি নিৰ্দেশনা প্ৰদান কৰিছিল৷ কিন্তু ৰাজ্যৰ নিৰ্বাচন আয়োগে নিৰ্বাচনী বিষয়াসকলক প্ৰশিক্ষণৰ সময়তেই ডি ভোটাৰসকলৰ ভোট গ্ৰহণ নকৰিবলৈ নিৰ্দেশ প্ৰদান কৰি উচ্চতম ন্যায়ালয়ৰ ৰায়ক চৰম ভাবে অৱমাননা কৰা দেখা যায়৷ ৰাজ্যৰ তৃতীয় তথা শেষ পৰ্যায়ৰ নিৰ্বাচনত বৰপেটা আৰু কোকৰাঝাৰ লোকসভা সমষ্টিৰ প্ৰায়বোৰ ভোটগ্ৰহণ কেন্দ্ৰত ডি ভোটাৰসকলে উচ্চতম ন্যায়ালয়ৰ নিৰ্দেশনাৰ প্ৰতিলিপি আৰু যাৱতীয় নথি-পত্ৰ হাতত লৈ ভোটদান কৰিবলৈ আহি হতাশ হৈ উভতিব লগা হয়৷ ডি ভোটাৰৰ সমস্যা সমাধানৰ নামত বিদেশী ন্যায়াধীকৰণৰ দ্বাৰা চৰম হাৰাশাস্তিৰ সন্মুখীন হোৱা সৰ্বসাধাৰণ ৰাইজে উচ্চতম ন্যায়ালয়ৰ উক্ত ৰায়দানৰ দ্বাৰা উৎসাহিত হ’লেও নিৰ্বাচন আয়োগৰ কাণ্ডই পুনৰায় এই বিষয়টোক জটিলতাৰ মাজলৈ ঠেলি দিছে৷ সাধাৰণ ভোটাৰৰ কোনো নথি-পত্ৰ পৰীক্ষা-নিৰিক্ষা নকৰাকৈ যধে-মধে নিৰ্বাচন আয়োগে কেৱল মাত্ৰ নাম আৰু উপাধী চাই লাখ লাখ প্ৰকৃত আৰু বৈধ ভাৰতীয় নাগৰিকক চৰম হাৰাশাস্তি কৰি থকাৰ সময়তেই ২০১৬ চনৰ উচ্চতম ন্যায়ালয়ৰ নিৰ্দেশনাক অৱমান কৰি স্পষ্ট কৰি দিছে আয়োগৰ চৰম অৰাজকতা৷ একেদৰে অসম আৰক্ষীৰ সীমান্ত শাখাৰ কাল্পনীক গোচৰৰ দ্বাৰা নাগৰিকত্বৰ নামত নিৰিহ জনতাক দি অহা জমৰ যাতনাৰ অৱসান বিচাৰি হাহাকাৰ কৰি থকাৰ সময়তেই উচ্চতম ন্যায়ালয়ৰ ৰায়ক বৃদ্ধাঙ্গুষ্ঠ দেখুৱা নিৰ্বাচন আয়োগক নাকি লগাব কোনে— সেইটো সাম্প্ৰতিক সময়ৰ চৰ্চিত প্ৰশ্ন হিচাপে চিহ্নিত হৈছে৷ 

Read More

ডি ভোটাৰৰ নামত ৰাজনীতি কিয় ?

ৰাষ্ট্ৰীয় নাগৰিকপঞ্জীৰ জৰিয়তে বাংলাদেশী সমস্যাৰ স্থায়ি সমাধান লাভ কৰাৰ আশা বুকুত লৈয়ে আগবাঢ়িছিল সকলোৱে৷ কিন্তু ভুলক্ৰমে ডি ভোটাৰ হিচাপে চিহ্নিত কৰা লোকসকলৰ পৰা আৰম্ভ কৰি কাল্পনিক কথাৰে সীমান্ত শাখাৰ আৰক্ষীয়ে স্বদেশী লোকক বিদেশীৰ গোচৰ জাপি দিয়া লোকসকলে NRC ৰ জৰিয়তে উপকৃত হোৱাৰ কোনো আশা দেখা পোৱা নাযায়৷ ১৯৯৭ চনৰ পৰা ২০১২ চনলৈকে যিমান ডি ভোটাৰৰ গোচৰ নিষ্পত্তি হৈছিল তাৰে ৮৩ শতাংশই বিদেশী নহয় বুলি ৰায়দান পাইছিল৷ এনে ক্ষেত্ৰত ডি ভোটাৰসকলক মহামান্য উচ্চতম ন্যায়ালয়ে NRCৰ পৰা একাষৰীয়া কৰি ৰখাৰ বাস্তৱসন্মত যুক্তি মই বিচাৰি পোৱা নাই৷ মহামান্য ন্যায়ালয়ে এই বিষয়বোৰক লৈ কি কাৰণে গুৰুত্ব নিদি বিদেশী ন্যায়াধীকৰণক জীৱীত ৰাখিলে সেয়াও এক জটিল প্ৰশ্নৰ বিষয়৷ ১৯৯৭ চনৰ পৰা ২০১২ চনলৈকে এই বিদেশী ন্যায়াধিকৰণ সমূহে যিধৰণৰ প্ৰক্ৰিয়া অৱলম্বন কৰি গোচৰবোৰৰ নিষ্পত্তি কৰিছিল আজিও একে পদ্ধতি অৱলম্ভন কৰি আছে৷ এগৰাকী জেষ্ঠ অধিবক্তাৰ পৰা জানিব পাৰিলো (নাম, ঠিকনা প্ৰকাশত অনিচ্ছুক) যে যাৱতীয় নথি-পত্ৰ থকা শতকৰা ৯৫ শতাংশ গোচৰৰ ৰায়দান বিদেশী হিচাপে দিয়া হয়৷ 

সৌসিদিনা আমাৰ গৱেষণা কেন্দ্ৰত উপস্থিত হোৱা এগৰাকী ভূক্তভোগীয়ে আবেগিক হৈ পৰিছিল৷ তেওঁৰ মাতৃৰ বিৰুদ্ধে সীমান্ত আৰক্ষীয়ে বিদেশীৰ গোচৰ জাপি দিছিল৷ ৰীতিমতে ভাৰতীয় ভদ্ৰ মহিলাগৰাকীয়ে বিদেশী ন্যায়াধীকৰণৰ জাননী মতে নথি-পত্ৰ লৈ হাজিৰ হৈছিল৷ কিছুদিন গোচৰ চলিল৷ অৱস্থাৰ পৰিৱৰ্তনৰ বাবে কঠোৰ পৰিশ্ৰম কৰা পৰিয়ালটোয়ে নাগৰিকত্বৰ পৰীক্ষাৰ নামত গাঠিৰ ধন খৰচ কৰি জুৰুলা হ’ল৷ শেষৰ দিনাখন বিদেশী ন্যায়াধীকৰণৰ সদস্যজনে তেওঁক মাতি নি ক’লে— ‘আপোনালোকৰ নথি-পত্ৰ মতে আপোনাৰ মাতৃক স্বদেশী হিচাপে ঘোষণা কৰিব পৰা যায়৷ কিন্তু মই ওপৰত জবাব দিব লাগিব৷ গতিকে আপুনি হাইকোৰ্টত মাথা মাৰক৷’— এনেধৰণৰ কথাকোৱা সদস্যজনৰ বিৰুদ্ধে বহুতে আমাৰ আগত মৌখিক অভিযোগ কৰিছে যে ৫০-৬০ হাজাৰ টকা দিলে হেনো এনেধৰণৰ মন্তব্য নিদিয়ে৷ পজিটিভ ৰিজাল্ট দিয়ে৷ 

প্ৰায় ৪ হাজাৰ ডি ভোটাৰৰ নথি-পত্ৰ ইতিমধ্যে পৰীক্ষা নিৰীক্ষা কৰি যিমানদূৰ বুজিব পাৰিছো যে প্ৰায় এশ শতাংশ ডি ভোটাৰেই ভাৰতীয়৷ মই দাবী সহকাৰে ক’ব পাৰো যে একমাত্ৰ নামৰ উপাধী লক্ষ্য কৰি বৈধ ভাৰতীয় দৰিদ্ৰ নাগৰিকক ডি ভোটাৰৰ যন্ত্ৰণাৰ মাজলৈ ঠেলি দিয়া হৈছে৷ দু-এটা ধনী লোকৰ বাহিৰে অধিকাংশ লোকে আনকি আমাৰ কাৰ্যালয়লৈ আহিবলৈকো কষ্ট পায়৷ কাৰণ আহিবলৈ হ’লে ৫০ টকা খৰচ হয়, এদিনৰ হাজিৰা নষ্ট হয়, এদিনত মুঠ লোকচান ৩০০+৫০=৩৫০ টকা৷ নিৰ্বাচন আহিলে এই লোকসকলৰ পক্ষে থিয় দিয়া মানুহৰ অভাৱ নাই৷ ফেচবুকতেই দেখা পালো এগৰাকী প্ৰাৰ্থীয়ে এই কঠিন সমস্যা সমাধান কৰাৰ বাবে হেনো লোকসভাত মাত মাতিব৷ এই কথা জানি ভাল লাগিছে৷ কিন্তু সেইগৰাকী নিৰ্লজ্ব্য ব্যক্তিৰ সন্মুখতেই সতীৰ্থ বিধায়কক স্বয়ং অসম বিধানসভাত বাংলাদেশী বুলি ইতিকিং কৰাৰ পিছতো নিৰৱতা অৱলম্বন কৰিছিল একমাত্ৰ স্ব-দলীয় নোহোৱাৰ বাবে৷ তেন্তে তেওঁ এই ডি ভোটাৰসকলক দলীয় দৃষ্টিকোণেৰে চাব নেকি ? নিৰ্বাচনী বৈতৰণী পাৰ হোৱাৰ পিছত এই ইছ্যু মনত থাকিব নে ? ডি ভোটাৰৰ সমস্যা সমাধান কৰাৰ বাবে মাত মাতিব বুলি ছ’ছিয়েল মিডিয়াত যে ব্যাপক প্ৰচাৰ চলিছে সেই কথা তেওঁ জানে নে নাই সেই কথাতো মোৰ সন্দেহ হয় !— সিযিকি নহওঁক পৰিৱৰ্তিত ৰাজনৈতিক পৰিস্থিতিৰ প্ৰতি লক্ষ্য কৰিয়েই হয়তো আমি এনে প্ৰাৰ্থীকেই ভোট দিব লাগিব৷ কাৰণ আমাৰ হাতত বিকল্প নাই৷ কিন্তু সেইবুলি বিগত দিনৰ দৰে মাথো কাল্পনীক নিৰাপত্তাৰ শ্ল’গান শুনিয়েই সন্তুষ্ঠ থাকিম নে, আমাৰ সমস্যাবোৰৰ সমাধান হ’ব নে ?

Read More

ত্ৰাণকৰ্তা

আজিৰ পৰা ৩৯ বছৰ আগত এটা সপোন দেখিছিল 
সেইসময়ৰ তেজাল যুৱ চাম আৰু বৌদ্ধিক মহলে,
সেই সপোনৰ লগত সহযোগ কৰিছিল সহস্ৰজনে৷ 
নিজৰ জীৱন উচৰ্গা কৰি দিছিল ২২ গৰাকী বীৰ পুৰুষে,
ঘূণীয়াও হৈছিল বহুজনে৷ তেওঁলোকৰ আত্মাই শান্তি পাওঁক৷

সপোনবোৰ বাস্তাবায়িত হ’লে গঢ়ি নুঠিল হেঁতেন দিছপুৰৰ অট্টালিকা
দৰদাম নহ’ল হেঁতেন জীৱন-মৰণৰ৷

সমস্যাবোৰ সমাধান নহ’ল, সপোনবোৰ নষ্ট হৈ গ’ল
ৰঙীণ চচমাই সকলো খাই পেলালে৷

তেওঁলোকে চক্ৰবেহুৰ পৰা ওলাই আহিব পৰা নাই
ৰাজপ্ৰসাদৰ প্ৰতি ঠেং দাঙি থকা 
জাতীয়তাবাদৰ ভূৱা নিচান উৰাই
এদিন
হাইকমাণ্ডৰ জোতা চেলেকা
সেই সকলেই ত্ৰাণকৰ্তা ???

Read More

গোৱৰ্দ্ধনাত বিপিএফৰ ‘গ্ৰেণ্ড মাছ ৰেলী’,

নাৰায়নগুৰীৰ হত্যাকাণ্ডৰ অভিযুক্ত প্ৰমীলাৰাণীৰ মুছলমান ভোটাৰক আকৰ্ষণ কৰাৰ কৌশল৷আমাৰ যুদ্ধ এইবাৰ এনডিএফবি ইউ.জি ব্ৰহ্মৰ লগতহে হবঃ হাগ্ৰামা মহিলাৰী।

গোৱৰ্দ্ধনাৰ পৰা সাজাহান আলী আহমেদ আৰু নজৰুল আলী আহমেদৰ ৰিপোৰ্ট, ২৭ মাৰ্চঃ 

আজি দিনৰ প্ৰায় ১ বজাত ৫ নং কোকৰাঝাৰ লোকসভা সমষ্টিৰ অন্তৰ্গত তথা সৰভোগ বিধানসভা সমষ্টিৰ গোৱৰ্দ্ধনাত বিপিএফ দলৰ এখন বিশাল জনসভা অনুষ্ঠিত হয়। আগন্তুক লোকসভা নিৰ্বাচনৰ আতধৰি অহা ২৩ এপ্ৰিলত অনুষ্ঠিত হ’বলগীয়া লোকসভা নিৰ্বাচনত বিপিএফ তথা বিজেপি নেতৃত্বাধীন (এনডিএ) মিত্ৰ দলৰ প্ৰাৰ্থী হিচাপে অসমৰ কেবিনেট মন্ত্ৰী প্ৰমীলাৰাণী ব্ৰহ্মক প্ৰক্ষেপ কৰাৰ পিছতেই ককালত টঙালি বান্দিছে বিটিচিৰ শাসকীয় দলটোৱে। ইয়াৰ লগত সংগতি ৰাখি শক্তি প্ৰদৰ্শন কৰাৰ বাবে ‘গ্ৰেণ্ড মাছ ৰেলী’ নামেৰে বিটিচিৰ বিভিন্ন প্ৰান্তৰ পৰা লোকৰ সমাগম ঘটাই অনুষ্ঠিত সভাত বিটিচি প্ৰধান হাগ্ৰামা মহিলাৰীয়ে দলৰ অইন নেতাৰ লগত সম্পূৰ্ণ পৃথক স্থিতি গ্ৰহণ কৰি ‘নৱকুমাৰ শৰণীয়াৰ কাম নাই, তেওঁ মিছা কথা কৈ ভোট লৈছিল আমাৰ লগত এইবাৰ এই শৰণীয়া, কংগ্ৰেছ কোনো ফেক্টৰ নহয়, আমাৰ লগত এইবাৰ এবছু, এনডিএফবি আদি সংগঠনৰ সমৰ্থিত তথা ইউপিপিএলৰ প্ৰাৰ্থী ইউ. জি ব্ৰহ্মহে প্ৰতিদণ্ডী হ’ব বুলি তীৰ্জক মন্তব্য কৰে। কিন্তু তাৰ বিপৰীতে দলটোৰ শীৰ্খ নেতা তথা ৰাজ্য সভাৰ সাংসদ বিশ্বজিৎ দৈমাৰী, কেবিনেট মন্ত্ৰী চন্দন ব্ৰহ্ম আদি হেভিয়েট নেতাই এইবাৰ নৱ কুমাৰ শৰণীয়াৰ লগত তীব্ৰ প্ৰতিদন্দিতা হ’ব বুলি মত ব্যক্ত কৰে৷

সংখ্যালঘু ভোটাৰৰ কৌশলী স্থিতিত বিব্ৰত হৈ পৰা দলটোৰ শীৰ্ষ পৰ্যাৰ নেতাসকলৰ লগতে আনকি স্বয়ং আৰএমচিৰ সভাপতি আফজাল হুছেইন সৰকাৰে বিপিএফক সকলো মুছলমানে ভোট দিলেহে বিভিন্ন সমস্যাৰ সমাধান সম্পৰ্কে দলটোৰ পৰা বিশেষ দাবী কৰিব পৰা যাব বুলি বক্তব্য প্ৰদান কৰে৷ ২০১৪ চনৰ ২ মে’ত নাৰায়নগুৰীৰ হত্যাকাণ্ডত অভিযুক্ত মন্ত্ৰী তথা প্ৰাৰ্থী প্ৰমীলাৰাণী ব্ৰহ্মই সংখ্যালঘু ভোটাৰক বিশেষভাবে আকৰ্ষণ কৰিবলৈ যত্ন কৰি বক্তব্য প্ৰদান কৰা দেখা যায়৷ প্ৰসঙ্গক্ৰমে তেওঁ গোৱৰ্দ্ধনাৰ এখন মছজিদ বেঁকীৰ গড়াখহনীয়াৰ পৰা কেনেদৰে নিৰাপত্তা প্ৰদান কৰিছিল সেইবিষয়ে দোহাৰি কয়৷ তেওঁ লগতে গড়াখহনীয়াৰ বাবে মুছলমানসকলে অধিক ক্ষতিগ্ৰস্থ হোৱা বুলি উল্লেখ কৰে৷ বিপিএফ দলৰ সভাপতি তথা বিটিচি প্ৰধান হাগ্ৰামা মহিলাৰীয়ে স্বভাৱসূলভ আৰু নাটকীয় ভঙ্গিমাৰে কয় যে এবছুৰ সভাপতি প্ৰমোদ বড়ো হ'ল এজন বেপাৰী, তেওঁ প্ৰতিটো নিৰ্বাচনত বড়ো জনগোষ্ঠীটোক বিক্ৰি কৰি ধন উপাৰ্জন কৰি আহিছে, তেওঁ এইবাৰো কংগ্ৰেছ, বিজেপিৰ লগত দৰদাম কৰি আছে, বড়ো জনগোষ্ঠীৰ লগত প্ৰতাৰণা কৰি ৰাজনীতি কৰি আছে। মহিলাৰীয়ে লগতে কয় যে প্ৰমোদ বড়োই বড়ো জনগোষ্ঠীটোক বিপথে পৰিচালিত কৰি তেওঁলোকে সদায় বড়োলেণ্ড লাগে বুলি মিছাতে বিভিন্ন সময়ত ধৰ্ণা দি থাকে। তেওঁলোকে বড়ো জনগোষ্ঠীটোক ভোট বেংক হিচাপে ব্যৱহাৰ কৰাৰ স্বাৰ্থত মুখত কয় এটা কামত আন এটাহে কৰে বুলি কটাক্ষ কৰে। তেওঁ অভিযোগ উত্থাপন কৰি এবছুৱে ৰাইজৰ মাজত বড়োলেণ্ড দাবীৰে আন্দোলন কৰে আৰু কেন্দ্ৰত স্মাৰক পত্ৰ দিওতে আন কথাহে উল্লেখ কৰে বুলি কয়৷

মহিলাৰীয়ে তাৎপৰ্যপূৰ্ণ ভাবে কয় যে ২০০৩ চনৰ ১০ ফেব্ৰুৱাৰীৰ পূৰ্বৰ পৰা যিসকলে বিটিচিত বসবাস কৰি আছে সেইসকলেই বিটিচিৰ বাসিন্দা, তাতে কোনো জাত পাতৰ কথা নাহে আৰু এই কথা বিটিচি চুক্তিত উল্লেখ থকা বুলিওঁ মহিলাৰীয়ে জানিবলৈ দিয়ে যদিও সন্দেহযুক্ত নাগৰিকৰ নামত প্ৰায় প্ৰতিদিনে সীমান্ত আৰক্ষীৰ দ্বাৰা হৈ অহা নিৰ্জাতন আৰু একাংশ বিদেশী ন্যায়াধীকৰণৰ একপক্ষীয় ৰায়দানৰ জৰিয়তে ক্ষতিগ্ৰস্থ হোৱা থলুৱা লোকসকলৰ সম্পৰ্খত নিমাত থাকে৷ উল্লেখ্য যে মহিলাৰীয়ে পূৰ্বে কোৱা ধৰণেই ৰাজনীতিত কোনো স্থায়ি বন্ধু বা শক্ৰ নাই বুলি উল্লেখ কৰি বিটিচি উন্নয়ৰ স্বাৰ্থত অসমত এ আই ইউ ডি এফৰ চৰকাৰ হ’লেও লগত থাকিব বুলি কয়৷ লগতে কংগ্ৰেছ, বিজেপি, এজিপি বা অন্যান্য যিকোনো দলৰে চৰকাৰ গঠন কৰিলে তেওঁ সেই দলৰ লগতেই থাকিব বুলি কয়। তেওঁ কয় যে, আমি এবাৰ ইউ.জি ব্ৰহ্মক সাংসদ হিচাপে দিল্লীত পঠিয়াইছিলো বড়োলেণ্ড দাবী কৰাৰ বাবে কিন্তু ছয় বছৰ শাসন কৰিলে কোনো দিনো বড়ো জনগোষ্ঠীৰ উন্নয়ণৰ কথা সংসদৰ মজিয়াত উত্থাপন নকৰিলে। মহিলাৰীয়ে বিটিচি এলেকাত মহিলাসকলৰ আত্ম সহায়ক গোটক ৰাজ্য চৰকাৰে দিয়া ২৫ হাজাৰকৈ টকা নোপোৱাক লৈ অশ্বস্তিত পৰা দেখা যায়। তেওঁ কয় যে বিটিচিত বিজেপিয়ে চৰকাৰ চলোৱা নাই, ইয়াত কোনো দলৰ ৰাজনীতি নচলিব। তেখেতে ভাষণ প্ৰসঙ্গত কয় যে, হাতী এইবাৰ জঙ্গলত হে থাকিব মুকলি ঠাইত বিচাৰী পোৱাটো টান হ’ব বুলিওঁ মিত্ৰজোটৰ অংশীদাৰ এজিপি, বিজেপিক একপ্ৰকাৰ সমালোচনা কৰে। সভাত ৰাজ্য সভাৰ সাংসদ বিশ্বজিৎ দৈমাৰীয়ে বিটিচিৰ উন্নয়ণৰ স্বাৰ্থত বিপিএফ দলৰ হাত মজবুত কৰিবলৈ বিপিএফৰ মিত্ৰজোটৰ প্ৰাৰ্থী প্ৰমীলা ৰাণী ব্ৰহ্মক ভোট দিবলৈ আহব্বান জনায়। মন্ত্ৰী চন্দন ব্ৰহ্মই কয় যে, বিটিচি উন্নয়নৰ স্বাৰ্থত ইতিমধ্যে ২৫০ কৌটি টকা ধাৰ্য্য কৰা হৈছে, আৰু বিটিচিৰ জলন্ত সমস্যা সমাধানৰ স্বাৰ্থত বিপিএফ দলৰ সদায় চেষ্টা অব্যাহত থাকিব। সভাত আৰ.এম চি'ৰ সভাপতি আফজালুৰ হুছেইন চৰকাৰে কয় যে, "হীৰা শৰণীয়া হল চকীৰ তলা, প্ৰমিলা ৰাণী হৈছে আগৰতলা"। গতিকে হীৰা শৰণীয়াৰ কৌশল এইবাৰ ৰাইজে বুজি পাইছে যে তেওঁ এজন ঠক আৰু প্ৰতাৰক, নিৰ্বাচনৰ পূৰ্বে বড়ো আৰু অনাবড়ো নামেৰে বিটিচিবাসীক দুভাগত বিভক্ত কৰি নিৰ্বাচন জয়ী হৈছিলে, তেওঁ কৈছিল জয়ী হ'লে বিটিচিত থকা অনাবড়ো গাওঁসমূহ কৰ্তন কৰিব। কিন্তু তেওঁৰ পাচঁ বছৰ কাৰ্যকালত এদিনো সংসদৰ মজিয়াত এই বিষয়টো উত্থাপনেই নকৰিলে। গতিকে ৰাইজে হীৰা শৰণীয়াক এইবাৰ যোগ্য প্ৰত্যত্তোৰ দিবলৈ সাজু হৈছে।

সভাত ৫ নং কোকৰাঝাৰ লোকসভাৰ বিপিএফৰ প্ৰাৰ্থী প্ৰমীলা ৰাণী ব্ৰহ্মই ৰাইজে যাতে বিপুল ভোটেৰে জয়ী কৰায় তাৰ বাবে সমষ্টিবাসীক আহব্বান জনায়। উক্ত জনসভাত ইউপিপিএলৰ দলৰ পৰা প্ৰায় চৈধ্য শ নেতা-কৰ্মীয়ে শালবাৰী পৰিষদীয় সমষ্টিৰ প্ৰাক্তন এমচিএলএ ৰঞ্জিত খেৰকেটাৰীৰ নেতৃত্বত বিপিএফ দলত যোগদান কৰে৷ জনসভাখনত পাৰবিন চুলতানা নামৰ এগৰাকী শিশু শিল্পীয়ে দলটোৰ নেতা-কৰ্মীৰ নামেৰে সজোৱা এটি থলুৱা ভাষাৰ গীত গাই সকলোৰ দৃষ্টি আকৰ্ষণ কৰে৷ উক্ত বিশাল জনসভাত প্ৰায় পোন্ধৰ সহস্ৰাধিক ৰাইজে অংশ গ্ৰহণ কৰে৷

Read More